BAPOROMTAM ATAKAM 7
7
Israel owe 144.000 atakam
1Dere era pak aporkoromorawa, malaikat eak taka apok aporo. Era malaikat taka taka ara tapirmi aip eak taka apok aememes. Are era bui eak taka apok tiri asiompes. Era bui, ara tapirmi apaye, era itimbup bwi apaye, era wus kupis apaye, bafufum-ombar. 2Derarawa, wan malaikat taka, era jee ajapijisemmarpu aejinaoe aporo. Bonak ere, era Jiine Allah, owe bipisji baokomapom bi, era malaikat atetame. Era malaikat arawa, era bi atoomjinaoe. Era malaikatam atakam daytinak, wan malaikat eak taka apok afaketaae— ere Allah, ara tapirmiam, era itimbup bwiam, bajurusum fiak pak atetame malaikat eak taka apok are. 3“Tare era tapirmiam, era itimbup bwiam, era wusam, bajurusum bas. Dare, daAllah bambi karai baetam owe, abipis taka taka, bi ato takamokumapoma.” Emes atakam aesime. 4Dere ere, wan atakamam jane ajio. “Era bipisji bi aptam owe takes, owe 144.000. Ere Israel samaniin samaniin 12 owe wan owe are. 5Era Yahuda saman oweam 12.000. Era Ruben saman oweam 12.000. Era Gad saman oweam 12.000. 6Era Asyer saman oweam 12.000. Era Naftali saman oweam 12.000. Era Manasye saman oweam 12.000. 7Era Simeon saman oweam 12.000. Era Lewi saman oweam 12.000. Era Isakar saman oweam 12.000. 8Era Sebulon saman oweam 12.000. Era Yusuf saman oweam 12.000. Era Benyamin saman oweam 12.000. Emesare, emes owe, bipisji bi aptam owe.” Emes atakam jane ajio.
Owe tananenak atakam
9Dere era pak aporkoromorawa, denom owe tananenak aporo. Oweam era owe baemejititimar asan apok. Era owe, tapirmiin tapirmiin takes wan oweam, era owe saman takes wan oweam, taka taka atakam takes wan oweam, ere emes owe are. Era oweam owe baomep fe baemap asanpu aememes. Are baju fasar jirao ajiimomemteteres. Are tere enese atoomemteteres. 10Era oweam atakam afaketaaes. “DaAllah owe baomep fe baemap asan ten aemapem. Armat Ipitam, Domba Jiiam, owe ajortaermas.” Emes atakam aesimes. 11Era malaikat takes, owe baomep fe baemap asan poman pomanam, owe duturu poman pomanam, era jatiaptam pak eak taka apok poman pomanam afojomes. Era malaikatam owe baomep fe baemap asanpu bi fop andaejiapes, wanam Allah asitimes. Are atakam akores. 12“Atakamnak! Dare tere daAllah emes aeomamo. Dare Armat Ipit daytinakam, amsamnak Ipitam, emes atakam aesimamo. Dare terima kasih atakam daytu Armat Ipit akoromamo. Danom, ‘Allah akotnak,’ emes atakam atemtemamo. Danom Allah asitimamo. Me Allah, takes aomepkoromum. Are fiaknak. Dare era atakam takes emes akoromaaramo. Ara atakam, ere atakamnak” malaikat takes emes atakam aesimes.
13Wanam, wan duturu ipit taka, atakam dera akoromen. “Era baju fasar jirao ajiimomemtetermas owe, wama oweem? Are etepe asana ejinaoes?” Emes atakam aesime. 14Derarawa, “Tuan! Dere demsam apok. Wore ere, womsam.” Emes atakam aesimo. Era duturu ipit ere, atakam dera akoromen. “Owe, era aememes owe ajurusumaaris. Me, era aememes owe asan akot aememmas. Are abaju jirao, Domba Ji aesee, aeosomteteres. Wanam era baju taka taka, fasarnak aemtiies. 15Erarawa jokam, eamam, are Allah fe baemap asanpu aememaaremas. Are Allah atame bomon asitimaaremas. Era fe baemap asan ten aemapmar Ipit arawa, era owe takan aemapaartem. 16,17Era fe baemap asanpu aememmar Domba Jii, era owe bonak ajaromattem. Are, era owe, bwi, tapirmi amba atetefejismar asanpu bonak ajaromattem. Oweam era bwi andetas, are jiine aememaaremas. Erarawa era owe amosto apaye, bwito apaye, boemem apoknak aememtemas. Era jee ambapnak, era owe damo bondae batemtii apoknak aemtem. Allaham era owe bate manames takes ajiimosomtem.” Me duturu ipit emes atakam aesime.
Currently Selected:
BAPOROMTAM ATAKAM 7: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
