IBRANI 12
12
Allah Daritipit atakam
1Emesare, banamek dara bataiomem owe tananenak, afojommaroas. Emesare, era akekemtaamaro pak takes, bakoromosomamo. Danom wuturu aemomparo dosa takes, bakoromosomamo. Dare ja putet ajamomtam pak, jak jirao aptam ja ajamtamamo. 2Danom banamek Yesus taka asakasimamo. Armat Ipit Allah eemnak bamesemkorom bimak binip atetamero. Are, dare Allah eemnak bamesemkoromaar, emes bimak binip atetamaaremaro. Armat Ipit era asep bare jak akotnak aemto pak aporen. Erarawa Are salib oup dambir batem, ombare baesos apoken. Are salib oup dambir batem damke bakem ombare apoken. Ararawa, waa Allah aemapmar asan bo poman aemapem.
3Tanom Armat Ipit aeme pak bimak binip atetaramay. Emesare, dosa owe, Armat Ipit, bifane daytinak afeomesen. Me Armat Ipit ere, jak fiak aememen. Erarawa, tanom damojip bas. Tanom jak basakamem bas. 4Me dosa pak bakumimosom aemporaarukum ere, waa ajiire, owe wusup esee tara batetaramtaapor apok. 5Emesare, tare Allah arereis. Tare ere, Allah ataane tara aweomen atakam, bimak binip etejanimemekemane? Era atakam ere:
“Detii! Tuhan wora ajurusumtan, ‘Era pak bambi pak,’ emes bimak binip batetaram bas. Are wora ajatemotaertan, jak basakamem bas.
6Emesare, Tuhan afaimemar owe takes, ajurusumum. Are era ataete jii takes, wusup atemar emes tamen are.”
Allah emen atakam aesime. 7Era ajirisemmakam pak, ere Allah tare akot pak baem aememtameman. Tare Allah arereis. Erarawa Are era pak tara aemomemman. Asamot duturu owe takesam, arereis ajurusumemas. 8Jii takesam ajirisememas. Erarawa Allah tara bajurusum apok aemtan apaye, tare arereis apok. Tararawa, tano tapes jii emes tamen are. 9Me darisare ajurusumeroes. Me, dare era owe asitimom. Emesare, danom Surga oup Daritipit atakam ji baekorom. Dararawa, jiine aetemarom. 10Darisare, dara atajuumeroes bare arke apok. Ere era akot apores pak jipu. Me Allah atajuummaro pak ere, asan akot dara batetam pak. Anom dare turunak owe, Allah turunak pak jipu, baemapom pak. 11Owe dara atajuumtaroas, era pak dare jak pota baemapom pak aporemarom. Ere jak akot baemapom pak apok aporemarom. Era batajuum pak ere, dare akot pak baem baememtam pak. Erarawa asep bare, era batajuum owe, owe akot aemememas. Are ji baem jak owe aemememas.
12Emesare, taban tomor, fiak aememay. Me tajindi kumitiam, fiak aememay. 13Tanom era turu bokotpu ajaraaray. Erarawa tabai pota, potanak baemap apok aemtem. Are ajaortem.
Ataane baowe atakam
14Tanom owe takes akipimtaerporay. Tanom owe turunak aememporay. Me turu apok owe, Tuhan bi bapor apok aemtemas. 15Tanom turuar! Me tarmamon wan owe, Allah atetammar asan akot, batoomem apok-ombar. Era asan akot batoomem apok owe, owe bifane afeomemas. Are owe asan pota aememas. Erarawa owe tanane pota pak aememas. 16Turuar! Me tarmamon wan owe, asan pota pak baem-ombar. Are Esau emes tamen, Allah bamesem apok owe baemem-ombar. Me Esau aritipit, asan akot Esau batetam aememen. Me Esau ere, era pak, banda pak takakope auumtaeren. 17Asep arawa, are, aritipit asan akot pak batoomem, jak aseseromen. Are era pak bate aptam ambaten. Allah ere, Esau era pak batoomem potan. Esauam era pota aeme pak, akot pak boem, aempore apoken. Tanom era atakam tamsam.
18Tare Israel owe aemes pak baem apok. Era owe era fami juas Sinaipu ambaremesen. Era fami, ere jip pak apok. Ere ban bakurum pak. Era asan ere, are jisimak jee daytinak aporesen. Era asanam jiitinaken. Anom wompas tamen apoken. Buiam daytinaken. 19,20Era oweam fwi jane ajiesen. Are atakam daytinak jane ajiesen. Me wan atakam ere, “binatangam ara famipu ajinaoto, tare eka era binatang pae akomtiiay.” Emes atakam aesimen. Era oweam, emes atakam ombare daytinak ambaresen. Erarawa are era atakam jane bojie bas, emes atakam fiak Allah ajanimesen. 21Era apores pak, ere ombare daytinak pak eraren. Erarawa Musaam, “Dere ombare daytu. Denom damo di tamen dimin.” Emes atakam aesimen.
22Tare ere, era fami juas Sionpu ambaremekem. Ere Jiine Allah akota asan are. Era kota Surga oup kota Yerusalem are. Tanom ajarisiapes malaikat owe tananenak bipuam ambaremekem. Era malaikat owe takesam jak akot aememes. 23Tanom Allah basitim ajarisiemes owe bipu ambaromekem. Era owe, ere Allah biiti jii erare. Era owe juasam Surga oup buku bomon aemapes. Tanom Allah bipu ambaromekem. Armat Ipit, owe takes adosa, atakam basakamtii Ipit. Tanom, era Surga oup turunak owe ajip bipu, ambaromekem. Era owe, era jiirey aeaaris asan akot, etetoomemkoromes. 24Tanom Yesus bipu ambaromekem. Armat Ipit, Allaham, asamot oweam, atakam ajomattame. Allahrawa, era ai ataaji aee. Tanom Yesus aesee aturumapome asanpu ambaromekem. Me aesee, ere akot pak aemapome. Me Habel ajirimdaeme esee ere, pota pak aemapomen.
25Emesare, tanom turuar! Tare era atakam akoremar Ipit bawotapem bas. Bonak ere, Allah, ara aemansa tapirmi owe atakam akoretamen. Me Armat Ipit atakam aooes owe ere, batakey apok aemesen. Emesare, dare Armat Ipit Surga oup ataendaemmar atakam aootam, danom baemetakey asan apoknak. 26Bonak ere, Armat Ipit akore atakam, ara aemansa tapirmi asiisimen. Japen ere, Armat Ipit ataaji aeen. “Bare takakope ere, Dere ara aemansa tapirmi aosiisimtemin. Me, era taka apok. Dere wonamo oupam asiisimtemin.” Emes atakam aesimen. 27Era atakam, “bare takakope” apormarom are. Dararawa, Allah era akenemapome pak asiisimto aportemarom. Danom Armat Ipit era pak ajanimosomto aportemarom. Erarawa, Allah basiisim apok pak, emes ajakajiraptem. 28Emesare, Allah dare baemesiisim asan apok aobaomep tapirmi atetamaro. Erarawa dare terima kasih atakam akoromamo. Danom Armat Ipit jinim daytu aeamo. Danom ombare aptam Armat Ipit asitimamo. Armat Ipit akot apormar pak jipua. 29Emesare, daAllah, pak jisimak bamomtiimkorom emes tamen aememem.
Currently Selected:
IBRANI 12: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
