2 KORINTUS 7
7
1Utus-utus mo kinilakon! Sasaibino do janjidoo tuuk doi kita. Tobikon doiya siokai kita nda bilisiiyo kobutonggita doi sasaibino komo kanggilitiyo konoanggita. Siokai kita matakutene ko Mian Bisa, sulano kita nda malaat tuboan motangalaas tuuk doi Yana tukon talakana.
Paulus nalabaan
2Potalimayo kami doi noamuyu lalomo. Kami akiyo komai sala doi meeng komian, tukon aki mai akakene komian. Kami aki mai mangala kauntungan mau doi indee miano. 3Yaku bantile buno doiya, bolikon kai yaku asalakene komuyu. Sabab buno doi yakudoo mo bantile loolukon, kami seseange tuuno komuyu, tukon kita nia tula-tulando potubokon pomatekon. 4Yaku daano daku paangga tuuno doi komuyu. Tukon yaku banggaal tuuk doi komuyu! Mau kai mai toupiyo kosusaan mobadaang konoanggu tohibul sabab komuyu. Konoanggu bisa-bisa molaba!
5 #
2Kor. 2:13
Salataa kami polong doi Makedonia, kami aki mai moola tadekene komai pakadakan. Doi sasaibino kolangge kami malaat susaan: doi langge bailon poonggeelekiyan, doi noano lalomo susuungo matakut. 6Bai kinatauwan, ko Mian Bisa sidutu ekeenggele doi mian mo putus asa konoano; Yana mokindendeke konoanggami tukon Titus nalubatan. 7Konoanggami tohibul bolikon kai tolongo Titus nalubatan, bai koidan sabab yana pelenggene bulaando konoano nasanaangan sabab komuyu. Yana bontiikene doi kami baikon komuyu poloon tuuno mopososuung tukon yaku; baikon komuyu sasaaliyo naikon kopoo kokubai loolukon tukon budodoiya yase belayo yaku. Doiya halloo tealikene yaku pololokon laba koidan.
8Mau kai daku sulat nakubaiyo susa konoamu, yaku aki kusasaaliyo motulise do sulatoo. Takainomo doiya kosinggatoo yaku kitayo daku sulatoo tealikene komuyu susa – mau kai natolongo soisik kopoo susaan mau kai yaku manasal koidan. 9Bai doiya budodoo yaku sanaang – bolikon kai sabab donoamuyudoo nasusaan, bai doiyamo posusaanoo tealikene tobolii kopoo kalakuan. Takainomo dopo susaanoo pokokonoi tukon Mian Bisa namongiasan. Jadi, kami aki mai olugiyo komuyu. 10Sabab do susaanoo mobuno doiya kohasilo noa natoboliian mo lubatene kokasalamatan. Tukon doi mian moaki namanasakene doiya langgedoo. Kobalino, dosusaanoo mo tolongo pokokonoi tukon banggapi namongiasan doiya kohasilo matean. 11Soba komuyu pokita-kitayo oila kohasilo doikoo dosusaanoo mo pokokonoi tukon Mian Bisa namongiasan! Kohasilo doiyamo komuyu tutuu kakaate sulano pokindeke modaano mokabul! Komuyu teali mosikitene kolalim, komuyu matakut, komuyu poloon, komuyu teali mokolokot, komuyu yase ukume komo sala! Doi sasaibino naiya soalia komuyu lapamo tudoikene baikon komuyu akiyo kopoo sala.
12Jadi, mau kai nalapamo yaku tulise do sulatoo, yaku tulise bolikon sabab do mianoo mo sala. Bolikon kai sabab domianoo mo sakisaa sabab do kasalaanoo. Yaku tulise do sulatoo sulano doi Mian Bisa salaano, komuyu susuumuyu sadaliyo bulaando kona babasalan kopoo palahatian doi kami. 13Doiyamo kosababpo tobikon konoanggami nasanaang. Sangalaasan dona sanaanganoo, kami lobi-lobian koidan sinanaanggon sabab kami kitayo Titus nasanaangan konoano; konoano sanaang sabab Utus sasaibino. 14Yaku takainomo lapamo banggal-banggaalkene komuyu doi yana. Kinatauwan, komuyu moaki kubaiyo mamaa yaku. Sasaibino komo biasa kami bantile doikoo doiya bisa. Bunomo koidan oila komo kami banggal-banggaalkene kaliangano komuyu doi Titus tokita bisa koidan. 15Budodoiya yana pololokono seange komuyu, sabab yana neneeke bulaando Utus sasaibino nayasano moloingiyo kona katuaiyano tukon bulaando komuyu potalimaano yana tukon odotiiyo tukon anggayo. 16Yaku sanaang tuuno, sabab komuyu moola inangga doi sasaibino kolangge.
Currently Selected:
2 KORINTUS 7: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
