2 KORINTUS 10
10
Paulus, Allah karai akot aeetame atakam
1Emesare, dere Paulus. Tare wan owe deatakam akoremakam, “Paulus dabipu aememto, are jak fiak apok ipit. Me, are apa asan aememto, atakam fiak surat atetammaro.” Emes atakam aesimemakam. Me, Kristus akotnak Ipit. Are owe akot. Denom Armat Ipit ajamkaimin. Erarawa dere atakam fiak tara ajanimmin. 2Tare jane sake bas. Dere tara ajinaomemten, dere ere dejak fiak pak tara baporomtam-ombar. Emesare, tare wan owe bimak binip ere, “Paulus ara aemansa tapirmi bambi ipit emes jipu pak aemum,” emes bimak binip atetaramemakam. Dere ere, era owe bipu aememtey, dere jak fiak aememtemin. Dere emes bimak binip akukuretiimin. 3Emesare, dare ara aemansa tapirmi aemapmarom. Me, era jii ajamommarom ere, dare ara aemansa tapirmi owe bimak binip jipu, jii bajamom apok. 4Era jii ajammarom ere, dare ara aemansa tapirmi jii bajamom pak batoomem apok. Dare ere, Allah atetammaro jii bajamom pak atoomemmarom. Ere Bii Kapar Ipit afiak tiri bandaepakamtii pak. Me, Allah atetammaro pak, ere fiaknak. 5Dare owe abambi bimak binip atetaramemas pak ajiiosomtammarom. Emesare, wan owe amba aemetemtememas. Ararawa, Allah awotapememas. Erarawa Allah atakam janda aemapemas. Danom era janda atakam ajiiosomtammarom. Danom Kristus era owe aporomtammarom. Armat Ipit arawa, abimak binip takes akumimosomum. Wanam are Kristus atakam ji aeemas. 6Tare Allah atakam ji aeekoromtakam ere, dare era atakam ji bae apok owe, ajurusumtemarom. 7Emesare, era baso pak bimak binip atetaramkoromay. Owe, “Dere Kristus owe,” emes bimak binip atetaramtetertas, ere akot. Me, danom Kristus owe. Danom era owe awar. Emesare, era owe emes bimak binip batetaramtas. 8Tuhan, atakam abajamkai owe basakamtam fiak pak, atetamero. Era pak ere, tare Armat Ipit bajamkai fiak baemapom pak. Ere tare Armat Ipit bajamkai bandakisiam baemapom pak apok. Dere ere Tuhan atetamero fiak pak, atakam daytu emes akoreo apeno. Emesare, dere ere, damke apok. 9Tanom, “Paulus suratiin atetamero, ere dare ombare baememom pak taka,” emes bimak binip batetaram bas. 10Wan oweam, “Paulus atetamero suratiin ere bomonnak atakam. Anom atakam fiaknak. Me, armat ipit dare takan aemomero, dare are kumiti ipit aporom. Abakoretam atakamam, ere potanak.” Emes atakam aesimes. 11Era owe ere, emes bimak binip batetaramtas: “Paulus ara asan ajinaoto, are era ataejinaomtamero surat atakam jipu taka aemtemaro.” Emes bimak binip batetaramtas.
12Emesare, wan owe amba aemetemtememas. Me, dare, “Danom era owe awar,” emes atakam baemekore asan apok. Wanam, “Dare akot. Era owe pota.” Dare emes atakamam baemekore asan apok. Era owe ere, janda. Are era aememas pak, akot apaye, pota apaye, atakam asakamtiitas, era atakam apa bimak binip jipu pak taka. Are armamon emes atakam asakamtiimas: “Are dajoo ipit akotnak. Are wan dajoo ipit, potanak.” Emes atakam aesima ajimas. 13Dare ere, era aemom pak, damba baemetemtemem apok. Dare Allah atakam asakamtamero karai taka, atakam akoretemarom. Me da wan karai, ere Allah Akot Atakam tara baemapom are. 14Emesare, Allah, Kristus Akot Atakam tara batoomjinao, atakam asakamtamero. Erarawa dare tara ajinaomom ere, dare era atakam asakamtamero atakam baofe apok. 15Dare Allah asakamtamero atakam, ere baofe apok aemom. Erarawa dare era wan owe karai aees pak atakam bakore apok. Dare ere, tare Kristus eemnak bamesemkorom, jak aseseromemarom. Emesare, tare Kristus eemnak ambesemkoromtakam, dare tawaut, karai daytinak Allah boetam are. Ere Allah asakamtamero atakam taka. 16Tatapirmi, ere setep. Me wan tapirmi ere, setep apok. Tare Kristus bajamkai fiak aemtakam, dare ere aAkot Atakam era setep apok tapirmi oweam akoretamtemarom. Erarawa, dare wan owe akarai asan karai boe apok. Danom era owe aees karai, atakam bakore apok aemtemarom.
17Ere Alkitab atakam jipu: “Owe atakam bakore akot aemtas, are Tuhan aeme pak atakam akot bakoretas.” Emes atakam aeapoma. 18Tuhan, “Era owe akot,” emes atakam aesimto, ere era owe, akotnak owe. Me, owe atakam akoretetertas, “Dere akot,” emes atakam aesimtetertas, ere are owe akotnak apok.
Currently Selected:
2 KORINTUS 10: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
