1 KORINTUS 16
16
Potombonii motuuk doi tulanggita Salani miano
1 #
Rm. 15:25-26
Budodoiya kokaliangano doy bantuan komuyu mo salakanggene doi tulamuyu Salani miano, yaku bontiikene doi komuyu sulano pokubaiyo napokokonoi koalal yaku mo beekene doi jemaat Galatia. 2Doi oloyo komeengo samba-samba kominggu, siokai Utus-utus sasaibino pomangabos doy, susuwele napokonoikene kona pandapatan. Poabese doiya doydoo polong yaku lubat, sulano laate doiya kosinggatoo akimo napalaluu kinombul koidan. 3Siokai kulubato, maka kumosumbolii mian-mian mo lapamo komuyu sotujuiyo. Yaku naikon beena doi yanila surat kuasa, sulano yanila nababayo do doydoo bantuan doi Yerusalem. 4Tukon kalu natokita monondok baikon mau yaku ampakon koidan tukon yanila, maka yaku naikon ampakon polaing yanila.
Paulus natetel
5 #
Kis. R. 19:21
Yaku naikon lubotiiyo komuyu kalu lapamo yaku lupaiyo ko Makedonia, sabab yaku batetel mosampu indaa. 6Moola kai yaku naikon dungol bubula kooloyo tukon komuyu, ugaate napoolapakon koudan tempono. Lapa doiya komuyu moola tomboniiyo yaku banggadudulkene daku ampakonan doi lipu bailon. 7Yaku aki kuyase lubotiiyo komuyu tolongo sampukon balang. Kalu ko Temeneno pataikene, yaku yase dungol adukon malumbit tukon komuyu.
8 #
Basam. 23:15-21; Kua. 16:9-11 #Kis. R. 19:8-10 Naiya budodoo yaku daano modungol doi kota nia, doi Efesus polong kooloyo Pentakosta. 9Badaang kotodanan naimbaa doi balimangan-balimangan mo daano kogunano, mau kai nabadaang komian mo tumbak-tumbak.
10 #
1Kor. 4:17
Kalu Timotius lubat, potalimayo yana tukon monondok sulano yana lasayo monondok tukon komuyu, sabab yana bunomo yaku koidan mobalimang tuuk Temeneno. 11Inai sampe daano komo pandange enteng yana. Potomboniiyo yana sulano namoola banggadudulkene kona ampakonan abali doi yaku tukon salamat, sabab yaku totiiliyo kona lubatan tukon utus-utus bailonggon.
12Kokaliangano doi utusonggita Apolos, lapamo moimoiya luunggon kupailukene yana sulano yana napolaing koutus bailon mo ampakon lubotiiyo komuyu. Bai yana akiyoon nayakiniyo baikon yana sio naampakono naiya budodoo. Mau nabuno doiya kalu daano kotodanan naikon, tantu yana lubat.
Sulat napupusan
13Siokai komuyu pobadagai tukon pokokoonggol doi potuboan lalomo buno Salani miano. Potindokiiyo tukon barani tukon poteali bukuan. 14Sasaibino kopo kinubai, pokubaiyo tukon seang.
15 #
1Kor. 1:16
Utus tantu toiyomo Stepanus tukon nakaluargaa; yanila kotumbe-tumbeno mo teali Salani miano doi Akhaya. Yanila tukon noano totubo mobalimang kusus moleleaniyo ko Mian Bisa namian. 16Yaku pailukene tukon tutuuno sulano komuyu poloingiyo kona atulano domianoo badaang mo buno doiya, maka mian badaang bailon mo balimang pomeenggon tukon meleleani polong yanila.
17Yaku sanaang tukon Stepanus nalubatan, Fortunatus tukon Akhaikus. Yanila buno posoboli komuyu doi yaku. 18Yanila tealikenemo konoanggu laba-laba, pokakana yanila sanaanggene konoamu. Mian badaang mobuno doiya sio poodotiiyo.
19 #
Kis. R. 18:2
Koanggota-anggota jemaat doi Asia mopolonggon salam doi komuyu. Akwila tukon Priskila maka anggota jemaat mo pototongi doi bonua yanila makapatu salam Salani mo pontiing tuuno. 20Sasaibino utus naimbaa mopolonggon salam doi komuyu.
Popolaing-laingo tukon monondok buno utusonggita Salani.
21Yaku suungiyo naimbaa kosalam yaku mo tulise susuunggu: Salam molengget doi yaku, Paulus.
22Mian mo aki namaasikene ko Temeneno, sodiiyomo yana nakinutuk!
Maranatha – Kombai Temeneno, lubato!
23Boliisi ko Temeneno Yesus nabalakaatiyo Utus.
24Polaing koseang doi Utus sasaibino mo pomeenggon tukon Kristus Yesus.
Komai Hormat, Paulus
Currently Selected:
1 KORINTUS 16: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
