1 KORINTUS 6
6
Makalaakonan utus doi pangadilan
1Bulaandokon modaano doi komuyudoo komo barani ampakon doi hakim mo aki natoiyo ko Mian Bisa, sulano nakalaakene koutusonggita mopomeenggon manganggaan, kalu yana daano kona posalakonan tukon do utusoo? Bulaando yana aki nakabiyo doi Mian Bisa namian nauluse doiya palakaladoo? 2Oilakai komuyu aki potoiyo baikon ko Mian Bisa namian moola adiliyo nadunia nia? Jadi, kalu komuyu moola adiliyo nadunia nia, kai komuyu aki naikon pomoola uluse dopalakala-palakala pangadilanoo mo akiyo koalatino? 3Oilakai komuyu akipo toiyo baikon kita naikon adiliyo komalaekat-malaekat? Lobi-lobian koidan perkara-perkara natuboan samba-samba kooloyo! 4Maka kalu sumbut koperkara-perkara mobuno doiya, kai naikon komuyu kalaakene doi mian mo akiyo kona limang doi jemaat lalomo? 5Bisa-bisa tolongo mongkubai maa! Tantu doi komuyudoo daano meeng komian mo cukup kona pandoiyan momoola alapayo koulusano doi utus-utus sasaibino mo Salani miano napoliitonan! 6Bai kobalino meeng ko Salani miano ampakon doi mian mobolikon Salani miano sulano nakalaakene kona perkara doi utusoo mo Salani!
7Mau naaki naampakon popalakalai doi mian mobolikon Salani miano; modaano kopoliitonan doi komuyudoo doiya bunomo meeng kona salaan doi komuyu. Lobian monondok kalu komuyu kinubai aki naadil, kabai inolugi! 8Bai komuyu susuumuyu komo kubaiyo komian bailon tukon aki naadil. Komuyu susungo koidan mo olugiyo mian bailon. Tukon doiya komuyu kubaiyo doi utus-utusonggita mopomeenggon manganggaan! 9Komuyu kai toiyo baikon komian badaang mo aki naloingiyo ko Mian Bisa namongiasan, aki nateali Mian Bisa namian? Inai potongokolii! Mian badaang molokis kona kokubai, mian badaang mo ososubaiyo kopilogot, mo basinduwa, mo kubaiyo kokokubai mo minamaakon doi tulano malane susuwele kabai boi-boine susuwele, 10mo pondikuk, mo modoko, nggolonguwon, mo yase lokis-lokise komian bailon, tukon mo olugiyo komian bailon – sasaibino mian mobuno doiya aki naikon nateali Mian Bisa namian. 11Daano komoimoiya doi komuyudoo loolukonoo kona kokubai buno doiya. Bai budodoiya komuyu inokitakonggon bilisiimo doi polalim. Komuyu lapamo teali Mian Bisa namian mo tangalaas. Komuyu lapamo pokindokon koidan ko Mian Bisa, sabab komuyu anggayomo Yesus Kristus tukon sabab kuasa Roh moluwedoi nda Mian Bisa.
Pakeyo kobutomu sulano mumuliakene ko Mian Bisa
12 #
1Kor. 10:23
Daano komo bantile baikon meeng-meeng komian moola kubaiyo sasaibino kolangge. Bai kalu yaku aki nasasaibino daano kogunano. Jadi mau kai nasasaibino moola kukubaiyo, bai yaku aki kupataikene kobutonggu nakinuasai mau oioilamo. 13Daano koidan komo bantile baikon kokinaan tuuk doi mian tiano, tukon komian tiano dinaanokon tuuk doi kinaan. Bai kolua-luanodoo naikon Mian Bisa akiyenggene. Kobanggapi butongo aki namoola pinake mokubaiyo kolangge mo lokis, bai tolongo tuuk leleaniyo ko Temeneno. Tukon ko Temeneno pialayo do butongoo. 14Mian Bisa lapamo otuboiyo Yesus doi namatean, bunomo koidan ko Mian Bisa naikon otuboiyo kita tukon Nakuasa.
15Utus-utus toiyo baikon kobutomu daano anggota Kristus butongo. Jadi, moola kai kumangala komeeng koanggota Kristus butongo maka kutealikene meeng koanggota balolowa butongo? Doiya aki nateali! 16#Tea. 2:24 Kabai ugaate komuyu akiyoon potoiyo baikon komian mo posombuli tukon meeng komian mobalolowa, teali pomeenggon tukon do mianoo mobalolowa! Sabab doi Kitab Moliyous lalomo totulis, “Kolua-luano teali meeng.” 17Bai komian mo pomeenggono kobutongo tukon Temeneno, ko Temeneno Na Roh tukon do mianoo naroh teali meeng.
18Podedeenggene kokokubai-kokubai mo lokis, sabab sasaibino kolalim bailon komian mo kubaiyo, teali bolikon doi mianoo butongo. Bai komian mo mongkubai langge mo lokis, koalatino mongkubai lalim doi butongo susuungo. 19#1Kor. 3:16; 2Kor. 6:16 Komuyu sio potoiyo baikon kobutomuyudoo Mian Bisa Na Roh nadungolan. Do Rohdoo dungol doi komuyu. Tukon Mian Bisa susuungo komo beekene do Rohdoo doi komuyu. Utus butongo bolikon koomu. Doiya Mian Bisa koona. 20Ko Mian Bisa lapamo oliyo komuyu tukon lapamo beale botol. Tobikon doiya, pakeyo kobutomu mono-monondok sulano ko Mian Bisa nakinabasal.
Currently Selected:
1 KORINTUS 6: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
