Surona Pueꞌ Iesu 18

Paulu i kótá Korintu

1Roo onoꞌ, pohuꞌ miꞌi Paulu hangko i kótá Atena lao i kótá Korintu. 2Ionoꞌ ia mampohidupaꞌá hadua tobaleilo toIahudiꞌ to rahangaꞌ Akila. Akila iti rapoánáka i poropensi Pontu. Toinána rahangaꞌ Pirikila. Hira hamboko melimbámoheꞌ hangko i tampoꞌ Italia láwiꞌ Datu Mahile Laudiu i Roma mampopesuwuꞌ miꞌi párentá bona upu-upu toIahudiꞌ hangaa-ngaa pohuꞌ hangko i kótá Roma. Kahaweꞌna Paulu i kótá Korintu, lao mpuꞌumoheꞌ naweoꞌ, 3hai ánti kahibalina bágóꞌraꞌ mobábehi bambaruꞌ {hangko i koliꞌ binataꞌ}, onoꞌ miꞌi haneꞌi ia toroꞌ hingkakani hai hira.#18:3 Mouláꞌ toIahudiꞌ, tauna to mopaturoꞌ ngkóráꞌna Pueꞌ tiꞌara peisá molámbiꞌ porasiꞌáraꞌ hangko i pobágóꞌraꞌ iti. Onoꞌ miꞌi haneꞌi hangaa-ngaa ara woꞌo bágóꞌraꞌ to ntániꞌna. (Básá Suro 20:34; 1 Korintu 9:3-18; 2 Korintu 11:7; 1 Tesalonika 2:9; 2 Tesalonika 3:8.) 4I alo-alo penómbáꞌáraꞌ toIahudiꞌ, Paulu lao i támbi penómbáꞌáraꞌ mopaturoꞌ tauna to hirámpu ionoꞌ, maroꞌa toIahudiꞌ maroꞌa toIunani.#18:4 toIunani: to mengkoruꞌ i Pueꞌ Ala ba to mesuaꞌ miꞌi i ágámáraꞌ toIahudiꞌ. Tunggáiána Paulu bona mepoináláiheꞌ i Pueꞌ Iesu.

5Kahaweꞌraꞌ Silasi hai Timotiu hangko i tampoꞌ Makedonia, Paulu tiꞌara piꞌi mobágóꞌ mobábehi bambaruꞌ hangko i koliꞌ, láwiꞌ ia mopahaweꞌ oaꞌ Ngkóráꞌ Marasa i toIahudiꞌ. Napahaweꞌáheꞌ kaꞌIesuna miꞌi Datu Topehómpóꞌ to nadándi Pueꞌ Ala. 6Agáiáná toIahudiꞌ to i kótá Korintu moewaꞌ hai mopakóiꞌ oaꞌ Paulu, onoꞌ miꞌi haneꞌi ia motarónta awu hangko i waruꞌna,#18:6 natarónta awu hangko i waruꞌna: Básá woꞌo Suro 13:51; Lukasi 9:5. nahángáꞌáheꞌ, “Ane nahukukou Pueꞌ Ala, tiꞌara kódóꞌ to mampohurunga, agáiáná kómu riꞌi! Mewaliꞌ mantepuꞌu deꞌe-deꞌe, ina laoaꞌ moánti Ngkóráꞌ Marasa i tauna to tiꞌara toIahudiꞌ!” 7Roo onoꞌ, napálehimoheꞌ pohuꞌ lao i támbina Titiu Iusutu to ara i hintáiꞌna támbi penómbáꞌá. Pueꞌ támbi iti tiꞌara toIahudiꞌ, agáiáná ia mengkoruꞌ i Pueꞌ Ala. 8Ara woꞌo hadua tauna to rahangaꞌ Kirisipu.#18:8 Kirisipu: Básá 1 Korintu 1:14. Ia miꞌi hadua tadulako i támbi penómbáꞌá to i hintáiꞌna támbina Titiu. Ia hai upu-upu hantámbiána, mepoináláiheꞌ i Pueꞌ Iesu. Hai handaꞌ toKorintu mampehádingi bámbári to napahaweꞌ Paulu, álána mepoináláiheꞌ woꞌo hai rariuheꞌ.

