1 KORINTUS 15
15
Kristus nai notuboiyan koidan doi namatean
1Tukon budodoiya, Utus-utus, yaku yase komuyu poneneeke koidan do Bilitadoo Monondok moluwedoi Mian Bisa yaku mo pelenggene loolukonoo doikoo. Komuyu talimayomo, tukon manganggamo doi Kristus sabab do Bilitadoo Monondok. 2Kalu komuyu bataani moonggol doi oilamodoo yaku mo pelenggenedoo maka do Bilitadoo Monondok salamatene komuyu; kasuali kalu Utus mangangga bai aki namangalatikene.
3 #
Yes. 53:5-12
Oilamo daku pinolonggon doi Utus-utus doiya lapamo yaku talimayo loolukon. Komo penting buno mo totulis doi Kitab Moliyous lalomo, yaku pelenggene doikoo baikon Kristus mate sabab nda lalim-lalim; 4#Sad. 16:8-10; Mat. 12:40; Kis. R. 2:24-32 baikon yana tinadin, bai doibundu yana inotuboi koidan doi oloyo kotoluno. Doiya koidan totulis doi Kitab Moliyous lalomo. 5#Mat. 28:16-17; Mrk. 16:14; Luk. 24:34, 36; Yoh. 20:19 Yaku popitoikene koidan doikoo baikon Kristus mo inotuboidoo koidan otudoikene koidan kobutongo doi Petrus, tukon koidan doi rasul-rasul mosongulo lua. 6Lapa doiya yana okitakene kobutongo koidan doi lobian lima kosakato kona pololaing sasaibino. Kona badaangan doi mian badaangdoo modaano motubo diabudodoo, tolongo moimoiya komian komo matemo. 7Lapa doiya koidan Kristus okitakene kobutongo doi Yakobus tukon doibundu doi sasaibino korasul.
8 #
Kis. R. 9:3-6
Doibundu tutuuno yana okitakene kobutongo doi yaku koidan – yaku komo buno pau moakiyoon nalaate kotempono kona sinuungan! 9#Kis. R. 8:3 Yaku daano komeeng ko Temeneno Narasul mo aki nainodotii. Yaku aki nateali binantil rasul, sabab lapamo yaku sakisaayo ko Mian Bisa najemaat. 10Bai sabab Mian Bisa namaasi yaku teali pokakana naiya kutuboan nia budodoo. Tukon aki napalasuma ko Mian Bisa moompuniyo yaku. Tukon yakumo komo lobian daku balimangan doi sasaibino korasul bailonggon. Bai doiya kona bisaan bolikon kukakaatean; doiya Mian Bisa nausaha mo mamaasikene yaku, tukon mololainge yaku doi kubalimangan. 11Jadi, mau indee miano kopo mantalimaan Bilitadoo Monondok – oilakai doiya luwedoi yaku kabai doi rasul-rasul bailonggon – doiya aki nateali soal. Komo penting tolongo asal kami pelenggenemo do Bilitadoo mo Monondok tukon Utus anggayomo.
Kobanggapi nainotuboiyan koidan doi namatean
12Kalu doi kamidoo mo babilitakene doiyamo Kristus lapamo inotuboi koidan doi namatean, bulaando daano doi komuyudoo komo bantile baikon komian momate akimo nainotuboi koidan? 13Kalu bisa komian momate akimo nainotuboi koidan, doiya koalatino Kristus aki nainotuboi koidan doi namatean. 14Tukon kalu andeno Kristus aki nainotuboi doi namatean maka akiyo kona totuuk kami mopailukene kooioila tukon akiyo kona totuuk koidan komuyu momangangga, sabab dopoo manganggaanoo akiyo kona dasar oioila. 15Lobian koidan doiya, tokita baikon kami kala-kala kaliangano Mian Bisa, sabab kami babilitakene baikon ko Mian Bisa lapamo otuboiyo koidan Kristus doi namatean, banggokai ko Mian Bisa akimo naotuboiyo yana koidan – kalu takainomo bisa komian momate akimo nainotuboi koidan! 16Sabab kalu komian momate akimo nainotuboi koidan, maka Kristus akimo nainotuboi doi namatean koidan. 17Tukon kalu Kristus akimo nainotuboi koidan maka komu manganggaanoo tolongo buno monii balang; doiya koalatino komuyu daano doi lalim lalomo tukon akiyo kopoo minoinikon oioila. 18Doiya koalatino koidan baikon ko Salani miano mo lapamo mate, koidan akiyo konapo minoinikon. 19Kalu konda minoinikon doi Kristus tangatang doi nda tuboan doi dunia nia lalomo, maka doi sasaibino kobanggapi doi dunia nia lalomo, kitamo komo soe tuuno!
