2 KORINTUS 1
1
Paulus
2 KORINTUS
Yesus Basitim Bajarisiap Owe Aometemot Ataejirime Surat
1Dere Paulus. Kristus Yesus, aatakam bakoretam, dera ambirimemomen. Allaham era pak baem akot ajie. Me dajoo ipit Timotius, ara surat takan aeapommarom. Tare Korintus baemap Yesus basitim bajarisiap owe, ere, Allah aowe. Me tare wan Akaya tapirmi baemap oweam, turunak owe. Emesare, dare ara surat tara aeapomtammarom.
2Daritipit Allaham, Tuhan Yesus Kristusam, asan akot tara baemtan. Anom ji baem jak tara batetamtan.
Terima kasih atakam Allah bakorom atakam
3Yesus Kristus daTuhan. Allah, ere Aritipit. Allaham Daritipit. Owe Allah tere baeomtas. Are soro dara ajiommaro. Are jak fiak aemapomkorommaro. 4Era ajirisemmarom pak takes, ere Armat Ipit jak fiak aemapomemaro. Dararawa, wan owe, era ajirisemtas pak takes, jak fiak aemapomtemarom. Ere Armat Ipit jak fiak aemapomero pak jipu taka are. 5Dare Kristus ajiriseme pak, Are takan, daytinak ajirisemmarom. Me, Kristus jak fiaknak aemapommaro. 6Dare bajirisem apaye, ere jak fiak tara baemapom pak. Anom tare bajorem pak. Allah, dare jak fiak baemapom apaye, ere tare jak fiak baemem pak. Tare, da tamen ajirisemtakam, ere Allah era ajirisemtakam pak, emes bajakajirem jak fiak pak atetamteman. 7Tare dare takan ajirisememakam apormarom. Me, Allah taraye daraye jak fiak atetammaro apormarom. Erarawa dare bimak binip tanane tara batetaram apok aemarom.
8Dejoo owe akotnak! Era Asia tapirmi aesosom, dare ajirisemom. Dare tare emes atakam jane bajiekorom akot ajiom. Era ajirisemom pak, ere daytinak. Danom, “Emesare, dambir aemtemarom,” emes bimak binip atetaramom. 9Owe dara batatii atakam ajamsakamamtiies, emes tamen aemapom. Era pak ere, dare jiirey damba baee-ombar. Era pak, dare jiirey Allah taka baee are. Armat Ipit, ere, era dambir owe ajaoromwasumtumtem. 10,11Allah ere, dara ajaortaerero. Dararawa, potanak dambir batem ere, apok are. Armat Ipitam aojortaertemaro. Tare, Allah, asan akot dara batetam, atakam ajanimtamtaroakam, Armat Ipit ajortaertemaro. Dare era pak Armat Ipit jiirey aeemarom. Erarawa, owe tanane, Allah dare asan akot batetam aportas, are terima kasih atakam Armat Ipit akoromtemas.
Paulus wan bimak binip akukuretiie atakam
12Me dajak bomonam, emes atakam akoremarom: “Tare era samaniin samaniin takan aemapaarukum ere, tare turunak aemapaarukum. Tanom pote apok owe aemapaarukum. Era aemaarukum pak, asamot bimak binip batetaram pak apok. Allah, asan akot, tara atetamaarin. Erarawa, tare era pak aemaarukum. Era Korintus owe takan aemapaarukum, tare emes taka aemaarukum.” Me dajak bomonam emes atakam akoremarom. Emesare, dare jak akot aemapmarom. 13,14Era surat tara aeapomtammarom atakam, ere bomon apok. Tare era atakam baca aeay. Tanom era atakam baporkoromay. Ere daTuhan Yesus aofasito bare aemaptam, dare tara asitimtemarom. Tanom dara asitimtemaroakam. Tare waa ajiire era pak baporkorom apok. Dere ere, tare asep bare era pak baporkorom, akot ajimin.
15Dere ere, era pak aporkoromo. Erarawa bonak ere, dere tara bajinao bimak binip akukuretiio. Dere, asan akot jamnuk tara baem, akot ajio. 16Dere Makedonia ajirtey, dere tatapirmi bateappor bimak binip akukuretiio. Wanam aofasitey, dere tatapirmi boteap bimak binip akukuretiio. Era pak tare wan owe dere Yudea tapirmi takan bajir are. 17Dere ere, emes baem, bimak binip arke atetaramo apaye? Dere pak baem bimak binip bakukuretii, ere dejak baseseromem pak jipu apaye? Dere “ijee” atakamam, “apok” atakamam, takan bakore apaye? 18Emesare, Allah pote ipit apok. Denom pote atakam apok. Dere tara bajinaomem atakam akoreo, dere “ijee” atakamam, “apok” atakamam, tara bakore apok. 19Emesare, Yesus Kristus, Allah Andep. Denom, Silwanusam, Timotiusam, Yesus Kristus atakam tara akoretamom. Me Yesus Kristus, “ijee” atakamam, “apok” atakamam, takan bakore apok. Are atakamnak akoremara. 20Me Kristus, Allah ataaji aee pak takes jipu aemkoromum. Dare emes apormarom ere, dare, “Ara atakam, ere atakamnak,” emes atakam aesimemarom. Era akoremarom atakam, ere Allah tare baeom atakam. 21Emesare, Allah daraye taraye Kristus bajamkai fiak aemapommaro. Armat Ipitam dare akarai akot bae ataemero. 22Armat Ipitam dare aesiremero. Anom Allah Jip dajak bomon atetamteterero. Allah Jip, ere Allah asep bare dara atetamtaroas, emes baporom pak are. 23Era akoremin atakam, ere atakamnak. Allah ere, deatakam ateman batam Ipit. Armat Ipit dejak bomon pak amsam. Dere tajak pota baemapom pota. Erarawa dere Korintus bofasie apok, atakam asakamtiio. 24Dare, “Tare emes atakam ambesemay. Emes atakam ambesemay,” atakam tara basakamtam apok. Emesare, tare Yesus eemnak ambesemkorommakam. Dare ere, karai tare takan aeemarom. Ere tajak akot baemapom karai are.
Currently Selected:
2 KORINTUS 1: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
