IBRANI 11
11
Allah eemnak ambesemkorommas owe atakam
1Dare Allah eemnak ambesemkorommarom. Erarawa dare Allah da jiirey aeemarom pak dara batetam, ere damsamnak. Danom wan baso apok pak baemepor asan apok. Me, dare Allah eemnak ambesemkorommarom. Erarawa, era baso apok pak, ere damsamnak. 2Me darfaisomaram Allah eemnak ambesemkoromesen. Erarawa Allah era owe akot aporen.
3Bonaknak ere, Allah atakam akoren. Erarawa ara tapirmi ajitamsen. Era owe baemepor asan apok pak, apores pak ajaoramsen. Emesare, dare Armat Ipit eemnak ambesemkorommarom. Erarawa era pak atakamnak apormarom.
4Habelam pak Allah ataetiitamen. Armat ipitam Allah eemnak ambesemkoromen. Erarawa era pak, pak akot aemansen. Me Kainam pak Allah ataetiitamen. Era pak ere, pak pota emes aemansen. Allah, Habel Ara ataetiitame pak, akot aporen. Erarawa Are Habel turunak ipit, emes atakam akoren. Me Habelam dambir atemen. Me, armat ipit Allah eemnak ambesemkorommen. Erarawa waaam owe Habel aeme pak, atakam jane ajiemas.
5Henokam Allah eemnak ambesemkoromen. Erarawa armat ipit dambir baem apoken. Allah armat ipit Surga oup bambi atoomtemeten. Erarawa oweam armat ipit baemedimartaer asan apoken. Alkitab atakamam: “Allah Henok batoomtemet apok ere, Allah armat ipit akot aporen.” Emes atakam aeapomen. 6Allah, ara bamesem apok owe, owe akot, emes atakam baemekore asan apok. Emesare, Allah aemeta. Are asan akot Ara andimarmas owe atetamum. Me Armat Ipitpu ambaremtas owe, emes atakam eemnak bamesemkoromtas.
7Allaham era aemto pak, atakam, owe akoretamen. Me Nuh ere, Allah eemnak ambesemkoromen. Erarawa are era atakam ji aeen. Wanam, are ti daytu tame aptam akenemapomen. Emesare, armat ipitam, atame oweam, era ti bomon ajuapesen. Erarawa Nuh Allah bamesem apok owe takes, dosa daytu owe, emes aporomtamen. Emesare, armat ipit Allah eemnak ambesemkoromen. Erarawa Allah, armat ipit, turunak ipit aemapomen.
8Allaham, Abraham, atapirmi beken bajios, wanam Allah ara atetamto tapirmi baesos, atakam asakamtamen. Me Abrahamam Allah eemnak ambesemkoromen. Erarawa are era atakam ji aeen. Are atapirmi beken ajiose ere, are era aesosto asan amsam apoken. 9Allaham, tapirmi Abraham batetam, ataaji aeen. Abrahamam Allah eemnak ambesemkoromen. Erarawa are Allah atetame tapirmi, kaaowe tamen, aemapaaririn. Me armat ipitam, Ishakam, Yakobam, pitini tame bomon aemapaarisin. Allaham Abraham ataaji aee atakam taka, ataaji Ishakam, Yakubam, aeen. 10Me Abraham ere, jiine kota, banamek apemen. Allaham era kota abimak binip akukuretiien. Are era kota akenemapomen.
11Emesare, Abraham emak fiaknak aememen. Aremo Saraham peree taot aemapen. Me, armat ipit Allah eemnak ambesemkoromen. Erarawa Allah jii bafim fiak pak, armat ipit atetamen. Me armat ipitam, Allah era ataaji aee atakam eemnak ambesemkoromen. 12Me Abraham emak fiaknaken. Erarawa adambir bare setepen. Me, are arurupisam, arereisam tananenak aemomen. Me arurupis owe, era wonamo oup baet tananenak, emes tamen aememesen. Are bisin tananenak, emes tamen aememesen.
13Emesare, era owe takes, dambir aemes bare ajiire, Allah eemnak ambesemkoromesen. Are, Allah ataaji aee atakam, batoomem apoken. Me, are, Allah era ataaji atakam era asep owe batetam, emes aporesen. Ararawa, jak akot aememesen. Are atakam baso akoresen. “Dare ara aemansa tapirmi, kaaowe tamen aememmarom. Dare ara aemansa tapirmi bajakajirem apok.” Emes atakam aesimesen. 14Emes atakam akoremas owe, atapirmi andimarmas, emes aporomtammas. 15Era oweam, beken ajioses tapirmi, bimak binip batetaram apoken. Me tapirmi bimak binip aotetarames ere, are era tapirmi bofasi asan akot aememesen. 16Era owe ere, akotnak tapirmi baesos, jak aseseromesen. Ere Surga oup tapirmi aren. Emesare, Allah, era owe, “Allah daAllah,” emes bajie, ere damke apoken. Are kota taka era owe akenemapomtamen. 17,18Erarawa, Allah, Abraham aemporen. Me Abraham, Allah eemnak ambesemkoromen. Erarawa are Ishak Allah ataetiitamen. Bonak ere, Abraham, Allah ataaji aee atakam, atakam jane ajien. Era atakam, “Ishak, wururupis afimtem.” Allah emes atakam aesimen. Me, Abraham, Ishak, Allah batatiitam, aememen. 19Me Abrahamam, bimak binip atetaramen. “Allah, Ishak bajaoromwasumtum fiak pak aptam.” Emes bimak binip atetaramen. Emesare, Abraham, Ishak, dambir aeme ipit emes tamen, aotaeren.
