2 KORINTUS 5
5
1Me dadamo, ere tame tamen are. Ara aemansa tapirmi ere, dare ara tame bomon aemaptetermarom. Me, era tame danais aemamesteterto, dare Surga oup jiine tame atemetejiiaptemarom. (Era tame era ai damo atoomemtam are.) Asamot oweam era tame bakenemapom apok. Allah era tame aokenemapome. Dare emes damsam. 2Dare ere, Surga oup datame batemetejii, jak aseseromemarom. Erarawa epano asiremarom. 3Era tame ataakam ere, dare ai damo aemomemtam atakam. 4Dara ara aemansa tapirmi tame bomon aemaptam, dare jak pota aemapmarom. Erarawa dare epano asiremarom. Dare dadamo basumtiios apok. Dare ere, Allah, Surga oup damo, dara bapurimapom akot ajimarom. Dare, era jiine pak, era dambir pak bakumimosom, akot ajimarom. 5Allah, dare era Surga oup damo batoomem, akenemapomero. Are aJip bambi atetamero. Erarawa Are era ataaji aee atakam aemtamero apormarom.
6Emesare, dare jak fiak aememmarom. Dare dadamo bomon aemapmarom ere, dare Tuhan takan baemap apok. Dare emes apormarom. 7Dare era aemtam pak apormarom pak jiirey baee apok. Dare ere, era aemtam pak Yesus taka ambesemmarom. 8Dare jak fiak aememmarom. Dare dadamo beken bajios, wanam Tuhan tame bajiiap, akot ajimarom. 9Me, ara damo bomon aemaptam apaye, ara damo beken ajiostam apaye, dare Armat Ipit jak akot baporeememom, jak aseserommarom. 10Emesare, dare takes Kristus bipu baso aememtemarom. Armat Ipit, jatiaptam aemaarum pak akot apaye, pota apaye, atakam asakamtiitem. Ararawa, era aemaarum pak jipu atetamtemaro.
Allah, owe, ai ajaoromapomto atakam
11Erarawa dare Tuhan ombare aememmarom. Danom owe atatapimtaamarom. Emesare, Allah dajak bomon pak takes aporkorommaro. Tanom dajak bomon pak baporkorom, akot ajimin. 12Dare, “Dare, ere turunak,” emes atakam tara bakorom apok. Me, tare, “Era owe, ere turunak,” emes atakam tamba bakore, ere akot. Emesare, tare wan owe atep ajittemakam. Era owe, ere, owe biin aporemas, wanam, “Era owe ere, turunak,” emes atakam aesimemas. Me, are era owe jak bomon pak atakam bakore apok aememas. 13Wan owe, dare jaytunak, emes bimak binip atetaramemas apeno. Me, era aemom pak, Allah karai baeetam pak. Wan owe, dare bimak binip akot aptam, emes bimak binip atetaramemas apeno. Era aemmarom pak ere, asan akot tara batetam are. 14Emesare, jipit taka, dambir owe takes atemtame. Erarawa owe takes dambir Armat Ipit takan tamen atemes. Dare emes apormarom. Kristus, dara afaimmaro. Erarawa dare aatakam jii aeemarom. 15Me Armat Ipit, dambir, owe takes atemtamero. Are ajaorwasite. Are, ara jatiaptam aememmarom owe, dapa asan akot pak boem potan. Are, dare, Armat Ipit karai baeetam akoten. Are emes dambir, owe takes atemtamero.
16Emesare, dare, owe, owe akot apaye, owe pota apaye, asamot bimak binip jipu, atakam bokore apok. Bonak ere, dare Kristus akot apaye, pota apaye, asamot bimak binip jipu, atakam akoreom. Dare ere, waa emes boem apok. 17Owe, Kristus takan aememmas ere, Allah era owe ai ajaoromapomu. Era tarai pak ajaniosem. Emesare, ere takes ai ajaoremmas. 18Allah era pak takes aemtamum. Bonak ere, dare Allah jokoman owe aememom. Me, Kristus dambir atemtamero. Erarawa Allah dara aokipimtaerero. Are era akipimtaerero atakam, owe bakoretam owe, ataemero. 19Era atakam are: Kristus asamot owe dambir atemtame. Erarawa Allah asamot owe aokipimtaere. Armat Ipitam asamot owe dosa bajititimar apok aemum. Are era akipimtaerero atakam bakoretam, ataetiitamero.
20Emesare, dare Kristus atakam bajomattam owe. Erarawa era atakam tara akorommarom atakam, Allah tara akoromman atakam are. Erarawa dare Kristus, atakam fiak tara ajanimmarom. “Allah tara bokipimtaer aemum. Tanom era pak bawotapem bas.” Emes atakam aesimmarom. 21Me Kristus dosa baem amsam apok. Allah ere, Armat Ipit dosa ipit tamen ajaoromeme. Emesare, Armat Ipit jow auuemero. Era pak, Allah, Kristus takan aememmarom owe, turunak owe, emes atakam basakamtii are.
Currently Selected:
2 KORINTUS 5: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
