BAPOROMTAM ATAKAM 20
20
Tahun 1.000 atakam
1Emesare, dere malaikat taka Surga oup aendae aporo. Are kakotenak jipa kunciam, rantai daytuam, aban atoome. 2Are paajis ii tamen pak ban akamimtaere, wanam tahun 1.000, rantai banam ajikitiiaarir. Era paajis ii tamen pak, ere tarai amber jisanek are. Are Bii Kapar Ipit. Are wan juasam Setan. 3Era malaikat, Bii Kapar Ipit, era kakotenak jipa bomon akoromtukume. Ararawa, era jipa jimsap, kunci aemapome. Wanam are pakkari era jimsap aemapome. Bii Kapar Ipit tapirmiin tapirmiin owe, tahun 1.000, potet botutum-ombar. Tahun 1.000 aemaptas ere, Tuhan, Bii Kapar Ipit asurumjisimtem. Me, are bajateemem apok.
4Emesare, dere owe baomep fe baemap asan tanane aporo. Allah, owe bajurusum atakam basakamtii fiak pak, era fe baemap asan aemapes owe, atetame. Bonaknak ere, wan owe Yesus atakam ateman atames. Are Allah atakam akoretames. Erarawa, owe, era owe kuus asakamtiiteteres. Era dambir atemes owe, binatang apaye, aeto apaye, basitim apok owe arare. Are owe era binatang juas wao abipis baeapom apaye, aban baeapom apaye, atii ates owe arare. Emesare, dere era dambir ates owe aanakot owe aporo. Ararawa ajaorwasites, wanam Kristus takan, atakam ara tapirmiin tapirmiin owe, tahun 1.000 asakamtamaaris. Era owe ajaorwasites, ere bonak bajaorwasit pak. 5Me wan dambir aemes owe ere, tahun 1.000 bajaorwasit apok aemes. 6Me bonak ajaorwasites owe, asan akot. Are owe turunak. Are asep dambir pak ombare apok. Era owe ere, Allaham, Kristusam, aTame pak baem owe aememtemas. Are Kristus takan, tahun 1.000 ajiire, atakam ara tapirmi owe aomeptemas.
Tuhan Bii Kapar Ipit bakumimosom atakam
7Emesare, tahun 1.000 asakeaptas, Tuhan, era Bii Kapar Ipit, ara bakimomep asan asurumjisimtem. 8Era Bii arawa, ara tapirmiin tapirmiin owe samane, potet batutum aesostem. Me wan owe samane juas Gog. Me wan ere, juas Magog. Bii Kapar Ipit era owe jii bajamom ajarisimapomtem. Era ajarisimapomto owe bisin tananenak tamen are. 9Era owe ara tapirmi asaniin asaniin apatostemas. Are era turunak owe aemaptas asanam, Allah afaimemar kotaam, afojomemtemas. Me, jisimak wonamo oup aendaeto, wanam era kota afojomemtas owe jisimak ambomtiikoromtem. 10Emesare, Bii Kapar Ipit potet era atutume ipit erare. Tuhan ere, Bii Kapar Ipit era daytinak jisimak bomon akoromtukume. Era ambapnak jis jee ambiimimar asan are. Era binatangam, era pote Allah atakam bakoretam ipitam, era aemapes asan are. Era asan ere, are jokam, eamam, ajirisaartemas.
Tuhan, owe ajiirenak bajurusum atakam
11Emesare, dere owe baomep fe baemap asan daytu fasar aporo. Denom era fe asan ten aemape Ipit aporo. Ara tapirmiam, era wonamo oupam, era Ipit bipu ajaniostemas. Emesare, are apok are. 12Dere era dambir aemes juas aptam oweam, juas apok oweam, era fe baemap asan bipu aememes aporo. Era fe asan ten aemape Ipit buku paratakopak awaramompe. Are wan buku taka awaramompe. Ere Jiinenak Aememaartas Owe Juas Aptam Buku erare. Erarawa, era buku paratakopak, dambir aemes owe, era aemaaris pak atakam are. Tuhanam, era owe aemaaris pak jipu, atakam basakamtii buku atakam jipu are. 13Era itimbup bwi dambir aemes owe, era bwi bomon asewasies. Era Dambir Owe Baemap Asan aemapes oweam ajises. Emesare, era dambir aemes owe takes ajaorwasites. Tuhan arawa, era owe era aemaaris pak jipu, bajurusum, atakam asakamtiie. 14Tuhan arawa, era dambir pakam, era Dambir Owe Baemap Asanam, era daytinak jisimak asan bomon akoromtukume. Era daytinak jisimak asan, ere dambir boem asan are. 15Wan owe, ajuas, era Jiinenak Aememaartas Owe Juas Aptam Buku bomon, ere apok. Tuhan, era owe, era daytinak jisimak asan akoromtukume.
Currently Selected:
BAPOROMTAM ATAKAM 20: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
