Surona Pueꞌ Iesu 19
19
Paulu i kótá Epesu
1Tangaꞌna Apolo i kótá Korintu i tampoꞌ Akaia, Paulu mampolumaoi wánuá-wánuá to i buluꞌ i tampoꞌ Galatia hai Perigia,#19:1 Básá Suro 18:23. hai roo onoꞌ mendáulu lao i kótá Epesu.#19:1 Mouláꞌ handaꞌ tauna to mapánde ntepuꞌu motasere Ngkóráꞌna Pueꞌ, Paulu moukiꞌ surana to rungu-runguna i toKorintu tempóna toroꞌ i kótá Epesu (básá 1 Korintu 16:8). Ionoꞌ, ia mampohidupaꞌáheꞌ bahangapa tauna to mepoinálái. 2Nakuneꞌheꞌ, nauliꞌ, “Ba aramokou molámbiꞌ Inao to Magasaꞌ i tempómi mepoinálái?”
Rahániki, “Tiꞌara mani, láwiꞌ tiꞌara mani kihádi kaꞌárána Inao to Magasaꞌ!”
3Napekuneꞌ wopiꞌi Paulu, nauliꞌ, “Ane noꞌonoꞌi, kómu rariukou mouláꞌ paturoꞌna heáná?”
Rahániki, “Mouláꞌ paturoꞌna Iohane Toperiu.”
4Mewaliꞌ, nahángáꞌáheꞌ Paulu, “Periuna Iohane ia miꞌi tandaꞌ pampenosoꞌintaꞌ dósántaꞌ. Agáiáná i tempóna Iohane meriu, ia mopahaweꞌ i toIahudiꞌ bona mepoináláiheꞌ i tauna to ina haweꞌ i bókóꞌna, Ia miꞌi Iesu.” 5Karahádina laluitana iti, mampoperiumoheꞌ i lalu hangaꞌna Pueꞌ Iesu. 6Paulu moángkáꞌ miꞌi taena i wuáꞌraꞌ, haneꞌi mendáulu mpuꞌu miꞌi Inao to Magasaꞌ mokuasaꞌiheꞌ. Molaluitaheꞌ i básá to tiꞌara raisá, hai mohuwáráheꞌ laluita to hangko i Pueꞌ Ala. 7Kahandaꞌraꞌ to nariu Paulu, rekeꞌ-rekeꞌna hampuloꞌ hai rodua tobaleilo.
8Tangaꞌna Paulu i kótá Epesu, ia paka lao i támbi penómbáꞌáraꞌ toIahudiꞌ. Tálu wulána kamaruena, ia mampolaluitaꞌáheꞌ tauna to hirámpu ionoꞌ, hai tiꞌara ara kamalááꞌna mopakanótóáheꞌ kana i popárentána Pueꞌ Ala bona rapoinálái. 9Agáiáná ara bahangapa tauna to matuꞌa laluraꞌ to tiꞌara moundeꞌ mepoinálái. I lindoꞌraꞌ tauna to handaꞌ, mampopohalaꞌ-halaꞌheꞌ rárá katehómpóꞌ, onoꞌ miꞌi haneꞌi napálehimoheꞌ Paulu lao i támbina Tiranu, hai araheꞌ woꞌo bahangapa toSarani to meuláꞌ. Támbina Tiranu iti mahile, hai paka rapakeꞌ raposikolaꞌi. Alo-alona Paulu mepaturoꞌ ionoꞌ. 10Iti miꞌi bágóꞌna rompare kamaruena, duuꞌna upu-upu tauna i poropensi Asia mohádiheꞌ ngkóráꞌna Pueꞌ, maroꞌa toIahudiꞌ maroꞌa toIunani.#19:10 Tempóna Paulu i Epesu, ara to moánti Ngkóráꞌ Marasa i kótá Kolose, Laodikia hai Hierapoli (básá Kolose 4:13).
