1 KORINTUS 10
10
Poingotii tentang kopilogot
1 #
Tob. 13:21-22, 14:22-29 Utus-utus! Utus siokai muneneeke oila komo tealimo doi nda tulunanoo salataa yanila nalaingano Musa. Yanila sasaibino linolaing tukon bunom, tukon polong salamat yanila mopintosiiyo ko Tobun Memela. 2Sulano nateali Musa napololaing-pololaing, yanila sasaibino sinau doi bunom lalomo tukon doi tobunoo lalomo. 3#Tob. 16:35 Yanila sasaibino makaan kinaan rohani mo pokakana, 4#Tob. 17:6; Bang. 20:11 tukon monginum paisu rohani mo pokakana. Yanila sasaibino monginum paisu doi bungkuko batu rohani mo loolainge yanila; do bungkukodoo batu doiyamo Kristus susuungo. 5#Bang. 14:29-30 Mau nabuno doiya, Mian Bisa aki nasanaanggene kosoobos mobadaang doi yaniladoo, tukon doiyamo kosababpo yanila bajan-bajano tasabukon doi padang gurun.
6 #
Bang. 11:4
Sasaibino doiya teali sontoh doi kita, tuuk ingotiikene doi kita sulano inai memeetene kolangge-langge mo lokis mobuno yanila. 7#Tob. 32:6 Koidan sulano kita inai nda sosuba doi pilogot buno soobos doi yanila nakinubai. Doi Kitab Moliyous lalomo totulis, “Maka bangsadooila tambuuno kaan inum, tukon osuleng sosubaiyo kopilogot.” 8#Bang. 25:1-18 Kita aki namoola kubaiyo kolangge-langge mo lokis buno yaniladoo soobos nakinubai. Sabab, lua kolono tolu koloon komian doi yaniladoo komo mate doi meeng kooloyo sabab yanila kubaiyo doiya. 9#Bang. 21:5-6 Kita aki namoola soba-sobayo ko Temeneno buno yanila soobos mo kubaiyo loolukonoo, tobikon yanila mate tinukuk binda moupason. 10#Bang. 16:41-49 Kita aki namoola koidan mondommuk; pokakana komo kinubai doi yaniladoo soobos, tobikon yanila inakate Malaekat Matean.
11Sasaibino doiya langgedoo teali doi yanila sulano nateali sontoh doi mian badaang bailon. Tukon sasaibino doiya totulis koidan teali tondoon doi kita. Sabab kita tubo budodoiya doi lounu napupusan.
12Mian mo akuiyo kobutongo kokondong doi moonggolan, siokai nabada-nabadagai; inai nabaino yana otuwong. 13Samba-samba kosobaan Utus mo toupiyo doiya daano meeng kosobaan mo biasa banggapi toupiyo. Bai ko Mian Bisa molole doi perjanjian. Yana aki nabatadikene Utus sinobai lobian doi mominoolakon. Salataa Utus malaat sobaan, yana beena loloon doikoo sulano muteali bukuan tukon sulano Utus namoola bataanggon.
14Tobikon doiya, Utus-utus yaku mo seange, siokai komuyu pomosikitene kososubaan doi pilogot. 15Yaku bantile doi komuyu buno mian mo pandoi. Siokai komuyu susuungo potimbongiiyo nia kubantilan nia. 16#Mat. 26:26-28; Mrk. 14:22-24; Luk. 22:19-20 Salataa doi nda monginuman anggur tukon mangkabi kinatauwan doi Mian Bisa, bolikonoo doiya naotudoikanano baikon kita pomeenggon tukon Kristus doi namatean lalomo? Tukon doi tempodoo nda obos-obosano koloti sulano nda kaane posinggat-singgat, bolikonodoo doiya otudoikene baikon kita pomeenggono doi Kristus butongo? 17Sabab tolongo meeng koroti tolong, tukon kita sasaibino kaane dorotidoo mo meeng, maka naiya kita nia mo badaang buno meeng komian butongo.
