1 KORINTUS 7
7
Masadaiyan boine atulano
1Budodoiya yaku yase basilingan kokaliangano soal-soal komuyu mo bantile doi posurat lalomo. Kalu meeng komala-malane aki naosowaan, doiya monondok. 2Bai sulano naaki natogoda sulano naaki nakubaiyo kolangge-langge mo aki namoola, lobian monondok memeeng komala-malane tadukai nadaano kona boloki susuungo tukon memeeng koboine sio nadaano kona langkai susuungo. 3Kolangkai sio nalakukanggene kona kawajiban buno meeng kolangkai doi naboloki, tukon koboloki sio nalakukanggene kona kawajiban buno meeng koboine doi nalangkai; memeeng sio nalakukene kona kawajiban doi bailon. 4Koboloki aki nakuasaiyo kobutongo susuungo; komo kuasaiyo kobutongo doiyamo nalangkai. Bunomo koidan kolangkai aki nakuasaiyo kobutongo susuungo; komo kuasaiyo kobutongo doiyamo naboloki. 5Inai napoalaas meeng tukon doi bailon doi babolokian tukon balangkaiyan. Moola kalu tongo soisik kotempo, asal suwe-suwele lapamo potoikon. Tukon kalu buno doiya memeeng moola sambeang tukon aki nataganggu. Bai doibundu, siokai komuyu po pokoolanikon koidan buno meeng kolangkai boloki. Kalu aki nabuno doiya, komuyu naikon loloiyo koibiliis nabudukan, sabab komuyu aki pobukuan motaane kopoo moot.
6Yaku bantile naiya bolikon buno meeng kopalenta, bai meeng kootinau. 7Kona tutuuwan yaku lobian yase kalu sasaibino komian teali buno yaku. Bai memeeng lapamo mantalima karunia mo tantu moluwedoi Mian Bisa. Meeng komian mantarima nakarunia nia, kobailon daano kona karuniadoo.
8Doi mian badaang mo akiyoon naosowaan tukon doi boi-boine mo balu, naiya daku otinau: Lobian monondok kalu Utus tataap tubo susuumu buno yaku. 9Bai kalu Utus aki mumoola taane komu moot, Utus tadukai muosowaan. Sabab lobian kona monondokan kalu Utus osowaan kalu mobaino komu moot tokumbe-kumbe. 10#Mat. 5:32, 19:9; Mrk. 10:11-12; Luk. 16:18 Doi yanila mo lapamo osowaan, naiya daku palenta: (Kona tutuuwan bolikon yaku komo mebee naiya palenta nia, bai Temeneno.) Meeng koboine mo lapamo osowaan inai nabauntale kona langkai. 11Bai kalu yana bauntalemo, yana sio natataap aki naosowaan, kabai sulaiyo dona langkai. Tukon meeng kolangkai aki namoola bauntale kona boloki. 12Doi bai-bailonggon daku otinau doiyamo: – naiya kuotinau susuunggu, bolikon Temeneno – kalu meeng ko Salani miano mangala meeng koboine mo aki namangangga doi Kristus, tukon kona boloki yase tubo tukon yana, do mianoo aki namoola bauntale dona bolokidoo. 13Tukon kalu meeng koboine Salani miano mangala langkai meeng komalane mo aki namangangga doi Kristus, tukon dona langkaidoo yase tubo tukon yana, maka do bolokidoo aki namoola bauntale dona langkaidoo. 14Sabab dolangkaidoo mo aki namangangga minoolakon sulano nateali Mian Bisa namian sabab dona poalaanoo tukon boloki mo lapamo teali Mian Bisa namian. Bunomo koidan boloki mo aki namangangga minoolakon sulano nateali Mian Bisa namian, sabab dona poalaanoo kolangkai mo lapamo teali Mian Bisa namian. Kalu aki nabuno doiya, yanila napau-pau tantu pokakanamo komian moaki namangangga napau-pau, banggokai do pau-paudoo inaanggon buno Mian Bisa namian. 15Bai kalu do mianoo mo aki namangangga bauntale kona boloki kai nalangkai mo Salanimo, inai mopantane yana. Doi langge nia Utus boine kabai Utus malanedoo bebas, sabab ko Mian Bisa yase sulano Utus tubo tukon monondok. 16Sabab Utus meeng koboloki – mo manganggamo doi Temeneno – bulaandokon kai Utus momoola toiyo tukon tutuu baikon Utus aki namoola salamatene komu langkai? Bunomo koidan Utus meeng kolangkai Salani miano, bulaandokon kai Utus motoiyo tukon tutuu baikon Utus aki namoola salamatene komu boloki?