11Pueꞌ Ala moweꞌi kuasaꞌ i Paulu mobábehi tandaꞌ-tandaꞌ kuasaꞌ to metingkáráki. 12Kehapiꞌ lesona ba báná apa peá to napakeꞌ Paulu raꞌánti lao i to tiꞌara ralalu, bateꞌraꞌ liliu mauriꞌ, hai mesuwuꞌ mpuꞌuheꞌ upu-upu tokadake.
Kuasaꞌna Iesu monangi kuasaꞌ tokadake i Epesu
13-14I tempó iti, ara woꞌo i Epesu bahangapa toIahudiꞌ to ara pangisáraꞌ. Molulumaoheꞌ i humalele kótá mampopesuwuꞌ tokadake to mampesuaꞌi tauna. Hangko i oloꞌraꞌ, ara pitu tobaleilo. To pituheꞌ iti, ánáꞌna hadua kapalaꞌ tadulako menómbá to rahangaꞌ Sekewa. Hangkani tempó, mampehukáꞌheꞌ mokábelái hangaꞌna Pueꞌ Iesu bona mampopesuwuꞌheꞌ tokadake hangko i hadua tauna. Ara to manguliꞌ, “I lalu hangaꞌna Iesu to nabámbári Paulu, kupopesuwuꞌkoꞌ!”
15Nahániki tokadake iti, “Ane Iesu, kuisánto, hai Paulu kuisá woꞌo. Agáiáná kómu deꞌe, heánákou haneꞌi pebáiꞌkou mowuraꞌaꞌ?” 16Kásáliu naropáti hai napohakaꞌáheꞌ. Tiꞌara rabuku raewaꞌ, láwiꞌ maróhó ntepuꞌu. Onoꞌ miꞌi haneꞌi melangkaheꞌ hangko i támbi iti, mompabela-belamoheꞌ hai waruꞌraꞌ mampahepaꞌ-hepaꞌ duuꞌraꞌ tepakabelá.
17Upu-upu tauna to toroꞌ i Epesu, maroꞌa toIahudiꞌ maroꞌa toIunani, mohádiheꞌ apa to mewaliꞌ iti, onoꞌ haneꞌi malááꞌmoheꞌ, hai hangaꞌna Iesu rapomahile. 18Hangko ionoꞌ woꞌo, handaꞌ toSarani monóáká i lindoꞌraꞌ tauna to handaꞌ bábehiáraꞌ to tiꞌara hintotoꞌ hai pepoináláiraꞌ. 19Handaꞌheꞌ woꞌo to moánti sura pangisáraꞌ, rarámpu hai rahunu i lindoꞌraꞌ tauna to handaꞌ.#19:19 Pueꞌ Ala molaraꞌ tauna mopakeꞌ pangisá. Básá Pohuleki 18:10-14. Hólóna sura pangisáraꞌ iti ane raimbaꞌ, rekeꞌ-rekeꞌna lima puloꞌna sábuna dóiꞌ peráꞌ.#19:19 lima puloꞌna sábuna dóiꞌ peráꞌ: Rekeꞌ-rekeꞌna hibali hai saroraꞌ hampuloꞌ tauna ane mobágóꞌheꞌ hampuloꞌ hai iba parena. 20Mewaliꞌ, mantámbái wopiꞌi tauna to mohádi ngkóráꞌna Pueꞌ, hai ánti kuasaꞌna ngkóráꞌ iti, tetámbái woꞌo tauna to mepoinálái.
Pohiho i kótá Epesu
21Liu miꞌi to mewaliꞌ iti, Paulu mopakanótó#19:21 Paulu mopakanótó - Peisá woꞌo ralimbá: “ánti pokalena Inao to Magasaꞌ, Paulu mopakanótó” (TB2) bona lao i kótá Ierusale moliu tampoꞌ Makedonia hai Akaia. Nauliꞌ, “Hangko i Ierusale, hangaa-ngaa laoaꞌ i kótá Roma.” 22Onoꞌ miꞌi haneꞌi nahuoꞌmoheꞌ rodua tauna to meuláꞌ i hia moioru lao i Makedonia. Hangaꞌraꞌ Timotiu hai Eratu,#19:22 Eratu: Básá Roma 16:23; 2 Timotiu 4:20. agáiáná Paulu toroꞌ mani hampaiꞌ i kótá Epesu#19:22 Básá woꞌo 1 Korintu 16:8-9. i poropensi Asia.
