1 KORINTUS 9
9
Rasul nahaak-haak tukon nakawajiban-kawajiban
1Bolikon kai yaku mian mobebas! Bolikon kai yaku rasul? Kai baanggon yaku akiyoon kukitayo Yesus, nda Temeneno? Kai komuyu bolikon kulimang hasilo motuuk doi Temeneno? 2Kalu komian bailon aki naakuiyo yaku meeng korasul, mau nasoisik komuyu akuiyo doiya! Sabab komu tuboan Salani miano doiya bukutii baikon yaku meeng korasul.
3Kalu komian asalakene yaku, yaku timbiliyo buno naiya: 4Kai yaku aki kuberhak mantalima kinaan tukon paisu sabab daku balimangan? 5Kai yaku aki kuberhak babayo komeeng koboloki Salani miano napolaing-laing yaku doi kuampa-ampakonan, pokakana ko Temeneno Yesus utus-utuso nakinubai tukon doi rasul-rasul bailon, talalaing Petrus? 6Kabai tolongo yaku tukon Barnabas komo sinumbolii moumbal kinaan? 7Akiyo komeeng koanggota suludadu mo sio naokoniiyo kobutongo susuungo doi angkatan molobosidoo! Akiyo kopetani mo masakakon anggur doi nakombungoo maka naaki namakaan do angguroo hasilo doi nakombungoo! Akiyo kopototooli iyayon mo mopiala domba, maka naaki namonginum susu doi nadomba-dombadoo!
8Yaku pelenggene doiya bolikon tolongo berdasarkan mo biasa doi kupengalaman samba-samba kooloyo, bai sabab doi Kitab Moliyous lalomo linoolukonggon doiya langgedoo. 9#Kua. 25:4; 1Tim. 5:18 Doi Musa nabuku lalomo totulis, “Kosaapi mo daano pipike kogandum sulano natoliat gandumoo batuno doi kulito, inai nasinigot kobabano.” Do saapidoo kai komo Mian Bisa palatikanggene? 10Kabai doiya komo minakisuuti tuuk kita? Takainomo doiya totulis tuuk doi kita. Sabab komian mo limange kokombung tukon mian mo bilisiiyo kona gandum takainomo yana limange tukon moinikene namantalima soobos doi balimanganoo hasilo. 11#Rm. 15:27 Kami lapamo basabukon kalibuang rohani doi mutuboan lalomo. Maka kalu kami mantalima balakaat-balakaat doi pobuatoo, oilakai doiya koalatino kami tuntute todudul badaang doi komuyu? 12Kalu komian badaang bailon daano kona haak momoinikene naiya doi komuyu, bolikon kai kami komo lobian komai haak doi yanila?
Bai yaku akiyoon kugunakanggene do haakoo. Kobalino yaku yase tuuno motanggunge sasaibino kolangge kalu baino yaku mosumbetene komeeng kolangge mo sembange kobabilitakanano ko Bilita Monondok tentang Kristus. 13#Kua. 18:1 Utus tantu toiyo baikon komian mo balimang doi Mian Bisa Nabonua lalomo yanila mantalima kinaan moluwedoi Mian Bisa Nabonua. Tukon mian badaang mo uluse kososubakon abosano, yana malaat soobos doi sosubakonoo mo sinosubakon idoo. 14#Mat. 10:10; Luk. 10:7 Buno koidan ko Temeneno lapamo tantukene baikon komian mo babilitakene ko Bilita Monondok doiya sio namalaat kaanan doi nababilitaanoo.
