BAPOROMTAM ATAKAM 19
19
1,2Era malaikat emes atakam aesimerawa, dere wan atakam jane ajio. Era atakam, Surga oup owe tanane atakam daytu emes tamen are. “Aleluya! Tere Allah aeomay! Era jasipar taot era asan pota aemaarir pak, ere era tapirmiin tapirmiin owe ajurusumaarir. Allah ere, era jasipar taot ajurusuma. Bonaknak ere, era taotam Allah bambi karai baetam owe atakoromaarir. Allah ere, era taot aemaarir pak ajurusuma. Emesare, Allah era ajurusumar pak, ere turunak. Anom anakot pak erare. Erarawa tere Allah aeomay! Are Bajortaer Ipit. Are akotnak. Are fiaknak.” Emes atakam aesimes. 3Ararawa, atakam afaketaaes. “Aleluya! Tere Allah aeomay! Afaaosar jisamun oup apuetemetaarem.” Emes atakam aesimes. 4Emesare, Allah owe baomep fe baemap asan ten aemape. Me owe duturu 24am, era jatiaptam pak eak taka apokam, Allah bipu bi fop andaejiapteteres. Are Armat Ipit asitimes. “Atakamnak! Tere Allah aeomay.” Emes atakam aesimes.
Domba Jii petaesai pakambwi atakam
5Emesare, atakam, owe baomep fe baemap asan akorejisime. “Me tare Allah bambi karai baetam juas aptam oweam, juas apok oweam! Me tare Allah basitim juas aptam oweam, juas apok oweam! Tare takes tere daAllah aeomay.” Emes atakam aesime. 6Emesare, dere wan atakamam jane ajio. Era atakam, ajarisiapes owe tanane atakam tamen are. Anom bwi ajirirepue tamen are. Anom wur daytu ajare tamen are. Era atakam ere, “DaFiaknak Tuhan Allah takes aomepkoromum. Erarawa tere Armat Ipit aeomay. 7Jak akotnak aememamo. Dare Armat Ipit aakotipitnak aememeam, atakam akoreamo. Emesare, Domba Jii, petae bajiem bare eteemanse. Era ataetto taotam oorey bajuut eteemape. 8Allaham lenan kain fasar jerene tamen akotnak era taot bajiim atetame.” Emes atakam aesime. (Era lenan kain, turunak owe era akot pak aememas awar erare.)
9Era malaikat ere, atakam dera akoromen. “Allah, wan owe, Domba Jii petaesai pakambwi pak takan banda, atakam ajanime. Era owe, ere asan akot.” Wanam, “Ara atakam, ere Allah akore atakamnak are.” Emes atakam aesime.
10Derarawa, era malaikat basitim, abipu bi fop andaejiapo. Era malaikat ere, “Emes bas! Deraye woraye, wojoo oweam, Allah bambi karai baetam takan aemmarom. Dare takes Yesus akore atakamnak ajamkaimarom. Emesare, Allah asitimey. Yesus akore ateman, Allah atakam bakoretam owe atakam fe anakot.” Emes atakam aesime.
Kuda fasar beak ten aemape ipit atakam
11Emesare, dere era Surga oup ambuape aporo. Era asan kuda fasar aememe. Era kuda beak ten aemape Ipit juas “Turunak Ipit”. Armat Ipitam juas “Atakamnak Ipit”. Armat Ipit owe atakam asakamtiito apaye, jii ajamomto apaye, ere turunak pak jipu. 12Me abanamek, jisimak jee tamen apetatare. Kuus akotnak pak bajamapom tananeam akuus aemapes. Me damo kainam, ajuasam aeape. Owe ere, era juas amsam apoknak. Are a taka amsam. 13Era ajiimome baju jirao, esee daytu aptam. Armat Ipit juasam “Allah Atakam.” 14Era Surga oup tentara oweam era Ipit ajamkaies. Are kuda beak ten aemapteteres. Me apakaian, ere lenan kain. Era lenan kain fasarnak. Are atet apoknak. 15Jii warim fero aokone aemtepe. Era warim, era tapirmiin tapirmiin owe bakumimosom warim are. Me Armat Ipit, besi bino atoomemto, wanam Are era owe atakam asakamtamtem. Me Armat Ipitam anggur eek, era anggur bwi bawurumjisim asan, bai awurumjisimtem. Era asan, ere Allah jak ambapnak aememto pak asan erare. 16Me Armat Ipit juas wao, apakaianam, era aeam, apakeape. Era juas “Raja Ipit Anakot! Tuhan Anakot!” Emes juas are.
17Emesare, dere malaikat taka era jee ten aememe aporo. Are atakam daytu, era oupnak ajirifinetepes sakao takes afaketaae. “Deo! Ara asan ajaniapay. Me Allah pakambwi daytu pak takan banda. 18Tare raja owe damo dasa andetemakam. Tare tentara kapar oweam, fiak oweam, kudaam, era kuda beak ten baemap oweam, adamo dasa takes andetemakam. Emesare, tare asamot owe takes adamo dasa andetemakam. Tare era apa karai bae oweam, bambi karai baetam oweam, juas apok oweam, juas aptam oweam, era owe takes adamo dasa andetemakam.” Malaikat emes atakam aesime.
19Emesare, dere era binatangam, era tapirmiin tapirmiin raja oweam, ajaniapes aporo. Are era fasar kuda beak ten aemape Ipitam, era Ipit atentara oweam, jii bajamom ajaniapes aporo. 20Me, era Ipitam, atentara oweam, era binatang ajipirtaeres. Are era pote Allah atakam bakoretam ipit ajipirtaeres. Ararawa, era binatangam, era ipitam, daytinak jisimak asan bomon, jatiaptam akoromtukumes. Ere ambapnak jis jee ambiimiemar asan erare. Emesare, bonaknak ere, pote Allah atakam bakoretam ipit, era jinim bae pak, era binatang bipu aeme. Are era jinim bae pak, era binatang juas wao aptam owe, potet atutume. Emesare, era juas wao aptam owe, era binatang eto basitim owe erare. 21Era kuda beak ten aemape Ipit, aokone aemtepe jii warim, wan owe takes atakorome. Era sakao takes ere, era owe damo dasa daytinak andes. Erarawa are jak atukuapkoromes.
Currently Selected:
BAPOROMTAM ATAKAM 19: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