23I tempóna mani Paulu ara ionoꞌ, ara pohiho to rumihi i kótá Epesu. Pohiho iti mewaliꞌ ánti paturoꞌna mokana i rárá katehómpóꞌ. Node daritána: 24I kótá Epesu iti, ara hadua tobaleilo to mapánde mobábehi párewá hangko i peráꞌ. Hangaꞌna tauna iti Demeteriu. Bágóꞌna mobábehi támbi-támbi hangko i peráꞌ to nodo lenggeꞌna támbi penómbáꞌá to rapakeꞌ menómbá i ánitu towawine to rahangaꞌ Atemisi.#19:24 Atemisi: Básá to teukiꞌ i Kahirámpuá Laluita. Hai hangko i bágóꞌna iti, ia hai topobágóꞌna molámbiꞌheꞌ handaꞌ dóiꞌ. 25Hangkani tempó, ia mokióꞌheꞌ rángána hampopobágóꞌna hai tauna ntániꞌna to mapánde mobábehi párewá hangko i peráꞌ. Nahángáꞌáheꞌ, “Halalu-halalu, niꞌisánto, hangko i bágóꞌtaꞌ deꞌe handaꞌ ntepuꞌu porasiꞌántaꞌ. 26Agáiáná kehapiꞌ noꞌonoꞌ, niꞌita hai nihádi miꞌi apa to nabábehi hadua tauna to rahangaꞌ Paulu. Nauliꞌ apa to rabábehi hai tae tauna haneꞌi rapenómbái, tiꞌara ara kuasaꞌna. Ánti paturoꞌna iti, handaꞌheꞌ tauna to meuláꞌ i Paulu, hai tiꞌara peá i Epesu. I humalele poropensi Asia, bateꞌna woꞌo noꞌonoꞌ. 27Mewaliꞌ halalu-halalu, to tapokalááꞌ ntepuꞌu, ineeꞌ paꞌi bágóꞌtaꞌ deꞌe tiꞌara piꞌi raundeꞌ tauna. Tiꞌara onoꞌ peá, agáiáná támbi penómbáꞌántaꞌ i ánitu towawine Atemisi tiꞌara piꞌi ina rapomahile, duuꞌna hangaꞌna Atemisi to makuasaꞌ ntepuꞌu tiꞌara piꞌi rabiláꞌ. Mole ánituntaꞌ deꞌe, ia miꞌi to rapenómbái upu-upu tauna i poropensi Asia hai i humalele duniáꞌ.”
28Karahádina laluitana Demeteriu iti, mabukoꞌ ntepuꞌuheꞌ hai monganga-ngangaheꞌ hingkakani, rauliꞌ, “Tóiá miꞌi Atemisi, ánituraꞌ toEpesu!” 29Pohiho iti kalao-lao rame ntepuꞌu i humalele kótá. Hangko ionoꞌ, laomoheꞌ tauna to handaꞌ mohakaꞌ Gaiu hai Aritaku. Gaiu hai Aritaku iti, hira miꞌi toMakedonia to mamporángá Paulu i polumaona. Rodua tauna iti rahakaꞌmoheꞌ haneꞌi raꞌánti lao i támbi kateruhuá to mahile i lalu kótá.#19:29 Kateruhuá iti ara i tangaꞌ-tangaꞌ kótá Epesu. Tiꞌara ara atuꞌna. Handaꞌ ntepuꞌu tauna peisá hirámpu ionoꞌ, haweꞌ rompuloꞌ hai ini sábuna tauna. Biásá laoheꞌ mengongoꞌ sandiwara ba pomberipoꞌ. 30Napoinao Paulu lao hingkakani hai hira mesuaꞌ i lalu kateruhuá iti, agáiáná rakóntó halalu hampepepoináláina bona ineeꞌ lao. 31Mogalo riꞌi bahangapaheꞌ balena, topopárentá i poropensi Asia, mohuoꞌ miꞌi tauna lao mohángáꞌá Paulu bona ineeꞌ lao i kateruhuá to mahile iti.
