1 KORINTUS 14
14
Bula-bulaa koponjolasan kokaliangano karunia moluwedoi Mian Bisa Na Roh
1Siokai komuyu pokakaate sulano pomamaasikene komian badaang bailon. Tukon koidan pokakaate sulano pomantalima karunia-karunia Mian Bisa Na Roh mo beekene, tukon komo utama tutuuno kasanggupan mopelenggene ko Mian Bisa natetel-tetel doi banggapi. 2Mian mo basilingan tukon silingan mo minasaingdinggon, doiya mianoo bolikon basilingan doi banggapi; yana basilingan doi Mian Bisa. Akiyo komian mo mangalatikene oilamo kona binantil, sabab Mian Bisa Na Roh komo tealikene yana mabantil langge-langgedoo tolongo Mian Bisa komo toiyo. 3Kobalino mian mo pelenggene kobilita moluwedoi Mian Bisa, pelenggene doi banggapi; tuuk keenggele yanila, sulano nabeena samangat doi yanila tuuk hibule yanila. 4Mian mo basilingan tukon silingan mo minasaingdinggon tolongo ekeenggele kobutongo susuungo, baimo kai komian mo pelenggene kobilita moluwedoi Mian Bisa tulungiyo kojemaat nateali maju.
5Kona monondokan kalu Utus sasaibino moola basilingan tukon bubula kosilingan kaliangano mo minasaingdinggon. Bai komo mo monondok tutuuno doiyamo kalu Utus moola babilitakene ko Mian Bisa natetel-tetel. Sabab komian mo pelenggene kobilita moluwedoi Mian Bisa, lobian kona taanggaan tukon doi mian mo moola basilingan tukon bubula kosilingan mo minasaingdinggon; posasala kohallo kalu doi mian mo basilingan tukon bula-bulaa kokaliangano kosilingan mo minasaingdinggonoo bai yana moola jelaskanggene oila dona binantiloo, sulano sasaibino koanggota jemaat laate toiyo konamototuuk. 6Kalu andeno yaku lubat doikoo tukon yaku basilingan tukon bubula kosilingan kaliangano mo minasaingdinggon, oila konatotuuk doiya doi komuyu? Akiyo konatotuuk mau tolongo soisik! Posasala kohallo, kalu yaku mabantil meeng kolangge moluwedoi Mian Bisa, kabai yaku jelaskanggene komeeng kolangge kaliangano doi Mian Bisa, kabai yaku mopolonggon bilita moluwedoi Mian Bisa, kai yaku bangotunggul.
7Komusiik pakakaso mo akiyo kona ansaang mau nabaino soisik, buno suling tukon kasapi, kalu kona tanda-tanda aki naminaenggon tukon tontong, bulaando komian natoiyano indee laguno komo minaenggon? 8Meeng kocontoh koidan: Kalu kotorompet tolongo pinuuk sabalangan, indee miano komo batotobo molobosi? 9Bunomo koidan tukon mukasanggupan sulano nda basilingan tukon bula-bulaa kosilingan kaliangano mo minasaindinggon. Kalu Utus tukon do kasanggupanoo mabantil bantilan-bantilan mo aki natontong, akiyo komeeng komian mo moola mangalatikene oilamo Utus nabinantiloo. Domu bantil-bantilanoo lapus akiyo kona tinudo. 10Doi dunia nia daano kobulaa kosilingan, bai akiyo mau nabaino meeng do silingan-silinganoo mo aki nadaano koalatino. 11Bai kalu yaku aki kumangalatikene dosilinganoo memeeng komian mobantile, maka domianoo mo pakeyo do silinganoo buno mian mososibong doi yaku; bunomo koidan yaku terhadap doi yana. 12Kokaliangano komuyu, yaku toiyo komuyu yase tuuno pomalaat karunia-karunia moluwedoi Mian Bisa Na Roh. Bai komo utama tuuno, sio komuyu pokakaate sulano potulungiyo kojemaat nateali maju.
13Doiyamo kosababpo komian mo basilingan doi silingan mo minasaingdinggon, siokai nakabiyo doi Mian Bisa sulano yana nabinee kasanggupan sulano natalakanggene oilamo domo binantiloo. 14Sabab kalu yaku sambeang tukon silingan mo minasaindinggon, daku roh takainomo sambeang, bai daku pikiran aki nabalimang. 15Jadi, sio oila daku kinubai? Naiya naikon daku kinubai: Yaku sambeang tukon kuroh, bai yaku naikon sambeang koidan tukon daku pikiran. Yaku naikon manyanyi tukon daku roh, bai yaku yase manyanyi tukon daku pikiran. 16Sabab kalu Utus bakinatauwan doi Mian Bisa tukon tolongo muroh, tukon daano komian bailon mo aki namangalatikene kosilingan mominasaindinggon mo luwedoi Mian Bisadoo Na Roh, maka doiya mianoo aki namoola bantile, “Yaku setujuiyo” doi sambeang basyukuuranoo; sabab yana aki natoiyo oilamo doi Utus nabinantiloo. 17Mau kai domu sambeangan bakinatauwan doi Temeneno monondok tuuno, bai do sambeanganoo akiyo kona totuuk doi mianoo bailon.
18Yaku bakinatauwan doi Mian Bisa sabab yaku susuunggu moola basilingan doi bula-bulaa kosilingan kaliangano mo minasaindinggon lobian doi Utus-utus sasaibino. 19Mau kai doi pototongian lalomo doi sosubaiyano ko Temeneno, yaku yase tuuno momapake lima kobantilan mo moola mian mangalatikene baimo kai doi loloongo kobantilan mopinake doi silingan mo minasaingdinggon. Yaku yase tuuno komo buno doiya sulano namoola yaku mongotunggul mian.
