2 KORINTUS 3
3
Owe, Allah ai ataaji aee atakam, woe baememtam atakam
1Era akoremin atakam, dare damba baemetemtem ape? Emesare, owe wan owe surat baeapomtam atakam ajanimemas. Era surat atakam, “Emes ipit, turunak ipit,” emes atakam aesimum. Tare dare emes surat batoomem, wanam era surat tara baporomtam, emes atakam ajanimmakam apaye? Dare tare emes surat dara baeapomtam, atakam ajanimmarom apaye? 2Tare dare turunak owe, emes atakam surat tamen aemapakam. Emesare, dare tara afaimmarom. Owe takesam era surat baca aemas tamen are. Owe takes era surat apormas tamen are. 3Tare, Kristus aeapome surat tamen aemapakam. Ere basonak. Tare, dare Kristus karai aetamom pak aemapakam. Kristus era surat aeapome, ere tinta baeapom surat apok. Ere jiine Allah Jip aeapome surat are. Are era surat wao, eka pwe ten baeeapom apok. Are era surat ere, asamot jak bomon aeapome.
4Dare Kristus aeme pak apormarom, wanam Allah jiirey aeemarom. Erarawa dare era atakam akoremarom. 5Dare ara karai damba baee asan apok. Allah ere, ara karai fiak pak atetamero. 6Allah dare era ai ataji aee pak, atakam owe baememtam, emes fiak pak atetamero. Era ai ataaji aee pak ere, surat wao aptam basakamtam atakam apok. Era ai ataaji aee pak, Allah Jip aemmar pak are. Era wao aptam basakamtam atakam, asamot owe dambir batem pak aporomtame. Me Allah Jip ere, jiine pak atetamum.
7,8Me, Allah abasakamtam atakam ataetiitame ere, wao eka ten aeapomen. Era asan aememes owe, Allah asare aporesen. Musa abiam sarenak aememen. Asep arawa, abi sare, sare apok emes aoememen. Me, Israel owe, Musa bi banep basakasim asan apoken. Era Allah basakamtam atakam, asamot owe dambir batem pak aporomtame. Owe, Allah ataetiitame basakamtam atakam, sare kope emes aporesen. Me Allah Jip aemmar pak ere, sare daytu apormarom. 9Emesare, owe Allah ataetiitame basakamtam atakam, akotipit pak aporesen. Allah basakamtam atakam ere, asamot owe adosa, atakam basakamtii. Me Allah Jip ere, dare turunak owe aemapommaro. Erarawa Allah Jip aememar pak akotipitnak. 10Bonaknak ere, Allah basakamtam atakam akotipit pak aemanse. Me, Allah Jip pak, ere akotipitnak. Erarawa Allah basakamtam atakam akotipit pak, ajaniose emes tamen apormarom. 11Me jiine jirao apok akotipit pak emes aemanse. Me, era jiinenak pak, ere akotipitnak.
12Danom era akotipitnak aememe jiirey aeemarom. Erarawa dare atakam wosao akoremarom. 13Dare ere Musa tamen bas. Armat ipit, pitini, abi apurimtopomen. Me Israel owe, era sare bajanios, bapor-ombar. 14Emesare, era owe bimak binip jiiti aememesen. Waa aemansaram, era owe tarai ataaji atakam baca aemas, bimak binip jiiti aememmas. Era bimak binip jiiti, Musa, pitini, abi apurimtopome tamen are. Owe ere, Kristus ajamkaitas, era pitini bajanios tamen are. 15Me, waa ajiiream, era owe Musa aeapome buku baca aemas, era pitini, era owe abimak binip apurimapomma tamen are. 16Era owe ere, bimin Tuhan awaiomemtas, era pitini ataertem. 17Tuhan, ere Jip taka. Me Tuhan Jip aememmarpu owe, abimak binip jiiti asurumtamum. 18Danom takes, pitini dabi bapurimap apok tamen aememmarom. Dare Tuhan aakotipitnak pak, jip aporomemmarom— sirmin asamot bi jip baporomem tamen are. Danom Tuhan aakotipitnak pak tamen baemem, betema betema ajimarom. Me Allah Jip era pak aemmaro. Allah Jip ere, Tuhan are.
Currently Selected:
2 KORINTUS 3: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
