2 KORINTUS 12
12
Inokitakon moluwedoi Mian Bisa tukon pokita Mian Bisa mo beekene doi Paulus
1Takainomo akiyo kolabano tuuk banggal-banggaalan. Bai yaku yase koidan mobanggal-banggaalkene kolangge-langge Mian Bisa mo okitakene doi yaku moluwedoi Mian Bisa nainokitakon kai doi kupokita lalomo. 2Yaku tingoniiyo komeeng ko Salani miano doi mo songulo sangkapoo kotaun mo lapamo linibakon doi lipu natatandakan doiyamo doi surgaa. (Yaku aki kutoiyo kai kobutongo bisa-bisa linibakon kai doiya tolongo meeng kopokita tolongo – Mian Bisa komo toiyo.) 3-4Yaku kuwaikene koidan: Yaku toiyo baikon naiya mian nia biningkat inusokon doi Firdaus. (Yaku aki kutoiyo kai kobutongo bisa-bisa mobiningkat kai doiya tolongo meeng daku pokita – tolongo Mian Bisa komo toiyo.) Indaa do mianoo lengele kolangge-langge mo aki namoola banggapi nabantile tukon koidan aki naminoolakon doi banggapi nabantile. 5Tentang doi mianoo doiya komo yaku yase banggaalkene, bolikon kai doi butonggu susuunggu. Tentang kobutonggu susuunggu, tolongo langge-langge mo okitakene daku kelemahan, doiyamo daku iniyas mobanggaalkene. 6Kalu ande-andeno yaku koidan yase mobanggaalkene kolangge meeng, yaku aki kuyase moteali buno mian mo bongakon mokala-kala; yaku naikon bantile komo kana. Bai yaku dagaiyo kobutonggu, sulano naakiyo komian mo aanggene yaku susuungiyomo dakubantilano oilamo kolangge mo lapamo yaku kitayo kai yana mo lapamo lengele yakudoo mobantile.
7Bai sulano naaki kutodudul banggal-banggaal sabab daku pokitadoo mo bolikon langge kona bisa-bisaan, yaku bineekon komeeng kolangge mobuno meeng kopanakit doi butonggu mo buno meeng ko Ibiliis naloloon. Do panakitoo mobineekon sulano nanale yaku sulano yaku naaki kuteali banggal-banggaal. 8Tolu luunggon kusambeang doi Temeneno sulano do panakitoo natoliat doi yaku. 9Bai ko Temeneno timbiliyo, “Yaku seange ikoo tukon doiya sukupo doikoo; sabab daku kuasa tokita tuuno kalu ikoo daano doi ndondoong molemah.” Doiyamo kosababpo yaku sanaang tuuno kalu tolongo yaku banggal-banggaalkene daku kelemahan-kelemahan, sabab kalu yaku lemaamo, maka doiyamo kosinggatoo daku lasaano ko Kristus naloolaingano yaku tukon nabukuanan. 10Jadi yaku laba tukon daku kelemahan-kelemahanoo. Yaku koidan laba sabab yaku mangangga doi Kristus maka kubinasalitakon lokis, yaku toupiyo kokasulitan, yaku binuluk-buluk tukon yaku toupiyo kokasukalan. Sabab kalu yaku lemah, maka doiya koidan kotempono yaku malaat bukuanan.
Paulus molilikene tentang mian badaang doi Korintus
11Bisa tuuno yaku mobabunokono mian mobonggu tuuno – bai komuyumo kai komo kubaiyo yaku buno doiya. Kona bisaan komuyumo komo sio ponggaalaku. Sabab mau kai yaku naakiyono koanggano oioila, yaku aki kukala doi “rasul-rasul” mo bolikon langge tuuno! 12Kolangge mominasaingdinggon tukon langge-langge mobolikon langge tukon limang-limang mo babasal lapamo inokitakon tukon sabal doikoo sulano natotingonii baikon yaku meeng korasul. 13Doi indee kai kolanggeno moaki popinalatikanggon, kalu pinookakanakon tukon jemaat-jemaat bailon? Paling-paling tolongo naiya langge nia: baikon yaku aki kukubaiyo susa komuyu sulano pookoniiyo yaku. Pomaafkanggene yaku doi kasalaanoo doiya!
14Naiya budodoo kotolunomo luunggon kubatotobo molubotiiyo komuyu. Tukon yaku aki kuyase mokubaiyo susa komuyu, sabab komo yaku yase tuuno bolikon kai pobuat, bai tolongo butomuyu. Sabab bolikon labuk-labuk komo mo umbolii onggos motuuk doi tamano-tinano, bai tamano-tinano komo mo umbolii onggos motuuk doi nalabuk-labuk. 15Tobikon doiya, tukon sanaang konoanggu yaku yase mokulbankanggene sasaibino daku langge tuuk doikoo, mau kai butonggu susuunggu. Kalu buno doiya yaku moseange komuyu, oilakai momoola komuyu naaki poseangaku?
16Nah, komuyu yase baikon yaku aki kubiasa kubaiyo susa komuyu. Mau kai nadaano komo bantile yaku nia pandoi; baikon yaku momalaat kauntungan doi komuyu sabab daku batipuan. 17Naando minoolakon! Kai luwedoi mian badaang yaku mo bintekene doikoodoo yaku biasa malaat kauntungan doi komuyudoo? 18Yaku lapamo sumboliyo Titus molubotiiyo komuyu, tukon yaku sumboliyo koidan koutusonggita Salani bailonggon mopolaing-laing yana. Oilakai Titus mangala kauntungan doi komuyu? Bai kami lua kami balimang tukon meeng komakisuut mo pokakana tukon kami ampakonggene tukon cara-cara mo pokakana!
19Takainomo komuyu aanggenemo kami salama nia kami daano mokakaate mobelayo kobutonggami terhadap doi komuyu? Komuyu sala tuuno! Mian Bisa toiyo baikon sasaibinodoo kami mo bantile doiya luwedoi Kristus namongiasan. Tukon sasaibino komo kami lakukene doiya sulano nabangune kopoo tuboan rohani. 20Yaku balo sasaaki naikon doi kulubotiiyano komuyu, yaku laate komuyu aki nabuno naikon doi yakudoo mo moinikene. Inai-inaikene nadaano komo ponggimakon, mopoabos noa, momoonas konoano, moutamakene kobutongo susuungo, mopobasalitakon doi nakulokisan, pokala-kalaakon, banggal-banggaal tukon banggalanggabut. 21Yaku matakut kalu-kalu daku lubatan naikon ko Mian Bisa ekependeyo yaku tukon yaku naikon kokiil sabab badaang doi komuyudoo komo daano kona lalim doi loolukonoo, moaki natobolii tukon aki natade mokubaiyo kokokubai-kokubai mo lokis, manggilit tukon aki napantas.
Currently Selected:
2 KORINTUS 12: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