20Utus-utus! Inai pobapikir buno labuk-labuk. Doi hal kulokisan, siokai komuyu tataap buno labuk pauno. Bai doi popikiran lalomo, siokai komuyu poteali mian mo babasalo. 21#Yes. 28:11-12 Doi Kitab Moliyous lalomo totulis buno naiya,
“Temeneno bantile, ‘Tukon perantaraan mian badaang,
mo basilingan tukon silingan mo minasaindinggon,
yaku naikon basilingan doi mian nia.
Doiyamo tukon perantaraan mian badaang molulubaton, yaku basilingan doi kumian;
mau kai nabuno doiya, yanila aki nayase mondongolii dakubantilan.’ ”
22Jadi karunia sulano nda basilingan tukon bubula kosilingan mo minasaingdinggon doiya baino meeng kotanda doi mian mo aki namangangga, bolikon tuuk doi mian mo mangangga. Tukon kokarunia mobontiikene ko Mian Bisa natetel doi banggapi doiya meeng kotanda motuuk doi mian mo maangga, bolikon tuuk doi mian mo aki namaangga. 23Tobikon doiya, kalu andeno pototongian doi jemaat lalomo, sasaibino koanggota jemaat basilingan doi bula-bulaa kosilingan mo minasaingdinggon, maka nalubat komoimoiya komian doi tonggulung, kabai mian badaang mo bolikon Salani miano, tantu do mian badangoo aanggene komuyu sasaibino tandomo! 24Bai kalu Utus-utus sasaibino pelenggene kobilita moluwedoi Mian Bisa, maka nalubat komeeng komian mo bolikon Salani miano kabai mian bailon, maka dohal-halloo Utus mo babilitakene sasaibino naikon otudoikene do mianoo nalalim-lalim tukon tealikene yana sadal doi nalalim-lalimoo. 25Hal-hal mo tosookon doi noano lalomo inokitakon, tobikon yana naikon poipoisik kobutongo maka nasosubaiyo ko Mian Bisa. Yana naikon akuiyo baikon ko Mian Bisa bisa-bisa daano doi komuyudoo.
Komai limang doi jemaat lalomo
26Jadi, Utus-utus, oila koalatino sasaibino doiya? Kalu komuyu pototongi pososubaiyo ko Temeneno, daano komo manani, daano komo bangotunggul, daano komo pelenggene komeeng kolangge moluwedoi Mian Bisa, daano komo basilingan tukon silingan mo minasaindinggon, tukon daano komo jelaskanggene oila domo binantiloo. Bai sasaibino doiya sio nakinubai tukon bangotunggulan tukon doi namonondokan sasaibino. 27Kalu daano komo yase basilingan doi silingan mo minasaindinggon, siokai nalua kabai kona badaangan tolu komian tolong komo paisoboli. Tukon sio nadaano komo jelaskanggene oila do mianoo mo basilingan nabinantil. 28Kalu akiyo komo moola jelaskanggene, maka mian badaangoo mo basilingan tukon silingan mo minasaindinggon tadu nabaino aki nabiyok-biyok doi pototongianoo lalomo. Tadukai nabaino yanila bantil-bantil doi noanoila lalomo doi Mian Bisa. 29Lua kabai tolu komian komo toiyo kobilita moluwedoi Mian Bisa sio napelenggene do bilitadoo tukon kobailonggon timbo-timbongiiyo oila domo binantiloo. 30Bai kalu ande-andeno do bilitadoo moluwedoi Mian Bisa sumbot doi meeng komian bailon mo osulang doi pototongianoo, maka domianoo mo daano mobasilingan, sio natade. 31Tukon cara mo buno doiya, Utus-utus sasaibino, meeng tukon meeng, moola pelenggene kobilita moluwedoi Mian Bisa; sulano sasaibino moola mantarima otunggul tukon teali mangangga momeenggon. 32Karunia moluwedoi Roh sulano pelenggene kobilita moluwedoi Mian Bisa moola domianoo pelenggene tukon monondok do bilitadoo. 33Mian Bisa doiya Mian Bisa mo yase kokokubai motaatul; yana bolikon Mian Bisa mo yase kokokubai monggabut.
Pokakana komo teali doi sasaibino ko Mian Bisa najemaat, 34koboine sio naaki nabiyok kalu daano kopototongian doi jemaat. Yanila aki naminoolakon basilingan. Yanila aki namoola mataani sambu; doiya pokokonoi tukon agama atulano. 35Kalu yanila yase toiyo komemeeng kolangge, yanila sio namasadaikene doi napoo langkai doi bonua. Kubaiyo mammaa tuuno kalu meeng koboine basilingan doi pototongian jemaat lalomo.
36Oilamo ko Mian Bisa nabinantil lubat doi komuyu? Kabai tolongo doikoo tolong dobantilanoo napinolonggonan? 37Kalu daano komian mo lasayo daano kona karunia sulano napelenggene kobilita moluwedoi Mian Bisa, kabai yana daano kona karunia bailon moluwedoi Mian Bisa Na Roh, do mianoo sio natoiyo baikon oila daku tinulis nia daano meeng kopalenta moluwedoi Temeneno. 38Bai kalu daano komo aki natalimayo naiya, inai popalatikanggene yana.
39Tobikon doiya, Utus-utus, pokakaate sulano popelenggene kobilita moluwedoi Mian Bisa, bai inai popantane komian mo yase basalita doi bula-bulaa kokaliangano kosilingan mo minasaindinggon. 40Bai sasaibino sio nakinubai tukon monondok kabai teratur.
Currently Selected:
1 KORINTUS 14: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