32I tempó iti, rumihi pohiho i kateruhuá mahile. Araheꞌ to manguliꞌ nodeꞌe, araheꞌ to manguliꞌ nodoꞌo. Agáiáná, kahandaꞌáraꞌ tauna to hirámpu iti, tiꞌaraheꞌ moisá apa ntóáꞌna haneꞌiheꞌ hirámpu ionoꞌ. 33Ara hadua toIahudiꞌ to rahangaꞌ Alesande to raꞌánti toIahudiꞌ i lindoꞌraꞌ tauna to handaꞌ iti bona mampolaluitaꞌáheꞌ. Onoꞌ miꞌi haneꞌi ia moángkáꞌ taena ina mopakaniiꞌheꞌ, láwiꞌ napoinao mopahaweꞌ i katoꞌu-toꞌuána. 34Agáiáná i karaitána tauna to handaꞌ kaꞌiana toIahudiꞌ, monganga-nganga wopaheꞌ. Rojaa kamaruena hingkakaniheꞌ manguliꞌ, “Tóiá miꞌi Atemisi, ánituraꞌ toEpesu!”
35Kahópóꞌána, hadua guruntulisiꞌ to mapángkáꞌ lántiꞌna i kótá Epesu iti,#19:35 guruntulisiꞌ to mapángkáꞌ lántiꞌna i kótá Epesu iti: Ia to motangaꞌ-tangaꞌi Topepáresáꞌ Mahile i Epesu hai topopárentá Roma. mobuku mopakaniiꞌheꞌ, nauliꞌ, “Halalu-halalu toEpesu! Upu-upu tauna i duniáꞌ moisá támbi penómbáꞌá i ánitu towawine Atemisi rakádipurá ieneꞌ i kótá Epesu, hai watu to nodo lenggeꞌna to manawoꞌ hangko i langiꞌ#19:35 Mouláꞌ pepoináláiraꞌ toEpesu, datu ánituraꞌ to rahangaꞌ Seu monawoꞌ mai i duniáꞌ hambuaꞌ watu, lenggeꞌna nodo Atemisi. rakámpái ieneꞌ. Mahile ntepuꞌu hangaꞌna Atemisi iti. 36Tiꞌara ara haweꞌ hadua to peisá mosápuáka iti. Onoꞌ miꞌi haneꞌi hangaa-ngaa maniiꞌkeꞌ, ineeꞌkeꞌ naꞌánti kamaꞌámuꞌna laluntaꞌ. 37Tauna to niántiheꞌ mai iti, tiꞌaraheꞌ mopakarugiꞌ támbi penómbáꞌántaꞌ ba tiꞌaraheꞌ woꞌo mopakadake hangaꞌna Atemisi ánituntaꞌ. 38Mewaliꞌ, ane Demeteriu hai rángána hampopobágóꞌna mampoinao mosalaꞌi ba heáná peá, arantoheꞌ topebutusi hai aranto woꞌo mágáuꞌ. Ara miꞌi tempó to tepakanótó, hai i tempó iti, mágáuꞌ peisá mohoda-hoda kara-kara nodo kara-kara deꞌe. 39Mewaliꞌ halalu-halalu, ane ara mani kárá-kárámi ntániꞌna, kara-kara iti hangaa-ngaa rahoda-hoda i kateruhuá mouláꞌ áturá topopárentá, 40láwiꞌ apa to tabábehi deꞌe mopahurewuꞌkeꞌ. Peisákeꞌ rasalaꞌi haneꞌi rahuku topopárentá Roma ane mopaꞌarakeꞌ pohiho. Hai ane rasalaꞌikeꞌ, apa miꞌi to ina tauliꞌ, láwiꞌ tiꞌara ara álásántaꞌ teruhu ieneꞌ deꞌe-deꞌe.” 41Karoona molaluita noꞌonoꞌ, guruntulisiꞌ kótá iti mampopesuleꞌheꞌ upu-upu.
Currently Selected:
Surona Pueꞌ Iesu 19: NTBEP
Highlight
Share
Compare
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
