2 KORINTUS 8
8
Doy potulungi moluwedoi mian-mian Salani
1 #
Rm. 15:26
Utus-utus, kami yase komuyu potoiyo koidan tentang bulaando kona monondokan ko Mian Bisa doi anggota-anggota jemaat doi Makedonia. 2Yanila lapamo inuji tukon susaan-susaan mo motoong. Bai doi susaan-susaanoo lalomo, yanila tolongo laba-laba tukon sanaang tuuno konoano motulungiyo komian bailon, mau kai doi yaniladoo natalalais tuuno. 3Yaku moola pastikanggene baikon yanila namendebee menurut yanila naminoolakon, bai daano komo lobian. Akiyo komo bintekene, 4yanila kabiyo tuuno doi kami kalu momoola yanila namalaing momotombonii momebee tulung doi Mian Bisa namian doi Yudea. 5Yanila mebee lobian mododoon doi oila komai minoinikon. Yanila tumbe-tumbeno salakanggene kobutongo doi Temeneno, doibundu kami koidan, pokokonoi tukon Mian Bisa namongiasan. 6Doiyamo kosababpo kami bontiikene tuuno doi Titus – mo tambuune naiya usaha nia – sulano yana banggadudulkene naiya usaha nia mo monondok doi komuyudoo koidan. 7Komuyu totoimo doi sasaibino kolangge-langge: Komuyu totoimo doi manganggaan lalomo, doi bantilano kopandapat, doi motoiyan lalomo, doi bula-bulaa kokaliangano kousaha, tukon doi poseang lalomo doi kami. Tobikon doiya, monondoko komuyu koidan totingonii doi usaha nia lalomo mo monondok.
8Yaku aki kubontiikene doiya buno meeng kopalenta. Bai tukon motudoikon bulaando kona giatan komian bailon natulungiano kotulano, yaku koidan yase toiyo inaando kona polongan komu seang. 9Sabab komuyu toiyo tuuno baikon Yesus Kristus nda Temeneno seange tuuno kita. Yana kaasa, bai yana kubaiyo kobutongo teali talalais tuuk mukopontingan, sulano tukon natalalaisanoo, komuyu teali kaasa.
10Manulut daku palaat, kanamo tuuno kalu komuyu alapayomo oila komo komuyu atambuune doi taundoo molapa. Sabab komuyumo kai komo tumbe-tumbeno mo pikikene tukon moatambuune naiya usaha nia. 11Nah, budodoiya siokai komuyu poampakonggene menurut doi pokamampuan. Siokai komuyu kokolokot sulano poalapayo do usahadoo, bunomo lakon komuyu loolukonoo momokolokot mosodo doipoo atambuunano. 12Kalu komuyu yase mebee, maka ko Mian Bisa naikon talimayo domu bineekonoo moluwedoi oila komo daano doikoo, bolikon aki alaskanggene doi oila komo akiyo doikoo.
13-14Yaku bisa tuuno aki kumakisuutiyo mobebaskanggene komian bailon doi tanggung jawab, tukon mokotoongiyo komuyu. Bai komuyu nia budodoo daano mosukup kopoo langge, maka takainomo komuyu posukupiyo yanila nakakulangan. Kalu kai komuyu kakulangano, tukon yanila daanomo doi nasukupan, maka nasodo yanila bantuwo komuyu. Tukon kalu buno doiya kolua-luano singgat-singgat lineleani. 15#Tob. 16:18 Doi Kitab Moliyous lalomo totulis,
“Mian mo badaang kona buat,
aki nalobian,
tukon mian mo soisik kona buat,
aki nakakulangan.”
Titus tukon tula-tulano mo binotokon polaing-laing
16Babasal komai kinatauwan doi Mian Bisa sabab yana lapamo babayo Titus mopokakana kona mokolokotan tukon kami motulungiyo komuyu! 17Sabab Titus aki natolongo yase daanokene komai kakabi, bai mau yana kokolokot sulano natulungiyo komuyu luwedoi namongiasan susuungo tukon yana tataapenemo sulano nalubotiiyo komuyu. 18Polaing tukon yana kami kapatuwo komeeng koutus koidan mo inangga doi sasaibino kojemaat sabab kona limang babilitakene ko Bilita Monondok moluwedoi Mian Bisa. 19Tukon sangalaasan doiya, mianoo mobinantil lapamo ililik koidan tukon jemaat-jemaat tantukanggenemo sulano napolainggene kami doi mai ampakonan. Sabab kami kubaiyo komai ampakonan sulano mai pelenggene do potulungidoo, sulano ko Temeneno nainakabasal tukon sulano komuyu pokitayo baikon kami yase momotulungi.
20Kami badagai tutuuno sulano naakiyo komian mo asalakene kami doi halloo mai polongganano do potulungidoo mo babasal. 21#And. 3:4 Kami yase bajalanggon tukon moloyos bolikon tolongo doi Temeneno salaano, bai mau doi banggapi salaano koidan.
22Polaing-laing tukon Titus maka doi utusoo mobinantil, kami koidan kapatuwo komeeng koutus bailon. Kami lapamo ujio yana moimoiya luunggon tukon tokita yana sidutu yase motulungi. Tukon budodoiya, yana pololokono yase tulungiyo komuyu sabab yana oduduke kona moinian mo babasal doikoo. 23Tentang Titus, yana daano tulanggu, mo balimang tukon yaku motulungiyo komuyu. Tukon tentang doi utusoo molua, mo ampakon polaing yana, yaniladoo mian badaang jemaat-jemaat mo bintekene tukon teali binanggaakon doi Kristus. 24Kami moinikene komuyu pookitakene kopoo seang doi yanila sulano sasaibino kojemaat toiyo baikon komuyu seseange yanila tukon oila komo kami banggaalkene tentang komuyu doiya bisa tuuno.
Currently Selected:
2 KORINTUS 8: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