18 #
Basam. 7:6
Soba palatikanggene ko Yahudi miano. Yanila mo kaane kokinaan mo sinosubakon doi basosubakonan bungkukono, doiya mian-mianoo pomeenggon do tampatoo. 19Oila daku minakisuuti tukon doiya? Bapilogotan kai kinaan mo sinosubakon doi pilogotoo akiyo koalatino. 20#Kua. 32:17 Oilamo komo sinosubakon doi tampatoo basosubakonan motuuk doi pilogot aki nasinosubakon doi Mian Bisa, bai tolongo doi ibiliis. Tukon yaku aki kuyase komuyu mopomeenggon tukon ibiliis. 21Komuyu aki namoola monginum anggur doi Temeneno nagalaas tukon pososinggatene koanggur doi ibiliis koidan nagalaas. Komuyu aki namoola kaan doi Temeneno nameja, tukon koidan doi ibiliis nameja. 22#Kua. 32:21 Kabai kita yase kubaiyo sulano ko Temeneno namasakit konoano? Kai kita lobian konda bukuanan tukon Temeneno?
23 #
1Kor. 6:12
Komian nabantilan, “Kita moola nda kubaiyo oila konda iniyas.” Bisa! Bai aki nasasaibino doi kita mo yase kubaiyo daano kogunano. “Kita moola kubaiyo oilamo konda iniyas” – bai aki nasasaibinodoo kita mo yase bangune konda tuboan. 24Inaikai nadaano komeeng komian mobalajuang motolongo tuuk nakopontingan susuungo. Memeeng komian siokai nabalajuang tuuk doi mian bailon nakopontingan.
25Komuyu moola pokaane kosail oilamo komo binalukon doi labotan sail. Mau naaki posolidikiyo loolukon, mau kai nadaano kopo sasaaki doi noamuyu lalomo. 26#Sad. 24:1 Sabab doi Kitab Moliyous lalomo totulis, “Naiya dunia nia tukon sasaibino koantoko doiya Temeneno koona.”
27Kalu komuyu kinolo kaan luwedoi meeng komian mo bolikon Salani miano, tukon kalu komuyu talimayo do pokolodoo, pokaanemo oila komo sinidokiikon doikoo. Mau naaki posolidikiyo inaando kona luwean doiya kinaanoo, sulano naakiyo kosasaaki doi noamu lalomo. 28Bai kalu daano komo bantile doikoo, “Naiya kinaan nia lapamo sinosubakon doi pilogot,” inaikai mokaane doiya kinaanoo, sabab komuyu palatikanggenemo doiya mianoo nakopontingan tukon doi noamuyudoo lalomo naboti-botikan. 29Daku makisuut bolikon noamu naboti-botikan bai do mianoo noano naboti-botikan.
Tantu daano komo mansadai, “Ah, bulaando daku mongiasan motolongo mian bailon noano nakokila komo popookiyo? 30Kalu yaku makaan kinaan tukon bakinatauwan doi Mian Bisa, bulaando komian mosalakene yaku mokaane do kinaanoo, sabea kai yaku lapamo bakinatauwan doi Mian Bisa?”
31Oilamo Utus nakinubai – Utus makaan kabai monginum – kubaiyomo sasaibino doiya tuuk doi kabasalano ko Mian Bisa sambuno. 32Mutubo babunokon doiya, sulano Utus aki mukubaiyo komian bailon teali baladosa; kai doi yaniladoo Yahudi miano kabai bolikon Yahudi miano, kabai Mian Bisa najemaat. 33Potubo pobabunokon yaku. Yaku kakaate mosanaanggene sasaibino komian noano doi sasaibino kolangge, akiyo komakisuut-makisuut kopontingan butongo susuungo. Daku tujuan sulano yanila sasaibino namoola sinalamaton.
Currently Selected:
1 KORINTUS 10: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
