2 KORINTUS 11
11
Paulus tukon rasul-rasul mokala
1Popataikanaku yaku kubabunokon mian molongas soisik. Moola, kai aki? 2Yaku peleenggene ikoo, pokakana ko Mian Bisa susuungo mopeleenggene ikoo. Komuyu pokakana komeeng kopau boine mo daano moliyous yaku mo lapamo teenggene sulano nainosowaanggon tukon meeng kona langkai, doiyamo Kristus. 3#Tea. 3:1-5, 13 Bai yaku balo sasaaki komu pikilan naikon tagoda sulano naakimo mumolole doi Kristus, pokakana Hawa loolukonoo tagoda doi bindadoo napandoiyan. 4Sabab buulangge komuyu tolongo sanaang motalimayo komian mo lubat doikoo tukon mongotunggul tentang Yesus bailon – bolikon Yesus kami mo otunggulikene doikoo. Tukon komuyu yase koidan motalimayo koroh tukon “bilita monondok” mo posasala tuuno tukon Mian Bisa Na Roh tukon Bilita Monondok mo sidutu komuyu talimayo doi kami.
5Yaku aki kulasaiyo molobian pende doi “rasul-rasul” mo bolikon langge tuuno! 6Kai yaku aki kupandoi basilingan, bai tentang motoiyan, yaku bolikon mian mobunggu. Doiya lapamo kami bukutiikanggene doikoo doi sasaibino kolangge.
7Doi tempodoo kubabilitakanano ko Bilita Monondok moluwedoi Mian Bisa tuuk doikoo, yaku aki kukubaiyo komuyu po ongkosiaku mau nabaino soisik; tukon nabuno doiya yaku kubaiyomo kobutonggu Teai pependekon. Yaku kubaiyo doiya sulano komuyu poinakatandak. Kai doiya meeng daku kasalaan doikoo? 8Doi tempodoo yaku leleaniyo komuyu, yaku anggota-anggota jemaat bailon komo ongkosiaku. Moola nabinantil baikon yaku olugiyo do anggota-anggotadoo sulano namoola yaku tulungiyo komuyu. 9#Flp. 4:15-18 Kalu doiya kosinggatoo yaku kakulangan, yaku aki nabiasa osusayo komeeng komian doi komuyudoo. Sasaibino komo yaku palaluuwo utus-utus mo lubat doi Makedonia komo sadiakene. Yaku dagaiyo mono-monondok sulano yaku aki kukubaiyo susa doi komuyu doi oilamo kolangge lalomo, tukon yaku momeenggon dagaiyo doiya sulano natataap buno doiya. 10Daku tanggaalania aki namoola inapusanggon mau doi yayaando doi posaapon kolipu doi Akhaya, sabab kootunggul Kristus mo bisa daano doi yaku. 11Bulaando yaku mobantile buno doiya? Kai sabab yaku aki kuseange komuyu? Mian Bisa toiyo yaku meseang!
12Oilamo komo yaku mo kubaiyo budodoiya naikon banggadudul yaku kubaiyo sulano “rasul-rasul” loo bailon akiyono kona poalasan sulano yanila naakaba-kabasale kobutongo tukon bantile baikon yanila balimang pokakana kami. 13Mian badaang mobuno doiya yaniladoo rasul-rasul mokala-kala. Yaniladoo polimang-polimang mo obuiyo komian tukon babunokon pokakana korasul-rasul Kristus. 14Aki nahinelanggon yanila nakubai buno doiya, sabab ko Ibiliis susuungo bapialung pokakana komalaekat momadialan! 15Jadi aki nasala koidan kalu ko Ibiliis napeleleani bapialung buno peleleani-peleleani mo lakukene ko Mian Bisa namongiasan. Kona pupusan yanila koidan naikon mantalima pabalos mo pokokonoi tukon sasaibino yanila nakokubai.