20Bai kona tokitaan Kristus lapamo inotuboi koidan doi namatean. Naiyamo kotambono baikon komian badaang mo lapamo mate naikon inotuboi koidan. 21Sabab komatean usok doi dunia lalomo tukon sabab meeng komian, bunomo lakon tubo koidan doi matean bineekon doi banggapi tukon lolo doi meeng komian koidan. 22Bunomo lakon sasaibino kobanggapi mate sabab tongusokon meeng tukon Adam, bunomo koidan sasaibino naikon inotuboi, sabab tongusokon teali meeng tukon Kristus. 23Bai susuwele naikon inotuboi menurut naobos: tumbe-tumbeno Kristus; doibundu totiili doi tempo yana lubat koidan, maka natuundu komian badaang naobos mo tongusokon doi Kristus namian. 24Lapa doiya maka nateali kokiamat. Doi tempodoo Kristus lungguiyamo sasaibino kopamarentaan, sasaibino kakuasaan tukon sasaibino kobukuanan; maka Yana naikon salakanggene Kona kakuasaan pokakana kotomundo, doi Mian Bisa Tamanggita. 25#Sad. 110:1 Kristus sio namaparenta momeenggon polong ko Mian Bisa tealikene sasaibino Kristus namusu taaluuk doi Kristus. 26Musu doibundu yana mo lungguiyomo doiyamo matean. 27#Sad. 8:6 Doi Kitab Moliyous lalomo totulis buno naiya, “Ko Mian Bisa tealikene sasaibino kolangge taaluuk doi Yana.” Tontong tuuno baikon komo minakisuuti tukon “sasaibino kolangge” doiya aki natongusokon ko Mian Bisa susuungo, mo tealikene sasaibino langgedoo taaluuk doi Kristus. 28Bai sambuno sasaibino tinaklukanggon doi Kristus napamarentaan, maka yana susuungo, doiyamo Mian Bisa Napau, naikon salakanggenemo kobutongo doi Mian Bisa mo lapamo tealikene sasaibino kolangge taaluuk doi Yana. Maka ko Mian Bisa susuungo komo parentayo sasaibino.
29Kalu komian momate aki nainotuboi koidan, bulaando modaano komian mo sinau tuuk doi mian momate? Oila kogunano yanila mokubaiyo doiya halloo? Kalu bisa komian mate aki naikon nainotuboi koidan, oila kogunano yanila mokubaiyo doiya halloo? 30Tukon oila kokubaiyano koidan kami moyase sasalaane kosusaan samba kotempo? 31Utus-utus! Samba kooloyo yaku taane kosakisaa sabab yaku banggaalkene kopoo tuboan sabab komuyu lapamo mangangga doi Kristus Yesus, nda Temeneno. 32#Yes. 22:13 Kalu doiya tolongo tuuk doi banggapi tolong, oila kountungo doi yaku sulano baladuang pokakana mopooakate koiyayon-iyayon mobarani doi kota nia, doi Efesus? Kalu komian momate aki nainotuboi koidan, nah, lobian komo monondok nda loloiyo kososombotia, “Mai nda kaan inum tukon basana-sanaang, sabab namodoa kita naikon matemo.”
33Inai potongokolii! Polembelikonan mo lokis kubaiyo lusak konda tuboan mo monondok. 34Potoiyo budodoiya, tukon inaimo pomongkubai lalim koidan. Kona tutuuwan komuyu sio pomammaa, baikon doi komuyudoo daano komo akiyoon natingoniiyo ko Mian Bisa.
Banggapi butongo sambuno lapa inotuboi koidan doi namatean
35Ugaate daano komo mansadai, “Bulaando kai komian momate nainotuboi koidan? Butong mo bulaando komo bineekon doi yanila, nalapa yanila inotuboi koidan?” 36Bodo tuuno! Kalu Utus masakakon kalibuang doi buta, do kalibuangoo aki natubo, kalu do kalibuangoo aki namate loolukon. 37Tukon do kalibuangoo Utus mo sakakene doi butadoo lalomo – ugaatene gandum kalibuango kabai kalibuang bailon – doiya do kalibuangoo batuno tolong, aki nasasaibino nasinakakonoo naikon tubo. 38Mian Bisa susuungo komo kubaiyo kondondoongo do kalibuangoo menurut napambaleng momonondok tuuk doi mosinakakonoo. Doi memeeng kokalibuang kaliangano, Mian Bisa komo kubaiyo kondondoongo dokalibuangoo susuwele.
