1 KORINTUS 8
8
Kokaliangano kinaan mo bineekon pokakana komeeng kososubakon doi bapilogotan
1Budodoiya kaliangano kokinaan mo bineekon pokakana komeeng kososubakon doi pilogot. Takainomo bisa buno mian nabantilano, “Kita sasaibino pandoimo.” Bai pandoiyan mokubaiyo komian teali banggal-bangaal, sabea kai koseang mobangune komian butongo. 2Mian mo aanggene baikon yana badaang kona tinoi, kona bisa-bisaan akiyoon natoiyo komo bisa-bisa tuuno. 3Bai komian mo bisa-bisa seseange ko Mian Bisa, yana Mian Bisa tingoniiyo.
4Kokaliangano soal kaanano kokinaan mo lapamo sinosubakon doi pilogot, kita toiyo baikon kobapilogotan balaanggene kolangge-langge mo aki nabisa-bisa tukon mo akiyo. Tukon kita toiyo koidan baikon ko Mian Bisa tolongo meeng; akiyo kobailon. 5Takainomo badaang koidan komo binantil ilah tukon temeneno; mau komo daano doi timbu mau komo daano doi dunia bungkukono. 6Bai doi kita, ko Mian Bisa tolongo meeng. Yana Tama mo tealikene sasaibino kolangge. Tolongo doi Yana konda tuboan. Tukon ko Temeneno tolongo meeng koidan, doiyamo Yesus Kristus. Luwedoi Yana sasaibino kolangge tinealikon, tukon sabab doi Yana maka kita malaat tuboan.
7Mau kai nabuno doiya, aki nasasaibino komian toiyo doiya langgedoo. Daano komo loolukon biasa sosubaiyo kopilogot. Jadi, tobikon doiya polong doiya budodoo yanila daano molasae baikon kokinaan, mo lapamo sinosubakon doi pilogot, doiya kinaan bapilogotan. Maka kalu yanila kaane doiya kinaanoo, yanila lasaiyo baladosa; sabab yanila namanganggaanoo akiyoon namoonggol. 8Kona bisaanoo doiya kinaanoo susuungo aki nakubaiyo pootamikene kita tukon Mian Bisa natealikene lobian konda pokilakonan. Kalu kita kaane doiya kinaanoo, kita aki nda malaat oioila kountungo. Koidan kalu kita aki nda kaane doiya kinaanoo mau kita aki nda lugi oioila.
9Bai, pobadagai! Inai nasampe teali baikon komian bailon teali baladosa – sabab kona manganggaan akiyoon namoonggol – sabab Utus bebas mokubaiyo kooioilamo. 10Daku makisuut buno naiya: Andeno Utus, komo moonggolo komu manganggaan, daano moosulang kaan doi balambeaan. Doibundu daano komeeng komian mokitayo Utus moosulang kaan doi balambeaanoo. Kalu do mianoo kona manganggaan akiyoon namoonggol, bolikon kai naapa doiya kubaiyo do mianoo baranikene kaane dokinaanoo mo lapamo bineekon doi pilogotoo? 11Tukon tobikon doiya, maka Utus namanganggaan tealikene do mianoo namanganggaan mo akiyoon namoonggol teali tapa. Banggokai Kristus mate tuuk do mianoo koidan. 12Tukon kalu Utus mongkubai kasalaan mobuno doiya doi utus-utus Salani miano – doiya Utus lusake yanila namanganggaan mo daano lemah – maka Utus baladosa doi Kristus. 13Doiyamo kosababpo, kalu kokinaan mangaanikene koutusonggu baladosa maka yaku akimo kumakaan sail koidan. Sabab inai-inaikene koutusonggu baladosa sabab yaku.
Currently Selected:
1 KORINTUS 8: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
