2 KORINTUS 1
1
1 #
Kis. R. 18:1
Utus-utus Mian Bisa najemaat doi Korintus tukon sasaibino ko Mian Bisa namian doi posaapon ko Akhaya.
Yaku, Paulus, rasul Kristus Yesus, mo biningkat tongo Mian Bisa namongiasan polaing-laing tukon utusonggita Timotius, 2moinikene boliisi ko Mian Bisa Tamanggita tukon Yesus Kristus beena balakaat tukon namonondokan doi komuyu.
Paulus basukuur doi Mian Bisa
3Tanggaal ko Mian Bisa, doi nda Temeneno Yesus Kristus. Yana Tama mo monondok konoano tuuno, tukon Yana Mian Bisa komo beena bukuanan kobanggapi noano. 4Yana ekeenggele konoanggami doi samba-samba kosusaan kami mo toupiyo, sulano tukon do bukuananoo kami mo talimayo doi Mian Bisadoo, mau kami moola ekeenggele sasaibino komian noano mo daano doi susaan lalomo. 5Kosakisaa-sakisaa Kristus mo toupiyo doiya badaango luunggon kami motoupi. Tukon lolo doi Kristus koidan, konoanggami kinoonggoli tuuno. 6Kalu kami toupiyo kosusaan, doiya daano tuuk ekeenggele konoamu, tuuk doi mukasalamatan. Kalu konoanggami inokoonggol, maka komiu koidan turut inokoonggol tobikon komuyu teali sabar doi kasusaan-kasusaan lalomo bunomo komai motoupiyan. 7Kami moinikene tukon akimo mbai sasaaki kaliangano doi Utus, sabab kami toiyo baikon komuyu tulut susa tukon kami. Tobikon doiya komuyu koidan tulut mokoonggol posinggat-singgat kami.
8 #
1Kor. 15:32
Utus-utus! Kami yase komuyu potoiyo kaliangano susaan komai tinoupi doi wilayah Asia. Kosusaan kami mo toupiyo babalat tuuno dedekene kami, tobikon kami akimo mai moinikene naikon motubo koidan; 9mai lasa-lasayo buno lapamo kami binee ukuman mate. Bai doiya langgedoo teali sulano kami aki moinikene nda bukuanan susuungo, bai tolongo doi Mian Bisa mo otuboiyo komian momate. 10Yanamo komo lapamo salamatene kami doi mateanoo mo babasal. Tukon Yanamo koidan komo salamatene kami doi oloyo-oloyo doibundu, sabab tolongo doi Yana komai moiniyan. 11Kami anggayo baikon tukon posambeang motuuk doi kami, Mian Bisa naikon salamatene koidan kami doi silakaan. Mian Bisa balakaatiyo kami buno meeng kopotimbili badaang kosambeang motuuk doi kami, tukon sabab doiya badaang komian mobakinatauwan doi Mian Bisa.
Paulus boliiyo kona tetel
12Kami banggaal, sabab konoanggami ekeenggele kami baikon komai tuboan nai dunia nia – kotutuuno komai potaamian tukon Utus – lapamo kami ampakonggene tukon sanaang kabai moliyous. Kami lakukanggene doiya, bolikon banggapi napandoiyan, bai tolongo Mian Bisa komo beena bukuanan. 13-14Komai tinulis doikoo daanoon tolongo langge-langge mo moola komuyu basae tukon mangalatikene. Budodoiya komuyu akipo mangalatikene kami tutuuno, bai yaku moinikene naikon komuyu bisa-bisa momangalatikene kami. Tukon buno doiya, doi tempo Temeneno Yesus nalubatan naikon, komuyu naikon banggaal doi kami, bunomo lakon kami banggaal doi komuyu.
15Sabab do manganggaanoo maka kotumbe-tumbeno yaku niatkanggene molubotiiyo komuyu sulano komuyu pomalaat balakaat lua luunggon nalua-lua. 16#Kis. R. 19:21 Daku makisuut molubotiiyo doi kuampakonan doi Makedonia tukon yaku sampu koidan doi komuyu doi kuabalian, sulano komuyu pomoola tomboniiyo yaku banggadudulkene daku ampakonan doi Yudea. 17Bai yaku boliiyomo daku niatoo; nah, oilakai doiya okitakene baikon pondirian aki namoonggol? Salataa mongkubai niat, oilakai yaku kubaiyo koniat tolongo kumongiasan susuunggu, naapa doiya binantil, “Oode”, tukon naapa doiya “Aki”? 18Tolongo Mian Bisa komo moola inangga, daku perjanjian doi Utus bolikon kai “Oode” tukon “Aki”. 19#Kis. R. 18:5 Sabab Yesus Kristus Mian Bisa Napau, Silas napinolonggon doi komuyudoo, Timotius tukon doi yakudoo susuunggu bolikon kai mian “Oode” tukon “Aki”. Kobalino Yana buno kai potimbili “Oode” doi Mian Bisa. 20Sabab mololoi yana Mian Bisa lapamo bantile, “Oode” doi sasaibino kona janji. Doiyamo kona luwean sampe kita bantile, “Amin” doi Mian Bisa sabab Yesus Kristus. Kami kubaiyo buno doiya sulano ko Mian Bisa naikanakabasal. 21Mian Bisa susuungo komo tealikene kami tukon Utus moonggol pomeenggon tukon Kristus; yanamo koidan komo lilike kita tuuk doi butongo. 22Tuuk doiya ko Mian Bisa lapamo sahkanggene kita teali namian tukon beekene Kona Roh doi noanggita lalomo buno meeng kotambo baikon Yana naikon beekene doi kita sasaibino Kona pinarjanjikon.
23Mian Bisa daku sakisii – sabab yana toiyo konoanggu nabinantil – baikon yaku aki nateali ampakon doi Korintus, sabab yaku aki kuyase kubaiyo konoamu nasusa. 24Yaku aki kupakisaayo komuyu kaliangano oila komuyu kopoo inangga, sabab komuyu lapamo mangangga tuuno doi Kristus. Yaku tolongo balimang polaing tukon komuyu sulano komuyu pololokon monondok.
Currently Selected:
2 KORINTUS 1: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