15Mau kai naakiyoon naidan kupakeyo do haak-haakoo. Tukon yaku tulise naiya suratia bolikon kai koidan tukon makisuut sulano doiya hal-halloo nakinubaimo budodoiya doi yaku. Lobian monondok yaku mate kalu baino molapus langge mo yaku mobanggaalkenedoo. 16Sabab, kalu doiya tolongo soal babilitakene ko Bilita Monondok moluwedoi Mian Bisa, maka yaku aki kuberhak mobanggal-banggaal, sabab ko Mian Bisa lapamo bintekene yaku sulano kukubaiyo. Silakamo yaku, kalu yaku aki kubabilitakene ko Bilita Monondokoo! 17Umpamano yaku ampakonggene do limangoo moluwedoi kumongiasan susuunggu, maka yaku moola kumoinikene momalaat tambo. Bai yaku babilitakene do Bilitadoo mo Monondok sabab doiya pinalalu tuuno. Yaku Mian Bisa bintekenemo sulano kulimange doiya. 18Kalu buno doiya, oila daku tambo? Naiya kotambono: baikon yaku moola babilitakene ko Bilita Monondokoo aki kutonggungikene doi meeng komian sulano natamboyo yaku, sabab yaku aki kutuntute daku haak-haak buno meeng kopopolonggon Bilita Monondok.
19Yaku nia bolikon indee miano naata; yaku bebas. Mau kai nabuno doiya, yaku lapamo tealikene kobutonggu nia ata doi sasaibino komian. Yaku lakukene doiya sulano kumoola manangkanggene komian badaang tuuk doi Kristus. 20Komo doi Yahudi miano, yaku babunokon Yahudi miano sulano kumoola manangkanggene ko Yahudi miano tuuk doi Kristus. Komo doi mian-mian mo tubo mololoiyo Musa naukum, yaku babunokon buno kai mian motokooton doi ukumoo, mau kai yaku kona tutuuwan aki kutokooton doi ukumoo. Yaku kubaiyo doiya sulano kumoola kedele yanila nateali Kristus napololaing. 21Komo bolikon Yahudi miano, yaku babunokonggon meeng komian mobolikon Yahudi miano, mo tubo aki naloingiyo Musa naukum. Yaku kubaiyo doiya sulano yaku moola kedele yanila nateali Kristus napololaing. Bai doiya akiyo koalatino baikon yaku aki kumolole doi Mian Bisa naparenta-parenta; bai yaku kinuasai Kristus naparenta-parenta. 22Doi mian mo aki namoonggol kona manganggaan tanga-tangano, mau yaku kai babunokonggon buno meeng komian kona manganggaan mo aki namoonggol sulano yaku moola kedele yanila nateali pololaing Kristus. Pendeknya, yaku teali doi sambu-sambu tuuk doi sasaibino komian sulano mau nabulaando kololoono koidan bai yaku moola salamatene kosoobos doi yaniladoo.
23Sasaibino doiya yaku lakukene tuuk doi Bilita Monondokoo moluwedoi Mian Bisa, sulano mau yaku talalaing binalakaati. 24Utus toiyo baikon doi tandingan lalomo sasaibino komo malaing yanila obulen, bai tolongo meeng komian komo malaat tambo. Tobikon doiya poobuleng buno doiya sulano Utus malaat tambono. 25Doi meeng komian mo daano doi latihan lalomo, yana dagaiyo kobutongo doi sasaibino kolangge. Yana lakukene doiya sabab yana yase nainooni tukon inoon bunga doi namalaatan nomol, doiyamo bunga mo tolongo soisik kotempo molooyumo. Bai nai kita nia dagaiyo kobutonggita doi sasaibino kolangge sabab kita yase nda ininooni inoon bunga mo aki naikon namolooyu. 26Doiyamo kosababpo yaku obulen tukon makisuut mo tantu. Buno doi tandingan popukulan, yaku aki kubapukul sabalangan. 27Yaku latiyo kobutongo tukon kakabukuan sulano namoola yaku kuasaiyo. Yaku kubaiyo buno doiya, sabab yaku aki kuyase napolong teali baikon nasambuno yaku tobiyo komian bailon namalaing doi tandinganoo lalomo, yaku susuunggu tinolak.
Currently Selected:
1 KORINTUS 9: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
