1 KORINTUS 13
13
Maasi
1Mau kai yaku namoola basilingan tukon bula-bulaa kobanggapi nasilingan, mau kai tukon malaekat nasilingan idanggon, bai yaku aki kumamaasikene komian bailon, maka daku bantilan-bantilanoo tolongo buno langge alalo moakiyo koalatino. 2#Mat. 17:20, 21:21; Mrk. 11:23 Mau kai kupandoi mobabilitakene kobilita moluwedoi Mian Bisa, tukon mangalatikanggene sasaibino kolangge-langge mo atean, tukon toiyo sasaibino kolangge-langge tukon mangangga doi Mian Bisa tobikon moola biyele kobunggul, bai yaku aki kumamaasikene komian badaang bailon, maka yaku akiyo koalatino oioila. 3Mau kai nasasaibino koonggumo, yaku beekene doi mian motalalais, tukon yaku beekene kobutonggu nasinua, bai yaku aki kumamaasikene komian bailon, maka doiya sasaibino akiyo kona totuuk tuuno.
4Mian mo mamaasikene komian bailon, sabal tukon monondok konoano. Yana akiyo kopoliitonan, aki nabukal-bukal konoano, aki nabanggal-banggaal. 5Yana aki nabatinggai, aki nakasal, yana aki napakisaayo komian bailon sulano naloingiyo kona mongiasan susuungo, aki namosobit nanggoliiton, tukon aki naabos noa. 6Mian mo mamaasikene komian bailon, aki nayase kokokubai molokis, yana tolongo yase kokokubai momonondok. 7Yana taanggene salaanggene sasaibino kolangge tukon yase anggayo naikon komonondok tuuno doi memeeng komian; mau doi langge mo bulaandomo kona ndondoong do mianoo modaano kona seang aki nalapus kona moinian tukon nasabalan mototiiliyo sasaibino kolangge.
8Aki naidan naikon daano kotempono doiyaa komian aki napalaluu poseang-seang. Budodoo naiya daano komian mo pandoi mopelenggene kobilita moluwedoi Mian Bisa, bai sio yana naikon natade mopelenggene do bilitadoo. Budodoiya daano komo pandoi basilingan doi bubula kosilingan kaliangano mo minasaingdinggon, bai sio yana naikon natademo basilingan doi silingan-silinganoo. Budodoiya daano komian mo toiyo badaang kolangge, bai sio oila yanila natinoidoo naikon tomilinggene. 9Tobikon, konda motoiyan tukon konda sanggupan mopelenggene kobilita moluwedoi Mian Bisa, akiyoon natalakana. 10Sio naikon nalaate kotempono Mian Bisa kubaiyo sasaibino monondok, tukon domo akidoo namonondok naikon lapus.
11Salataa yaku daano pau mopoipoisik, yaku basilingan buno pau mopoipoisik, daku palasaan buno pau mopoipoisik tukon daku pikilan buno pau mopoipoisik. Budodoiya yaku babasalo, daku kalakuan doi paupaunoanoo yaku sakukenemo. 12Oilamo konda kinita budodoiya nia tolongo buno bayangan mo kabur doi sulumiin. Bai sio naikon nda kitayo tutuuno tukon tontong. Budodoiya yaku akiyoon kutoiyo sasaibino, bai sio kutoiyo sasaibino buno ko Mian Bisa toiyo sasaibino kokaliangano doi butonggu.
13Jadi, doi tempo nia daano kotolu kolangge komo sio nda lakukanggene: mangangga, moini tukon pomamaasikon. Komo penting tuuno doi langge nia motolu doiyamo mamaasikene komian badaang bailon.
Currently Selected:
1 KORINTUS 13: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