9Hangkani tempó, tangaꞌ káindi, Paulu moita wopiꞌi pampetudeꞌá. I lalu pampetudeꞌá iti, nahángáꞌá Pueꞌ, “Ineeꞌkoꞌ malááꞌ, hai ineeꞌkoꞌ mengkaroo mopahaweꞌ ngkóráꞌKuꞌ i kótá Korintu deꞌe, 10láwiꞌ Kódóꞌ miꞌi to mamporángákoꞌ, hai handaꞌ miꞌi taunáNgkuꞌ i kótá deꞌe. Tiꞌara ara hadua to ina mopaháikoꞌ.” 11Mewaliꞌ, Paulu toroꞌ i Korintu hampare hantangaꞌ kamaruena, hai mepaturoꞌ oaꞌ kana i ngkóráꞌna Pueꞌ Ala.

12I tempóna topopárentá Roma moángkáꞌ Galio mewaliꞌ mágáuꞌ#18:12 Galio mewaliꞌ mágáuꞌ i tampoꞌ Akaia pare lima puloꞌna hai isáꞌ haweꞌ lima puloꞌna hai duá roo karapoánákana Iesu (51-52M). i tampoꞌ Akaia,#18:12 tampoꞌ Akaia: Deꞌe-deꞌe hanggáláꞌ hangko i tampoꞌ Iunani, tándáꞌ i wóiꞌ. hintuwuꞌmoheꞌ toIahudiꞌ moewaꞌ Paulu, haneꞌi raꞌánti i lindoꞌna mágáuꞌ iti. 13Rasalaꞌi, rauliꞌ, “Tauna deꞌe mopakanawoꞌ handaꞌ tauna. Ia mopaturoꞌheꞌ kana i rárá menómbá i Pueꞌ Ala, agáiáná apa to napaturoꞌáheꞌ iti, tiꞌara hintotoꞌ hai apa to teukiꞌ i Paturoꞌna Musa!”

14Hangko ina mehániꞌ Paulu, nauliꞌ miꞌi Galio, “ToIahudiꞌ! Ane tauna to nisalaꞌi iti moliungi hawaꞌ topopárentá Roma ba mobábehi to kadake, hintotoꞌ miꞌi kupehádingi popahaweꞌmi. 15Agáiáná popahaweꞌmi mokana peá laluita hai áturá ágámámi. Mewaliꞌ, niurusi miꞌi haduduámi. Lohentoaꞌ mourusi!” 16Roo onoꞌ, napopesuwuꞌheꞌ hangko i támbi pobutusiá. 17I rawa támbi pobutusiá iti, tauna to handaꞌ mohakaꞌ Sotene,#18:17 Sotene: Babilaꞌ hibali hai Sotene to nakábelái Paulu i 1 Korintu 1:1. hadua tadulako i támbi penómbáꞌá, hai rapapahái. Agáiáná bábehiáraꞌ iti tiꞌara napesuaꞌi Galio.

Paulu mesuleꞌ lao i kótá Antiokia i tampoꞌ Siria

18Marue mani Paulu toroꞌ i kótá Korintu hangko mepálákáná riꞌi i halalu hampepepoináláina. Roo onoꞌ, ia mengkaheꞌ i duanga tahiꞌ lao i tampoꞌ Siria, hingkakani hai Pirikila hai Akila. Agáiáná hangko tiꞌara maniheꞌ pohuꞌ, Paulu mampopelóli sieruꞌ weluáꞌna i wánuá Kengkerea,#18:18 Kengkerea: Iti miꞌi pehupeꞌá duanga tahiꞌ to hampuloꞌ hai hakilómete hangko i kótá Korintu, tándáꞌ i mata alo. láwiꞌ roo miꞌi mobukeki dándina i Pueꞌ Ala.#18:18 Mouláꞌ ádáraꞌ toIahudiꞌ, ane hópóꞌ miꞌi tempó podándi, hangko rakáiꞌ riꞌi weluáꞌraꞌ. 19-21I polumaoáraꞌ iti, mehupeꞌheꞌ i kótá Epesu. Paulu lao i támbi penómbáꞌá hai mompolaluitaꞌáheꞌ toIahudiꞌ to hirámpu ionoꞌ. Taunaheꞌ iti membiáꞌ i Paulu bona marue hingkakani hai hira, agáiáná pembiáꞌraꞌ iti tiꞌara napabukeꞌi. Kehapiꞌ noꞌonoꞌ, i kapohuꞌna, nahángáꞌáheꞌ, “Ane napokanai Pueꞌ Ala, ina mesuleꞌaꞌ mai ieneꞌ.” Pirikila hai Akila toroꞌheꞌ oaꞌ i Epesu, agáiáná Paulu mopaliliu miꞌi polumaona mengkaheꞌ i duanga tahiꞌ lao i tampoꞌ Siria.

