BAPOROMTAM ATAKAM 6
6
Ajaokoamse surat bakamimapom pak atakam
1Wanam, dere era ajaokoamse surat, bakamimapom pak poman ban jamnuk aporo. Denom era domba Jii wan bakamimapom pak taka, akoromtaere aporo. Era jatiaptam pakam eak taka apok wan taka, era akore atakam jane ajio. Era atakam, ere wur tamen are. “De!” Emes atakam aesime. 2Denom banep apeomo. Fasar kuda taka aporo. Era kuda beak ten aemape ipit amuni atoompe. Allah, kuus bajamapom akotnak pak, era ipit atetame. Emesare, era ipit, owe bakumimosom ipit arare. Are owe bakumimosom ajise.
3Wanam Domba Jii era buku bakamimapom pak ketiga akoromtaere. Akoromtaererawa, dere era kedua jatiaptam pak era akore atakam jane ajio. “De!” Emes atakam aesime. 4Emesare, wan kudaam ajise. Era kuda esakam. Allaham, fiak pak, era kuda beak ten aemape ipit, atetame. Era fiak pak, ara aemansa tapirmi owe jii bajamom basakamtam atakam fiak pak. Era ipit jii bajamom atakam asakamtamto, owe armamon ajamtamtiitemas. Emesare, Allaham jii warim daytu era ipit atetame.
5Wanam, Domba Jii era ketiga buku bakamimapom pak akoromtaere. Akoromtaere ere, ketiga jatiaptam pak era akore atakam jane ajio. “De!” Emes atakam aesime. Denom banamek apeomo. Sesak kuda taka aporo. Era kuda beak ten aemape ipit timbangan ban atoompe. 6Denom era jatiaptam pak eak taka apok bomon, atakam akore jane ajio. Era atakam ere, “gandum, liter taka aharga, karai ipit bare taka agaji pak are. Jagung, liter bamintepam aharga, karai ipit bare taka agaji are. Tare era saitun wusam, era anggur kebunam, bandanaesumosom bas.” Emes atakam aesime. 7Wanam, era Domba Jii, era buku bakamimapom pak keempat akoromtaere. Akoromtaererawa, dere era jatiaptam pak keempat era akore atakam jane ajio. “De!” Emes atakam aesime. 8Denom banamek apeomo. Jirmwi kuda taka aporo. Era kuda beak ten aemape ipit juas “Dambir Pak.” Me afe asaramome ipit juas “Dambir Owe Baemap Asan.” Allaham, fiak pak, era ipit amnuk atetame. Era fiak pak, ara aemansa tapirmi owe seperempat dambir batem pak are. Me wan owe jii warim dambir atemtemas. Me wan oweam amosto dambir aemtemas. Me wan owe ere, atair damo dambir aemtemas. Ara aemansa tapirmi wasen binatang ere, wan owe atantemas.
9Wanam, Domba Jii era buku bakamimapom pak kelima akoromtaere. Akoromtaererawa, dere dambir aemes owe aanakot owe aporo. Era anakot owe, Allah pak jis bajaatam joo bap aemapes. Bonak ere, era owe, Allah atakam, wan owe akoretamaaris. Are Allah aeme pak ateman atamaaris. Wan owe ere, emes apores, wanam era owe atatiiteteres. 10Era owe aanakot owe, atakam afaketaaes. “Tuhan! Wore turunak. Wonom atakamnak. Wore ara aemansa tapirmi owe bajurusum wama emtem? Era owe dara atatiitetereroes. Wore emes biti bajie wama emtem?” Emes atakam aesimes. 11Allaham baju fasar jirao era owe atetamtetere. Are atakam era owe akorome. “Owe, karai tare takan aeaarukum. Wan owe ere, era owe atatiitetertemas— are tara atatiiteteren emes tamen are. Are tajoo owe. Emesare, tare era barekope ajiire kais patakamday.” Emes atakam aesime.
12Wanam dere Domba Jii era buku bakamimapom pak keduabelas akoromtaere aporo. Emesare, ajie daytinak asime. Era jee, sesak kain, emes sesaknak aemape. Me piram, esee emes esakamnak apeape. 13Me oup baitam ara aemansa tapirmi akokondaes. Ere kuur daytu era wus juas “ara” awawarimmar, wanam era ofo ara eek akokomsamdaemmar emes tamen are. 14Era wonamo oupam ajaniose. Ere kertas ajaokose emes tamen are. Me famiam takes wan asan ambarapteteres. Me woo takesam wan asan ambarapteteres. 15Wanam ara aemansa tapirmi raja owe takesam, era kapar oweam, era tentara kapar oweam, era pak daytu aptam oweam, era fiak oweam, era bambi karai baetam oweam, era apa karai bae oweam, eka jipa bomon atukapteteres. Are era fami eka atareapes bomon atukapteteres. 16Era oweam atakam era famiam, era ekaam, akoromes. “Bandaepurimomparo! Era owe baomep fe asan aemapmar Ipit dara bapor-ombar. Me Domba Jiiam jokoman pak dara baem-ombar. 17Me Armat Ipit amnuk, era jokoman andaemtamis bare, ere ememanse. Oweam, era Ipit amnuk bipu, ti baemewotem asan apok.” Emes atakam aesimes.
Currently Selected:
BAPOROMTAM ATAKAM 6: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