39Komahluk-mahluk butongo mo daano kona ansaang sasaibino aki napokakana. Kobanggapi butongo sangalaasan, koiyayon koona butongo sangalaasan; kotomisi-tomisi sangalaasanggon kobutongo, tukon koikan-ikan sangalaasan koidan kobutongo.
40Bunomo koidan tukon kolangge-langge doi timbu tukon kolangge-langge doi buta. Kolangge-langge doi timbu susuwele daano kona monondokan susuungo, tukon kolangge-langge doi buta bunomo lakon. 41Kooloyo namonondokan posasala kobituwon namonondokan. Kobituwon-bituwon pauno koona sangalaasan kona monondokan. Malah do bituwon-bituwonoo pauno susuwele posasala koidan kona monondokan.
42Bunomo kohalloo tukon komian badaang momate mo inotuboi koidan. Komian butongo mo tinadingoo doiya mian butongo mo moola boowan, bai komian butongo mo inotuboidoo koidan, doiya mian butongo mo aki namoola manas. 43Salataa komian butongo natinading, do mianoo butongo kulokiso tukon muyuko; bai salataa nainotuboiyan koidan, yana tealimo monondok tukon bukuan. 44Salataa natinadinan, butongo butong moluwedoi dunia; bai salataa tubo koidan, maka do butongo butong moluwedoi Mian Bisa Na Roh komo beekene. Daano komian butongo mo luwedoi dunia, tukon daano koidan komian butongo mo luwedoi Mian Bisa. 45#Tea. 2:7 Doi Kitab Moliyous lalomo totulis buno naiya, “Kobanggapi tumbeno, doiyamo Adam, teali mahluk mo tubo,” bai Adam doibundu doiya Roh mo mebee tuboan. 46Komo lubat tumbeno loolukon doiya jasmani, bolikon mo rohani. Komo rohani lubat doibundu. 47Adam tumbeno tinealikon luwedoi buta, bai Adam koluano luwedoi surgaa. 48Komian badaang doi dunia nia pokakanamo Adam tumbe-tumbeno, mo tinealikon luwedoi buta, bai kosurgaa miano doiya pokakanamo yana mo lubat doi surgaa. 49Bunomo lakon kita budodoiya bunomo Adam mo tinealikon luwedoi buta, maka naikon kita Teai buno Yana mo luwedoi surgaadoo.
50Daku makisuut, Utus-utus, doiyamo: butonggita mo tinealikon luwedoi sau tukon sail, aki namoola usok doi Mian Bisa na Dunia Boolu; tukon butonggita mo moola mate aki namoola teali monondok.
51 #
1Tes. 4:15-17
Popalatikanggene naiya laasia nia: Aki nasasaibino kita naikon mate, bai kita sasaibino naikon tobolii. 52Doiya halloo naikon sosinggot teali tukon tolongo sopiyoman, salataa trompet napinuukan bunduno. Sabab sambuno do trompetoo alalo tololongol, komian badaang momate naikon inotuboimo koidan tukon butonggita mo monondok, tukon kita sasaibino naikon binolii. 53Kobutonggita mo moola mate nia sio nasinoboli tukon butonggita mo aki namoola mate, tukon butonggita mo luwedoi dunia nia sio nasinoboli tukon butonggita mo luwedoi surgaa. 54#Yes. 25:8 Kalu kobutonggita moola mate lapamo sinoboli tukon mian butongo mo aki namoola mate, tukon butonggita mo luwedoi dunia lapamo sinoboli mian butongo mo luwedoi surgaa, doiyamo kosinggatoo maka nateali oila komo totulis doi Kitab Moliyous lalomo, “Komatean lapamo inapusanggon, komanaangan lapamo linaat!”
55 #
Hos. 13:14
“Oh matean, inaando komu manaangan?
Oh matean inaando komu kuasa?”
56Komatean nakuasa doiyamo dosa, tukon kodosa ampakonggene kona kakuasaan lolo doi ukum agama. 57Bai kinatauwan doi Mian Bisa; yana mobeena kita manaangan moluwedoi Yesus Kristus nda Temeneno!
58Tobikon doiya, Utus-utus kukinilakon, siokai komuyu pobukuan tukon moonggol. Pobalimang sidutu tuuk Temeneno tukon tutuu, sabab komuyu toiyo baikon sasaibino komo komuyu limange tuuk doi Temeneno, doiya aki napalasuma.
Currently Selected:
1 KORINTUS 15: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
