1 KORINTUS 11
11
1 #
1Kor. 4:16; Flp. 3:17 Pololoiyo daku lenggang, pokakana mau yaku moloingiyo Kristus nalenggang.
Kokaliangano mapakean toik posunggup mian oluno doi tempo nda bakaledaan
2Yaku nggaale komuyu sabab komuyu sidutu neneeke yaku tukon loingiyo kootunggul yaku mo beekene komuyu. 3Bai yaku yase sulano komuyu potoiyo koidan kolangge meeng, doiyamo baikon doi memeeng komala-malane komo teali nakapala doiyamo Kristus; komo teali boloki kapalano doiyamo nalangkai, tukon komo teali Kristus nakapala doiyamo Mian Bisa. 4Kalu doi memeeng komala-malane doi tempo nasambeangan kabai doi nababilitakanano kobilita moluwedoi Mian Bisa doi mian mobadaang salaano, maka namapake toik posunggup oluno, maka doiya mianoo totulaiyo Kristus. 5Tukon kalu komeeng koboine doi tempo doi nasambeangan kabai doi nababilitakanano kobilita moluwedoi Mian Bisa doi mian namadaangan salaano, aki napake toik posunggup oluno, maka do boinedoo mongkubaikene maa kona langkai mo teali kapala doi butongo susuungo. Doiyamo pokakanamo do boinedoo oluno modinalulumo. 6Sabab kalu meeng koboine aki nayase mapake toik posunggup oluno tadukai dona buuk nadinalulu. Bai kalu komeeng koboine kona buuk dinalulu kai ginunting, doiya meeng kopototulai doi yana. Tobikon doiya tadukai yana napake toik posunggupi oluno. 7#Tea. 1:26-27 Komala-malane aki napalaluu mapake toik posunggupi oluno, sabab yana okitakene ko Mian Bisa napelibadi tukon kona kabasalan. Bai koboine tolongo okitakene komala-malane nakabasalan, 8#Tea. 2:18-19 sabab komala-malane aki natinealikon luwedoi boine, bai boine komo tinealikon luwedoi mala-malane. 9Mala-malane aki koidan natinealikon tolongo tuuk doi boi-boine nakapalaluuwan, bai boine tinealikon tuuk doi mala-malane nakapalaluuwan. 10Tobikon doiya, sulano komalaekat noano nateali sanaang, meeng koboine siokai napake toik posunggupi oluno buno meeng kotanda baikon yana nalangkai komo kuasaiyo. 11Mau kai nabuno doiya doi natuboan lalomo buno Salani miano, koboine aki nakokondong susuungo tangalaas doi mala-malane, tukon koidan komala-malane aki nakokondong susuungo, tangalaas doi boi-boine. 12Sabab mau kai boinedoo tumbe-tumbeno tinealikon luwedoi mala-malane, bai koidan naapa kai domala-malanedoo sosuung doi boine; tukon sasaibino kolangge luwedoi Mian Bisa.
13Soba Utus-utus popikikene naiya langge nia: Kai monondok meeng koboine nasambeang doi Mian Bisa doi mian namadaangan, akiyo kona posunggupi oluno? 14Doi nda pangalaman umum, komuyu lapamo inotunggulkon baikon kalu komala-malane bulusan kona buuk, doiya meeng kolangge mo aki namonondok. 15Bai kalu boine, kobuuk bineekon doi yana, sulano tosunggupi kooluno tukon kalu kona buuk bulusan doiya meeng kotambonganan doi yana. 16Jadi, kalu daano komo ponggeelekikene naiya masaala nia, tolongo meeng daku binantil doiyamo baikon mau doi kita mau kai Mian Bisa naanggota jemaat bailon sasaibino, tolongo meeng kona kabiasaanoo doi jemaat lalomo; komo sangalaasan doiya akiyo.
