GALATIA 4
4
1Era akoremin atakam ere, asamot owe ere, andep aritipit pak atoomemtem. Era pak takes era aapak. Me, era ipit jiikope aememar apaye, owe era bambi karai baetam ipit awar aememas. 2Era jii abanamek batai owe, atakam ji aeem— era pak aritipit atakam asakamtiie bare ajiire. 3Danom emes aemom. Dare jiikope emes tamen aememom. Emesare dare ara aemansa tapirmi bii atakam ji aeom. 4Me, Allah asan akot bare apore, Are Andep ataendaeme. Asamot taot Andep ajisipetiie. Andepam era Yahudi owe basakamtam atakam bomon aememaarir. 5Era pak aeme, ere era Yahudi Basakamtam Atakam bomon baemem owe bajortaer atakam are. Ere dare Allah arereis baemem atakam are.
6Tare Allah arereis. Erarawa Armat Ipit, Andep aJip, dajak bajiiapteter ataendaeme. Me Allah Jipam, “Dot! Deritipit akotnak.” Emes atakam aesimeme. 7Emesare, tare bambi karai baetam owe emes tamen boemem apok. Tare Allah arereis aememmakam. Allahrawa, arereis atetammar pak tara atetamman.
Paulus, Galatia owe aemes pak, bimak binip daytu atetarame atakam
8Me, bonak ere, Allah tamsam apok aememaarukum. Tare era juein owe atakam ji aekoromaarukum. Era juein oweam Allah apok. 9Waa ere, Allah tamsam. (Era taka apok. Allaham tare tamsam.) Erarawa, tare ara aemansa tapirmi bii aojamkaimakam wama tamenem? Era bii kumiti. Are pota. Tare era bii atakam ji boekorom akot ajimakam wama tamenem? 10Tare agama bare daytu, atakam ji aekoromemakam. Tanom agama pir daytu atakamam, agama tahun daytu atakamam, ji aekoromemakam. 11Dere era aememakam pak apormin ere, dere jak pota aememmin. Dere tare Yesus Kristus bajamkai, karai daytinak aeaaru. Me, era pak bambi pak apeno.
12Emesare, dere ta tamen aememo. Erarawa tanom de tamen aememay. Dere tare emes baem atakam fiak ajanimmin. Emesare, tare pota pak dera baem apok aemenkum. 13Bonak ere, dere damo pota ajirisemo. Erarawa, dere tatapirmi aemapo. Emesam, dare Allah Akot Atakam tara akoretamo. Tanom emes tamsam. 14Me dedamo pota aemapo pak, tara ajurusumen. Emesanare, tare bifane dera bafeomem apok aemenkum. Tanom dera bootapem apok aemenkum. Tare, dere malaikat emes tamen atoomjiienkum. Tanom dere Kristus Yesus emes tamen atoomjiienkum. 15Denom era aemenkum pak ateman atammin: tare tabanamek basumtaer wanam dera batetam, aememekem emes tamen are. Me, tare emes baemeem asan apok. Waa ere, era jak akot aememekem pak ete? 16Dere atakamnak tara akoromo. Erarawa dere tajokoman ipit aememo apaye?
17Me pote atakam baememtam owe ere, pas tara afaimeman. Era owe ere, turu owe apok. Era owe, tare ara bafaim, jak aseserommas. Erarawa are tare dera bajamkai potan. 18Tare akot pak baem, ere akot. Juiin afaafemar era pak baem akot. Era pak baem, dere tare takan baemem bare taka bas. 19Tiparaise! Jii bapeap tapes damo asesa aemapemas. Denom emes tamen are. Dere tare Kristus bajamkainak apok apormin are. Erarawa dere jak pota aememmin. Me, tare Kristus bajamkainak aemtakam, era bare dere jak akot aememmin. 20Era aemmakam pak, ere dere bimak binip arke. Erarawa dere tare, waa takan baemem ere, akot. Dere ara atakam surat baeapom pota. Dere atakam bipu bajamkoram, emes akot.
Hagar anama Sara atakam
21Tare Musa Basakamtam Atakam bomon baemem owee! Atakam bakoretamani. Tare Musa Basakamtam Atakam Buku atakam jane bajie apok ape? 22Musa Basakamtam Atakam Buku atakam ere: Abraham oorey jii jamnuk afimen. Me wan taka, bambi karai baetam taot ajisipetiien. Me wan ere, era apa karai aee taot ajisipetiien. 23Emesare, bambi karai baetam taot, bambi jii ajisipetiien. Me, bonak ere, Allah, jii, Abraham batetam, emes ataajie aeen. Emesare, apa karai aee taot Allah ataaji aee jii ajisipetiien. 24Ara atakam, baetaa atakam awar. Era taot amnuk Allah ataaji aee ataaji jamnuk awar. Armat Ipit wan ataaji era fami juas Sinai oup aeen. Era taot juas Hagar emes tamen are. Era ajisipetiimar jii, bambi karai baetam owe aememmas. 25Me Hagar era Arab tapirmi fami juas Sinai emes tamen are. Are aemansa kota Yerusalem emes tamen are. Me Yerusalem owe, era bambi karai baetam owe emes tamen are. 26Era apa karai aee taot ere, wonamo oup Yerusalem emes tamen are. Are dersoot emes tamen are. 27Emesare, Alkitabam:
“Era peree taote! Wore jii bajisipetii apok. Me, jak akot aemapey.
Wore ju bajasir apok. Me, sia akey.
Emesare, armo era taot beken ajie. Me, are jii tanane ajisipetiim. Era oorey aptam taot arawa, jii tanane apok ajisipetiim.”
Alkitab emes atakam aeapoma.
28Dejoo owe akotnak! Allah, Ishak, Abraham batetam, ataaji aeen. Emesare, danom Ishak emes tamen are. Allah dare arereis baemem ataaji aee. 29Era baream, bambi ajisamse jii, Allah Jip atetame jii ajurusumen. Waaam era owe emes taka dara aemmaroas. 30Me, Alkitab wama atakam koremar? Alkitabam: “Bambi karai baetam taotam, andepam, bawutiijisimey. Me bambi karai baetam taot andepam, apa karai bae taot andepam, aritipit pak takan batoomem bas.” Alkitab emes atakam aeapoma. 31Dejoo owe akotnak! Dare bambi karai baetam taot arereis apok. Dare ere, apa karai bae taot arereis.
Currently Selected:
GALATIA 4: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
