2 KORINTUS 4
4
Dare fiak apok. Allah ere, fiaknak atakam
1Emesare, Allah soro ajiomero. Ararawa, akarai baetam ataemero. Erarawa dare jak sake apok. 2Me wan tiruu pak, ere damke pak. Danom era pak awotapemom. Danom potet batutum apok. Danom Allah atakam akoretammarom, pote atakam apok. Dare ere, era atakamnak baso akoremarom. Erarawa, dare, owe takes dare owe turu apaye, owe jaos apaye, emes baoorpor aememmarom. Erarawa Allah era aemmarom pak takes amsam. 3Wan owe, ere, akoretammarom Allah Akot Atakam Bimak binip batomomem apok. Era owe ere, danais baemtii owe. 4Ara aemansa tapirmi juein owe, Kristus bamesem apok owe, bimak binip jiiti aemapome. Era owe, Allah Akot Atakam, jane bajie-ombae. Era Akot Atakam, ere Kristus akotipitnak pak atakam are. Me Kristus, Allah bi awarnak. 5Danom daoememom atakam bakoretam apok. Era akoretam atakam ere, “Yesus Kristus, ere Tuhan. Danom takarai baetam owe. Yesus emes akot pak aema.” Emes atakam aesimmarom. 6Emesare, Allah atakam akore, “Era jiiti asan, sare basaramto.” Emes atakam aesimen. Me Allah takaam, asare, dajak bomon asaramtamero. Ere dere Allah akotipitnak pak baporkorom are. Me Kristus bi, ere Allah akotipitnak pak aporomum.
7Dare era akotnak pak ere dadamo bomon aemompom. Me dadamo ere, akot apok. Are sekumkum pak tamen are. Me, owe emes aportas, are era fiaknak pak dapak apok aporemas. Ere Allah pak aporemas. 8Owe dara bajurusumkorom aemememas. Me, are dara bakumimosom apok. Dare bimak binip arke atetaramemarom. Dare ere, jak sake apok. 9Owe dara ajurusumemaroas. Allah ere, beken dara bajios apok. Owe dare bap andaebumtiiemaroas. Dare ere, dambir apok. 10Owe Yesus atatiies, oweam dara batatii atakam akoreaaremas. Erarawa, owe, Yesus ajaorwasite fiak pak, dadamo bomon aemompom apormas. 11Dare jatiaptam ara aememmarom. Dare Yesus karai aeetammarom. Erarawa juiin afaafemar, owe dara batatii atakam akoremas. Erarawa, owe, Yesus jiine pak, dadambir aptam damo bomon aemmpom apormas. 12Emesare, dambir jati daytu aeomaro. Me, era pak ere, jiinenak jati daytu tara aeoman.
13Me Alkitabam, “Dere Allah jiirey aeeo. Erarawa dere atakam akoreo.” Emes atakam aeapoma. Danom Allah jiirey baee jak are. Emesare, dare Allah jiirey aeemarom. Erarawa atakam akoremarom. 14Allah, Tuhan Yesus ajaoromwasumtume. Are dare Yesus takan ajaoromwasumtumtemaro. Are daraye taraye Armat Ipit bipu ataemomtemaro. Dare emes apormarom. 15Era ajirisemmarom pak, ere asan akot tara batetam are. Me Allah asan akot baem owe betema betema ajitas, are terima kasih atakam Allah bakorom betema ajitemas. Era pak Allah eemnak bamesemkorom are.
Dare wonamo oup jiine tame batemetejiiap atakam
16Emesare, dare jak sake apok. Me dadamo, ere kumiti akumiaaremarom. Me, juiin afaafemar, Allah dajak bomon pak, fiak akakaimapomemaro. 17Dare ajirisememarom. Erarawa asep bare dare jak akotnak pak atoomattemarom. Era ajiresememarom pak, ere akaritem. Me era jak akotak pak ere, jiinenak aememaartem. Era ajirisememarom pak, ere kope. Era jak akotnak pak ere, daytinak. Erarawa are awar apok. 18Dare ara aemansa tapirmi baso pak, banamek bapeomep apok. Dare ere, baso apok pak banamek apeomepkorommarom. Me baso pak, ere ajaniostemas. Me baso apok pak ere, emes aememaartemas. Dare emes apormarom.
Currently Selected:
2 KORINTUS 4: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