Tubo pokakana Utus linolaing Temeneno
17Siokai memeeng atule kona tuboan loloiyo ko Mian Bisa nalolaingano buno mo lapamo Mian Bisa tantukene doi yana singgatoo Mian Bisa nauangano sulano namangangga doi yana. Doiyamo koatulan yaku mo otunggukene doi samba-samba kojemaat. 18Umpamano, kalu meeng komian lapamo sinunat salataa yana mantalima ponguang doi Mian Bisa, maka inai do mianoo nakakaate sulano akiyenggene do tanda-tanda sunatoo. Bunomo koidan kalu meeng komian akiyoon nasinunat salataa yana mantalima ponguang doi Mian Bisa, inai do mianoo nakabiyo nasinunat. 19Sabab mololoi koatulan basunatan kai aki nda mololoi kolua-luanodoo akiyo koalatino oioila. Komo penting tolongo nda loloiyano kopalenta-palenta Mian Bisa. 20Siokai namemeeng komian natataap tubo doi nandondoong lalomo buno tempodoo yana namantalimaan Mian Bisa naponguang. 21Kalu salataa Utus inuang, Utus daano komeeng kona ata, mau naaki Utus-utus nasusa-susa mopikikene doiya langgedoo. Bai kalu Utus naikon malaat todanan sulano teali bebas, pakeyomo doiya todananoo. 22Sabab meeng koata mo lapamo mangangga doi Temeneno, doiya Temeneno namian mo bebas. Tukon meeng komian mobebas mo mangangga doi Temeneno, doiya Kristus napeleleani. 23Mian Bisa lapamo oliyo Utus tukon lapamo botol koolino. Tobikon doiya, inaikai Utus mobeekene kobutomu sulano nateali banggapi naata. 24Jadi, Utus-utus, bulaando komu ndondoong doi tempodoo inuang, siokai Utus natataap tubo buno doiya polaing tukon Mian Bisa.
Doi mian-mian mo akiyoon naosowaan tukon balu-balu
25Budodoiya kokaliangano doi mian-mian mo akiyoon naosowaan. Kokaliangano doiya langgedoo, yaku aki kumantalima parenta-parenta moluwedoi Temeneno. Mau kai nabuno mian mo tongo Temeneno namaasi moola nainangga, yaku yase beena otinau.
26Nda neneeke sasaibino kosusaan naiya budodoo, yaku lasayo lobian kona monondokan kalu komian tataap loloiyo kona tuboan buno kona tuboan budodoo naiya. 27Kalu Utus daanomo komu boloki inaikai mokakaate mopobauntal tukon domo bolokidoo. Kalu Utus akiyoon muyase osowaan, tadukai naaki mumounggolii boloki. 28Bai kalu Utus osowaan, doiya bolikon lalim. Bunomo koidan kalu meeng koboine osowaan, koalatino yana aki nabaladosa. Tolongo, doi yaniladoo mo osowaano badaang kosusaan konapo sinasalaan. Tukon yaku yase Utus tongosodii doi susaan-susaanoo.
29Daku makisuut buno naiya, Utus-utus: Kita akimo nabadaang konda tempo. Atambuunemo budodoiya, doi meeng-meeng komian mo daanomo kona boloki siokai natubo adukon buno mian moakiyo kona boloki; 30mian mo kokiil, tubo adukon buno yana aki nasusa konoano; mian mo kokumbit adukon buno yana aki nalaba-laba; mian mo lapamo mongoli, adukon buno yana akiyo kona oioila; 31tukon mian mo balimang doi langge-langge dunia, siokai natubo adukon buno yana aki napopusinggon doiya langge-langgedoo. Sabab akimo namalumbit naiya dunia nia, doi ndodoongo mo buno naiya, naikon lapus!
32Yaku yase sulano Utus nabebas doi susaanoo. Komian mo akiyo kona boloki yana ettenge kona pikilan doi langge-langge kokaliangano Temeneno, sabab yana yase sanaanggene ko Temeneno. 33Bai komian mo daanomo kona boloki badaang kona pinikikon doi langge-langge nai dunia nia, sabab yana yase sanaanggene kona boloki noano; 34kona sabab napikilan tongobos-oboso. Meeng koboine mo akiyo kona langkai, kabai meeng kopau boineno, naikon badaang kona pinikikon langge-langge kaliangano Temeneno, sabab yana yase sulano kona jiwa tukon butongo nateali Mian Bisa namian. Bai meeng koboine mo lapamo daano kona langkai, kona pikilan ettenge doi langge-langge nai dunia nia, sabab yana yase sanaanggene kona langkai noano.
35Yaku tulise sasaibino doiya tuuk doi mumonondokan susuumu, bolikon komakisuuto linalanggon naiya tukon linalanggon doiya. Komo yaku yase tolongo sulano Utus nakubaiyo komo kana tukon mo bisa, tukon sulano Utus namoola ettenge komu pikilan doi Temeneno.
36Kalu memeeng komian lasayo aki naampakonggene komo bisa doi nabibiyan, kalu yana aki namoola taane kona moot, tukon yana yasemo poala do boinedoo, tadikenemo yana nakubaiyo oilamo kona linasa mo monondok. Yana aki nabaladosa, kalu yana poalamo. 37Bai kalu memeeng komian lapamo mongkubai kaputusan doi noano lalomo sulano naaki naosowaan tukon kona bibiyan tukon dona kaputusanoo aki napakisaayo, maka doiya nakinubaidoo monondok, asal yana kubaiyo tukon doi nasanaangan. 38Kona tutuuwan, mian mo osowaan monondok kona kokubai, tukon mian mo aki naosowaan lobian monondok kona kokubai.
39Meeng koboine mo lapamo osowaan yana tokooton doi langkai bai tolongo kalu dona langkaidoo daano motubo. Kalu kona langkai matemo, do boinedoo bebaso osowaan koidan tukon mian bailon yana mo yase; asal dona osowaananoo baasowaanan Salani. 40Bai yana naikon lobian untung kalu akimo naosowaan koidan. Doiya kupandapat susuungu, bai yaku lasayo baikon doi yakudoo mobantile doiya tukon kuasa Mian Bisa Na Roh.
Currently Selected:
1 KORINTUS 7: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