22Kahaweꞌna i kótá Kaisarea,#18:22 Polumaoána hangko i kótá Epesu haweꞌ i kótá Kaisarea i tampoꞌ Iudá, hahioꞌ átuna pitu puloꞌna kiló kakaraoꞌna. Paulu lao sieruꞌ i kótá Ierusale mampombelámbiꞌá toSarani to ara ionoꞌ, hangko lao riꞌi i kótá Antiokia i tampoꞌ Siria. 23Bahangapa kamaruena hingkakani hai halalu hampepepoináláina i kótá Antiokia, pohuꞌ wopiꞌi Paulu lao i tampoꞌ Galatia hai Perigia, hai mopakaróhó pepoináláiraꞌ tauna to mepoinálái i Pueꞌ Iesu to toroꞌ ionoꞌ.

Polumaona Paulu moánti Ngkóráꞌ Marasa i katáluna kánina (18:24–21:16)

Apolo i kótá Epesu hai Korintu

24I tempó iti, ara hadua toIahudiꞌ to haweꞌ i kótá Epesu. Hangaꞌna Apolo. Apolo iti rapoánáka i kótá Alesandaria.#18:24 kótá Alesandaria: Básá to teukiꞌ i wóiꞌ Suro 6:9. Ia mapánde molaluita, hai moisá ntepuꞌu Sura Magasaꞌ.#18:24 Sura Magasaꞌ: Lempóna, Pototowiá to Sae, láwiꞌ tempó onoꞌ, Pototowiá to Woꞌu tiꞌara mani ara. 25Apolo rapaturoꞌá miꞌi woꞌo mokana i rárá katehómpóꞌ moliu Pueꞌ Iesu. Mewaliꞌ kahaweꞌna i Epesu, ia molaluita hangko i laluna ntepuꞌu, mopaturoꞌheꞌ tauna kana i Iesu i katoꞌu-toꞌuána, kehapiꞌ periuna peá Iohane to naisá. 26I tempó iti, natepuꞌu miꞌi molaluita i támbi penómbáꞌáraꞌ toIahudiꞌ hai tiꞌara ara kamalááꞌna. Karahádina Pirikila hai Akila laluitana Apolo iti, raꞌánti lao i támbiraꞌ haneꞌi rapakanótóá mokana rárá katehómpóꞌ, láwiꞌ ara mani to tiꞌara naisá.

27Roo onoꞌ, napoinao Apolo lao i tampoꞌ Akaia. Hai halalu hampepepoináláina i Epesu motulungi, mopakatuheꞌ sura lao i hangka toSaraniraꞌ i Akaia bona Apolo ratarima maroꞌa. Mewaliꞌ kahaweꞌna Apolo i Akaia, paturoꞌna moánti handaꞌ pewátiꞌ i upu-upu tauna to mepoinálái i Pueꞌ Iesu ánti kabulána laluna Pueꞌ Ala i hira. 28Ánti kamapándena molaluita, Apolo monangiheꞌ toIahudiꞌ i lalu pombehániꞌraꞌ i lindoꞌraꞌ tauna to handaꞌ. Hangko i Sura Magasaꞌ, ia mopatongawaꞌ ntepuꞌu kaꞌIesuna Datu Topehómpóꞌ to nadándi Pueꞌ Ala.

Currently Selected:

Surona Pueꞌ Iesu 18: NTBEP

Highlight

Copy