IBRANI 7
7
Kristus anama Melkisedek atakam
1Melkisedek, kota juas Salem raja ipitin. Anom Oupnak Aemapar Allah, aTame pak baem ipitin. Abraham wan raja owe atajimirtiien. Atajimirtiierawa, aofasien. Melkisedekam, Allah asan akot Abraham batetam, atakam ajanimen. 2Me Abraham, atoome pak takes, persepuluhan, Melkisedek atetamen. “Melkisedek” juas atakam jow bauumtaer, ere “Raja Ipit Turunak” araren. Armat ipitam Salem raja ipitin. Anom atakam jow bauumtaer, “Pai Bae Raja Ipit” araren. 3Alkitab, Melkisedek Aritipit juasam, arsoot juasam, arfais juasam, bajititimar apok. Alkitabam armat ipit ajisamse baream, dambir aeme barema, atakam baesimtam apok. Armat Ipit, Allah Tame pak baem ipit aememaartem, emes tamen are. Erarawa are Allah Andep emes tamen are.
4Melkisedek, ere owe daytinak. Me darerokor Abrahamam, era tasa aetaae pak, persepuluhan, era ipit sai asaien. 5Me wan Lewi arurupis owe, Allah Tame pak baem owe aememesen. Ere Allah Atakamam, “Era owe, bambi owe apok, persepuluhan bataettas,” Emes atakam aeapoma. Me bambi owe ere, Lewi arurupis ajoo oween. Are Abraham arurupisin. 6Melkisedekam, Allah Tame pak baem owe awurpis ipit apok. Me, Melkisedek Abraham pak, persepuluhan ataeten. Abraham, Allah ataaji aee atakam aemome ipit are. Me, Melkisedek, Allah Abraham asan akot baem, atakam ajanimen. 7Allah asan akot baem atakam bajanimtam ipit, ere juas aptam ipit. Era asan akot aemapto ipit ere, juas apok. 8Allah Tame pak baem owe, persepuluhan ataatesen. Me, era owe, dambir aptam oween. Melkisedekam persepuluhan ataeten. Me, Alkitabam, “Melkisedek jiine ipit,” emes atakam aeapoma. 9,10Emesare, Abraham, Melkisedek bimnuk aemamtaeres ere, Lewi bajisames apoka. Are arerokor Abraham, adamo bomon aemanse emes tamen are. Erarawa Abraham era persepuluhan atetame ere, Lewiam persepuluhan atetame emes tamen are. (Me, Lewi arurupis, era persepuluhan ataatemas owe are.)
11Emesare, Lewi arurupis, Allah Tame pak baem owe aememesen. Allaham, aBasakamtam Atakam asamot owe ataetiitame, Are Lewi arurupis, era Basakamtam Atakam atakam bakoretamaar owe, ataemomen. Me Lewi arurupisam, Allah Tame pak baem owe anakot paememesaye, ere Allah, wan Allah Tame pak baem ipit, bataemom atakam apok aemen. Me, Are wan ipit botaemom atakam akoren. Era ipit, Harun tamen apoken. Are Melkisedek tamen aren. 12Allah, aTame pak baem ipit ai bataemom apaye, Are ai basakamtam atakam asamot owe aotetamtem. 13Ara atakam akoremar ai Allah Tame pak baem ipit, ere daTuhan are. Me, Armat Ipit wan saman Ipit. Era Ipit asaman owe, ere Allah Tame pak baem owe baemem, ere apoknaken. Era owe, Allah pak jis bajaatam joopu baemem, ere apoknaken. 14Me daTuhan, ere Yehuda saman Ipit. Musaam, Yehuda saman owe, Allah Tame pak baem owe baemem, emes atakam apoken. Owe takes amsam.
15Era akoremarom atakam ere, basonak: Wan Allah Tame pak baem ipit ajiteme. Era ipit, ere Melkisedek emes tamen are. 16Era ipit, Allah Tame pak baem ipit aememe, ere asamot owe basakamtam atakam jipu pak apok. Anom asamot owe atakam jipu pak apok. Armat Ipit ere, jiine baememaar fiak pak aptam. Erarawa are Allah Tame pak baem ipit aememe. 17Ere Alkitab atakam jipu: “Wore Melkisedek emes tamen, Allah Tame pak baem ipit, aememaartemarem.” Alkitab emes atakam aeapoma. 18Era tarai atakam, ere kumiti pak. Anom bambi pak. Erarawa Allah era atakam akarimtiie. 19Me Musa aeapome Basakamtam Atakam, owe, turunak, baemeemapomkorom asan apok. Ere pota. Emesare, Allah, akot jiirey baee pak, asamot owe atetamen. Era pak dare Allah eemnak bamesemkorom pak are.
20Allah era pak aeme ere, Are ataaji fiaknak aeen. “Era ataaji aeemin atakam jipu aemtemin. Pote apoknak. Dere aomaia.” Emes atakam aesimen. Me, Are Lewi arurupis owe, atakam ara Allah Tame pak baem owe ataemome ere, Are emes ataaji fiaknak baee apoken. 21Emesare, Allah ataaji fiaknak aee, wanam Are Yesus, aTame pak baem ipit ataemomen. Are atakam Yesus akoromen:
“Tuhan ataaji fiaknak aee. Are ai bimak binip botetaram apok aemtem.
Are atakamam: ‘Wore Allah Tame pak baem ipit aememaartemarem.’ Tuhan emes atakam akorem.”
Emes atakam aesimen. 22Emesare, Allah era ai ataaji aee atakam, akot. Era tarai ataaji aee atakam, ere pota. Yesusam, era ai ataaji atakam jipu baemkorom Ipit aememem. 23Wanam, bonak Allah Tame pak baem owe tanane. Are takes dambir aptam oween. Erarawa are era karai baememaar apoken. 24Me Yesus ere, jiine aememaartem. Erarawa Yesus Allah Tame pak baem bakari apok aemtem. 25Me Armat Ipit jiine aememaartem. Emesare, owe Armat Ipit era pak aportas, wanam are Allah eemnak ambesemkoromtas, Armat Ipit, era owe aortaerkoromtem. Are emes baem fiak pak aemommar. Are Allah bipu era owe atakam aojatotiitamaareme.
26Emes Allah Tame Pak Baem Ipit Daytinak, ere daipit erare. Armat Ipit ere turunak Ipit. Are pota pak baem amsam apok. Are dosa baem amsam apok. Armat Ipit apas. Dosa owe ere, apas. Allaham Armat Ipit Surga oupnak asan akot atoomtemete. 27Armat Ipit, wan Allah Tame pak baem owe daytu, emes tamen apok. Era owe, pak juiin afaafefemar Allah ataetiitama ajima. Ere adosa bimak binip bajanimemtam pak are. Yesus ere, pak takakope Allah atetame. Anom boem pak apok. Era pak, Armat Ipit salib wus oup dambir ateme pak are. 28Me Musa buku aeapome Basakamtam Atakam, kumiti asamot owe, Allah Tame pak baem owe daytu baemem, atakam are. Asep ere, Allah ataaji fiaknak aee, wanam Are Andep, aTame Pak Baem Ipit Daytinak baememaar, ataemomen. Anom Andep, Owe Bajortaer Ipit Turunak baememaar, ataemomen.
Currently Selected:
IBRANI 7: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