20Me Ishakam Allah eemnak ambesemkoromen. Erarawa are, Allah, asan akot, Yakub anama Esau asep bare batetam, atakam ajanimen.
21Me Yakubam Allah eemnak ambesemkoromen. Erarawa are dambir baemken aememe ere, are Allah, asan akot, Yusuf oorey jii poretetama bajie, atakam ajanimen. Are awaku pak aisitoome, wanam, “Allah! Wore akot,” emes atakam aesimen.
22Me Yusufam Allah eemnak ambesemkoromen. Erarawa are dambir aemto bare setepnak apore, are Israel owe Mesir tapirmi beken ajiosto pak, atakam akoren. Are era owe, armat ipit embak batuomas, atakam asakamtamen.
23Me Musa aritipit anama arsoot Allah eemnak ambesemkoromemisen. Emesare, Musa ajisamse, aritipit anama arsoot era jii pir bamintep asaimapomemisen. Are era jii akotnak aporemis aren. Are raja atakam baoo, ombare apok aemememisen.
24Me Musaam Allah eemnak ambesemkoromen. Erarawa are sira awoteme, are, oweam, “Aememe ipit Firaun aparais andep,” emes bajie potan. 25Are, Allah aowe, takan bajirisem, akoten. Wanam are jak akot pak baemapom dosa, bare takakopeam bajamkai potan. 26Abimak binip ere, “Kristus bajamkai, wanam owe tame dera bata, ere akot. Me Mesir tapirmi pak daytu baemomem ere, pota.” Emes bimak binip atetaramen. Emesare, Armat ipit Allah era asep bare ara atetamto pak, banamek apemen.
27Me Musa Allah eemnak ambesemkoromen. Erarawa are Mesir tapirmi beken ajiosen. Are raja ipit jokoman aemto pak, ombare apok aememen. Are Mesir tapirmi bofasie potan. Emesare, asamot owe, Allah baemepor asan apok. Me, Musa aeme pak, are Allah bi apore emes tamen are. 28Me Musa Allah eemnak ambesemkoromen. Erarawa are Paskah Pakambwi ji aeremapomen. Emesamare are owe, esee, era tameiin tameiin jimsap wuspu baturumapom, atakam asakamtamen. Era esee Batatii Malaikat Israel biiti jii batatii-ombar esee araren.
29Me Israel oweam Allah eemnak ambesemkoromesen. Erarawa Esakam Itimbup Bwi era bwiam ajampamamtaeren. Era owerawa, se fiak emes tamen, poman awarimjiresen. Me, Mesir owe ere baokorjir aempores, are bwi dambir atesen.
30Me Israel owe Allah eemnak ambesemkoromesen. Erarawa are kota Yeriko bafafasie, bare poman ban jamnuk afojejares ere, era kota eka tiri bap ajondaeansen. 31Era fekore taot juas Rahab, Allah eemnak ambesemen. Erarawa are, Israel tiruu basiepor owe, asan akot atoomjiien. Asep arawa, Israel owe, Allah atakam baoo owe atajimirtiies, are era taot batatii apoken. 32Dere ere, wan emes atakam bakore ape? Dere Gideonam, Barakam, Simsonam, Yeftaam, Dautam, Samuelam, Allah atakam bakoretam oweam, atakam bakore, bare ere apok. 33Era oweam Allah eemnak ambesemkoromteteresen. Erarawa are jii owe samaniin akumimosomesen. Are turu pak aemesen. Are Allah ataaji aee atakam atoomesen. Are singa okone akapimompesen. 34Are daytinak jisimak asapimesen. Kaaoweam, jirao warim, era owe basesakam aememesen. Era owe ere, ajoremesen. Are owe kumiti aememesen. Me, Allah, fiak pak, era owe atetamen. Are jii owe jii aemes ere, jokoman daytu aememesen. Are setep apok tapirmi jii owe akumimosomesen. 35Tapes ajoo oweam dambir ates ere, Allah wan owe ajaoromwasumtumen. Me tapes arawa, era owe, asan akot ataeresen. Owe, wan owe ajurusumtiiesen. Me owe, era owe, asan akot basurumtam, atakam akoramesen. Era owe ere, asan akot baesos potan. Are bajaorwasit, wanam akot jiine baememaar, akoten. 36Me owe, wote wan owe awotomesen. Are wusup era owe atesen. Are owe rantai banam ajikapomes, wanam buji tame bomon ataejiimesen. 37Are wan owe eka asampirimesen. Are wan owe damo, gergaji asesakamtiiesen. Are wan owe jirao warim asakamtiiesen. Me wan oweam, domba pitini kope apaye, kambing pitini kope apaye, ajiimomes, wanam atawejaresen. Are pak apok aememesen. Me owe era owe ajurusumesen. Are pota pak era owe aemesen. 38Ara aemansa tapirmi owe ere, ajirisemes owe, awar apoknak. Emesare, era ajirisemes owe, era tame apok asanam, era fami asanam, bambi atawejaresen. Me atame, ere eka jipa anama tapirmi jafa aren.
39Emesare, era owe takes Allah eemnak ambesemkoromteteresen. Erarawa Allah era owe akot aporen. Era owe ere, Allah ataaji aee atakam, batoomem apoken. 40Allaham dabimak binip atetaramen. Ararawa, bimak binip akotnak akukuretiien. Era bimak binip ere, era owe, asan akotnak, apa batoomem apoken. Danom, era oweam, asan akotnak takan atoomemtemarom. Emes bimak binip akukuretiien.
Currently Selected:
IBRANI 11: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