Temeneno Naperjamuan
17Kokaliangano naiya momeeng nia, yaku aki kunggaale komuyu. Doi pototongian bakaledaan akiyo kohasilo mo monondok, tolongo mo lokis. 18Kotumbe-tumbeno yaku lengele, baikon doi pototongian lalomo daano kosoobos komo ponggeeleki. Tukon yaku pikikene doiya bilitadoo badaang komo bisa. 19Takainomo pantaso nasumbot kopoonggeelekiyan doi komuyu, sulano natotingonii ko Salani miano mo bisa. 20Bai doi tempo popototongian, doi komuyudoo mokubaiyo bolikon Temeneno Naperjamuan. 21Sabab doi pokaananoo, komuyu suwe-suwele momangala dokinaanoo, sampe daano komo akimo nasamba, sadangkan kobailon teali malangu. 22Bulaando mobuno doiya? Baanggon kai Utus aki nadaano komu bonua? Utus moola mukaan tukon inum idoo! Kai banggon Utus yase kulokisanggene ko Mian Bisa najemaat tukon tealikene mammaa komian momasikiin? Oilamo komo sio kubantile naikon doi komuyu? Siokai yaku nggaale komuyu? Aki! Mau nabulaandomo yaku aki kunggaale komuyu.
23Sabab komo yaku otunggulikene doi komuyu, doiya yaku talimayo doi Temeneno susuungo: baikon doi popookoo salataa Yesus, nda Temeneno nakinulokisanan, yana mangala roti, 24tukon salataa yana bakinatauwan doi Mian Bisa motuuk doi rotidoo, Yana bisi-bisiliyo do rotidoo tukon limano, maka Nabantile, “Naiyamo kobutonggu mo sinalakanggon tuuk doi komuyu. Pokubaiyomo naiya sulano potandayo yaku.” 25#Tob. 24:6-8; Yer. 31:31-34 Bunomo lakon salataa lapa kaan, yana mangala kogalaas anggur maka bantile, “Naiya angguria daano komeeng koperjanjian Mian Bisa mo boolu, mosinahkanggon tukon saunggu. Kalu komuyu inume naiya, pokubaiyo naiya sulano potandayo yaku.” 26Takainomo dopo makaanan roti tukon pomonginuman anggur nia, komuyu babilitakene ko Temeneno namatean, polong doi nalubatan.
27Tobikon kai doiya, mian mo kaane ko Temeneno Naroti tukon inume ko Temeneno Naanggur tukon kokubai mo aki napantas, doiya mianoo baladosa doi Temeneno mo lapamo sosubakene kobutongo tukon sauno. 28Jadi, memeeng komian sio napalesayo kobutongo loolukon, maka namoola makaan dorotidoo tukon monginum doangguroo. 29Sabab kalu komian makaan roti tukon monginum anggur tukon tolongo bapiada baikon do perjamuanoo pokokonoi tukon ko Temeneno butongo, do mianoo makaan roti tukon monginum anggur tolongo malaat ukuman doi Mian Bisa doi butongo susuungo. 30Doiyamo kosababpo badaang doi komuyudoo komo masakit tukon akimo nabukuan, tukon daano koidan komo mate. 31Bai kalu kita palesayo kobutonggita looluk, kita aki Mian Bisa naukume. 32Bai kalu Mian Bisa ukume kita, yana umbale kita, sulano kita naaki nda kanakon ukuman polaing-laing naiya dunia nia.
33Tobikon doiya, Utus-utusonggu, kalu komuyu pototongi mokaan doi Temeneno Naperjamuan, komuyu sio popototiili. 34Kalu daano komo malaal, yana sio namakaan loolukon doi nabonua. Kalu komuyu palatikanggene naiya langge nia, kopototongian-pototongian doi pobakaledaan aki nalubatene koukuman moluwedoi Mian Bisa motuuk doi butomu susuumu. Kokaliangano langge-langge bailon, naikon yaku talangkanggene doikoo, kalu yaku lubat koidan.
Currently Selected:
1 KORINTUS 11: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
