2 KORINTUS 2
2
1Emesare, dere emes atakam asakamtiio: “Dere Korintus owe jak pota baemapom, bojinao apok.” Emes atakam aesimo. 2Dere tajak pota aemapomtey apaye, ere dejak akot baemapom owe tanam? Emesare, tajak pota aemapomo owe taka are. Wan owe apok. 3Emesare, tare dejak akot aemapommankum owe tarare. Erarawa, dere era surat tara aeapomtamo. Tare dejak pota baemapom-ombar. Dere jak akot aemaptey, tanom jak akot aemaptemakam. Dere emes apormin. 4Erasurat tara aeapomtamo ere, dere jak potaam, jak apokam, aemapo. Denom bate ambato. Era surat tara aeapomtamo, tajak pota baemapom pak apok. Era surat ere, dere tara afaimmin baporomtam surat.
Owe, jipit pota aeme pak, bimak binip bajanimem atakam
5Jipit taka, owe jak pota aemapome apaye, are jak pota de taka baemapom apok. Are tare takes jak pota aemapomen. Dere ere, atakam daytinak ara ipit bometem-ombar. Are tare owe tanane jak pota aemapomen. 6Tare owe tanane era ipit emejurusumekem. Era bajurusum pak, ere daytu. 7Waa ere, tare era ipit pota aeme pak, bimak binip bajanimemtamay. Era ipitam jak akot aemapomay. Are jak pota daytinak baemap-ombar. Are jak basakepie-ombar. 8Derarawa ataane tara aowemin. Tanom era ipit bafaimnak aemay. 9Dere tara baempor aemo. Tare deatakam ji bae apaye bapor aemo. Erarawa dere era surat tara aeapomtamo. 10Tare owe era pota aememas pak, bimak binip bajanimemtam apaye, ere denom era pak bimak binip bajanimemtam aemmin. Dere ere, owe era pota aememas pak, bimak binip ajanimemo apaye, ere, asan akot tara batetam are. Denom era pak Kristus bipu aemmin. 11Dare, owe era pota aememas pak bimak binip bajanimem ere, Bii Kapar Ipit dara bakumimosom-ombar. Danom Bii Kapar Ipit era bimak binip akukuretiie pak damsam.
Paulus Troas aememe atakam
12Emesare, dere Kristus Akot Atakam bakoretam Troas ambaremo. Ambaremorawa, Tuhan, era owe era atakam jane bajie, bimak binip akot atetame aporo. 13Dere ere, era asan, dejoo ipit Titus, bi bapor apok aemo. Erarawa jak bimak binip arke aememo. Derarawa, “Denom boesos,” emes atakam aesimo, wanam Makedonia ajiro.
Kristus atakam, samaniin samaniin apatosem atakam
14Emesare, dare terima kasih atakam Allah akoromemarom. Dere Kristus ajamkaimarom. Erarawa dare Kristus takan, era pota pak akumimosomemarom. Emesare, Allah dare emes pak baem aemmaro. Danom Allah karai aeetamemarom. Erarawa, Kristus atakam, era samaniin samaniin apatosem. Era pinim akot bapatos tamen are. 15Kristus, pinim akot pak, Allah ajaatammar emes tamen are. Era pinim apataosem. Danom era pinim tamen are. Era pinim ere ajoremmas owepu apatosem. Anom era danais aemtiitas owepu apatosem. 16Era danais aemtiitas owe, dare dambir pak pinim tamen, bimak binip atetaramemas. Era ajoremmas owerawa, dare jiine batetam pak pinim tamen, bimak binip atetaramemas. Emes karai baee awar owe ere, ta oweem? 17Dare wan owe tanane awar apok. Era owe, pak bataet aememas. Erarawa are Allah atakam owe akoretamemas. Dare ere, Kristus ajamkaimarom. Allaham dara ambirimemomero. Are era aemmarom pak amsam. Erarawa dare atakam pir bae apok akoretammarom.
Currently Selected:
2 KORINTUS 2: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