Paulus nasakisaawan salaku rasul
16Yaku kuwaikene koidan: Inai nadaano komo aanggene yaku bonggu. Bai kalu kai komuyu aanggene yaku buno doiya, po pataikene yaku mo bonggunia kubanggaal koidan soisik. 17Tuundu naiya yaku bantile daku banggaalan, bai bolikon Temeneno komo sumboliiyo yaku mobantile doiya. Doi hallia bisa-bisa yaku mobasalita buno mian mobonggu. 18Takainomo badaang komian mo banggaalkene kolangge-langge mopinandoikon doi dunia, jadi yaku yase mobanggal-banggaal koidan. 19Komuyu tukon noa sanaang sabal doi mian mo bonggu, sabab komuyu lasaiyo kobutongmuyu bunokai pandoi! 20Komuyu tongo pataikene kalu daano komian mokubaiyo ata komuyu, kabai momangala kauntungan doi komuyu, kabai lasayo kobutongo lobian kona tatandakan doi komuyu. 21Yaku mammaa moakuiyo baikon kami todudul mantalamuyuk mokubaiyo komo buno doiya.
Bai indee komian bailonggon momoola barani banggaalkene, mau yaku bai baranikene koidan! (Yaku basilingan buno mian mobonggu.) 22Yanila kai Ibrani miano? Mau yaku bai Ibrani miano. Yanila kai Israel miano? Mau yaku bai Israel miano. Abraham kai natulunan yanila? Mau yaku bai bunomo! 23#Kis. R. 16:23 Yanila kai Kristus napeleleani? Kona tololongolan yaku buno kabuso daku akal, bai yaku takainomo peleleani mo lobian kona monondokan tukon yanila sasaibinodoo! Yaku balimang kakabukuan liise yanila, yaku biasamo inusokon doi talungguan lalomo, yaku badaang luunggon kusinakisaa tukon kobailonggon adukono yaku mate. 24#Kua. 25:3 Limamo luunggon ko Yahudi miano nasakisaayo yaku tukon yanila umbase yaku tolu kolono sio luunggon. 25#Kis. R. 16:22, 14:19 Tolu luunggon ko Roma miano naumbasaku; biasa yaku sinakul tukon batu. Tolumo luunggon kutoupiyo kokapal nakoyol doi tobun, tukon idano kutala-talanto doi ndalangon tangano lua kolono sangkap kojam kolumbito. 26#Kis. R. 9:23, 14:5 Badaang luunggon kumongkubai ampakonan moberbahaya: yaku toupiyo kopaisu moeaba, mian mopondikuk, silakaan doi Yahudi miano mau mobolikon Yahudi miano, silakaan doi kota lalomo, silakaan doi kota tonggulungo, silakaan doi tobun tangano, tukon silakaan doi mian-mian mo bantile kobutongo montolitusan Salani miano banggokai bolikon. 27Yaku akabuse kobukunggu, tukon berjuang adukon mate: kobailon aki kumoolo, aki kukaan, aki kumonginum paisu, badaang luunggon kutongokoolo sabab yaku malaal, kanakon memel sabab akiyo daku pakean tukon akiyo daku bonua dungolan. 28Sangalaasan doiyadoo sasaibino, sasamba kooloyo yaku pikikene sasaibino kojemaat-jemaat nandondoong. 29Kalu daano komo mantalamuyuk mau yaku bai talalaing mantalamuyuk koidan. Kalu daano komo tuwong doi lalim lalomo, konoanggu pololokon susa.
30Jadi, kalu yaku sio banggaalkene kolangge meeng, maka doiya banggaalkene kolangge-langge mo okitakene daku kelemahan. 31Mian Bisa, Tama moluwedoi Temeneno Yesus toiyo baikon yaku aki kubakala-kala. Tanggaal kosambuno sidutu-posidutukon. 32#Kis. R. 9:23-25 Sambuno yaku daano doi Damsyik, gubernur mo balakuasa idoo doi Tomundo Aretas napamarentaan, sumboliiyo kona suludadu modagaiyo do kotadoo tataapono sulano napo lakoyo yaku. 33Bai tukon meeng kobois yaku inilul doi meeng kobuang doi betoonoo. Tukon buno doiya yaku moola luput doi gubernuroo limano.
Currently Selected:
2 KORINTUS 11: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
