GALATIA 5
5
Kristus asurumtamero atakam
1Emesare, Kristus asurumtamero. Armat Ipit, dare asurumtamero owe anakot, emes baememaar, akot ajim! Erarawa tare emes ajakajiremay. Tanom era wuturu pak Yahudi owe basakamtam atakam bomon boemap bas.
2Emesare, dere Paulus. Era surat aeapommin atakam jane pajiay. Owe Yahudi owe pak tai tamane pitini basakamosom tara aemtan apaye, Kristus tara aemtamen pak takes, ere bambinak. 3Denom atakam fiak tara aokorommin. Era Yahudi owe pak tai tamane pitini basakamosom owe takes, Musa Basakamtam Atakam Buku atakam takes ji baekoromtas. 4Tare Kristus ambomemekem. Tare, “Allah ere, Musa Basakamtam Atakam Buku atakam ji bae owe, turunak owe, emes atakam asakamtiiar,” emes atakam eemnak apormakam. Emesare, tare, Kristus bambi atetamemar asan akot, beken ajiosekem. 5Dare ere, era jiirey aeemarom atakam banamek apeomemmarom. Me Allah Jipam era pak baem jak fiak atetamemaro. Emesare, dare, Allah, dare turunak owe, emes atakam basakamtii, jiirey aeemarom. Ere Kristus eemnak ambesemkorommarom are. 6Me Kristus Yesus ajamkaimarom owe damon, Yahudi owe pak tai tamane pitini basakamosom oweam, tamane pitini basakamosom apok oweam, ere awar. Kristus eemnak bamesemkorom ere, anakotnak pak. Era eemnak ambesemkorommas oweam, owe afaimemas.
7Bonak ere, tare Kristus bajamkai akot aemekem. Ere tara akekemtaaen owe ere, tanam? 8Allah tara ajateman. Me, tara atatapimtaaen ipit ere, Allah apok. 9Tarmamon ipit takakope pota pak aemto, tanom takes pota aemapmakam. 10Deraye taraye, dare Tuhan aowe. Erarawa dere ta jiirey aeetemin. Debimak binip ere, tare debimak binip awar aotetaramtemakam. Tara ajurusumman ipitam, juas aptam ipita apaye, bambi ipit apaye, Allah era ipit ajurusumtem.
11Wan owe ere, “Paulusam, ‘Yahudi owe pak tai tamane pitini basakamosom apok owe baemejorem asan apok,’ emes atakam waa aemansaram akoretamum.” Emes atakam aesimemas. Dere ere, emes atakam apok. Dere emes atakam apok ere, owe, waa ajiire dera ajurusummanis. Dere emes atakam akoretammin apaye, owe dere Kristus salib wus oup dambir ateme akoretamtey atakam, bifane dera bafeomem apok. 12Emesare, era Yahudi owe pak tai tamane pitini basakamosom atakam tara akoromman owe, abisak basakamosomtetertas. 13Dejoo owe akotnak! Kristus, tare era Yahudi Basakamtam Atakam damon boemap apok, emes ajaten. Tare era Basakamtam Atakam bomon boemap apok ere, tanom era asamot jak basenomem pak jipu baem bas. Tare ere, ajamfaimamay. Wanam asan akot ajamemamay. 14Musa Basakamtam Atakam Buku atakam takes, ere Basakamtam atakam takakope tamen. Era basakamtam atakam taka ere, “Wore owe, damo woma afaimemarem, emes tamen afaimey.” Allah emes atakam asakamtamum. 15Me, tare juuri tamen tarmamon ajamjurusumamtakam apaye, turuar. Tare bajamjurusumamkorom-ombar.
Asamot jak basenomem pakam, Allah Jip jak basenomem pakam, atakam
16Era akoremin atakam ere, Tare Allah Jip atakam jipu aemaaray. Erarawa tare ere taasamot jak basenomem pak jipu baem apok aemtemakam. 17Me asamot jak basenomem pak, Allah Jip atutumum. Me Allah Jipam era asamot jak basenomem pak atutumum. Emesare, era jamnuk ajamomemamis. Erarawa, tare era akot apormakam pak jipu baem apok. 18Tare Allah Jip atakam ji aetakam apaye, ere tare era Musa Basakamtam Atakam damon boemap apok.
19Era asamot jak basenomem pak, ere baso. Ere okore are. Asan pota pak baem are. Bambi potanak pak baem are. 20Eto basitim are. Tapak pak baem are. Bifane are. Owentakam are. Owe bet baeom are. Atataren fef are. Owe adamo bimak binip taka bajanimomem are. Atakam bajamkoram are. Owe bajampapamamtaa are. 21Owe pak itim bakeomem are. Bir bwi banda jaytu are. Pota pakambwi baem are. Me wan emes pota pakam baem are. Emesare. Emesare, bonak ere, dere ataane tara aoweomo. Waa are, denom ataane tara aoweommin: Me emes pak baem owe, Allah aobaomep owe akot pak basamo baemeta asan apok owe.
22Me, Allah Jip aemomemtas owe, are emes owe aememtemas: Are bafaim jak atetamum. Are jak akotam, ji baem jakam, jak jiraoam, atatastu jakam, akot pak baem jakam, atakamnak bakore jakam, emes pak atetamum. 23Are tayieakot jakam, jak fiakam, atetamum. Emesare, owe emes pak baem, era agama basakamtam atakam buku atakam baoo pak apok. 24Wan owe, Kristus Yesus aowe. Era owe ara asamot jak era salib wus oup ataetopomteteres emes tamen are. Ere, era asamot jak, asan pota pak baemam, pota pak baemam, asenomem. 25Me Allah Jip ai jiine atetamteterero apaye, emesare Are dara baemomemkoromtaro. 26Dare damba baemetemtem bas. Danom darmamon atakam bajamtutumamat bas. Danom darmamon itim bajamkakeamat bas.
Currently Selected:
GALATIA 5: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
