1 TIMOTIUS 1
1
Paulus
1 TIMOTIUS
Bonaknak Ataejirime Surat
1,2Timotius! Dere wore Kristus eemnak bamesemkorom aememtamo. Erarawa wore detii. Dere Paulus, ara aemansa surat wora aeapomtammin. Kristus Yesus dere ara atakam bakoretam ambirimemomen. Danom Armat Ipit jiirey aeemarom. Allaham dara Bajortaer Ipit. Emesare, Allaham, Kristus Yesusam, atakam bakoretam, atakam asakamtamenis.
Allah Daritipit. Kristus Yesusam daTuhan. Armat owe, asan akot wora baemtanis. Are soro wora bajiomemtanis. Jak akotam wora batetamtanis.
Atakamnak baememtam ataane baowe atakam
3Emesare, wore Efesus emes ajamemapey. Makedonia aesoso ere, dere emes atakam taka wora akoromo. Era Efesus ere, wan owe pote atakam aememtamemas. Erarawa wore era owe atakam asakamtamey. “Era pote atakam boememtam bas. 4Era tarai atakamam bajamkai bas. Era bonaknak ajitemes owe juas tananenak akoretiimas atakamam bajamkai bas.” Emes atakam asakamtamey. Owe era atakam ajamkaitas, are bimak binip arke atetaramtemas. Wanam atakam tanane ajamkoramtemas. Oweam era atakam ajamkaitas, are karai Allah baetam apok aemtemas. Me Allah eemnak ambesemkorommas owe ere, Armat Ipit karai aetamemas. 5Dere owe bafaim akot. Erarawa dere era atakam asakamtammin. Owe jokoman apok jak aemomemtasam, bimak binip akot ajanimomemtasam, eemnak bamesemkorom aemtasam, ere are ajamfaimamtemas. 6Wan owe ere, emes ambompimes. Are bambi atakam ajamkaies. Ararawa, era atakamnak bokotpu, janda aememes. 7Era owe, Musa Basakamtam Atakam baememtam, jak aseseromemas. Me, are apa Atakam amsam apok. Are era atakam fiak akoremas pak amsam apok.
8Musa Basakamtam Atakam, ere akot. Dare era Basakamtam Atakam ji aetam, danom era Basakamtam Atakam akot aportemarom. 9Allah aBasakamtam atakam, era basakamtam atakam baoo owe ataetiitame. Are aBasakamtam atakam era atakam baoo oweam, Allah bamesem apok oweam, turu apok oweam, dosa oweam, jaos oweam, ara aemansa tapirmi jak bajamkaiaar oweam, arisare batatii oweam, owe batatii oweam, emes owe ataetiitame. 10Are aBasakamtam atakam, era tane tamane bajamdamat oweam, era feper oweam, era owe tau aemamtaeremas oweam, era pote atakam bakore oweam, pote ateman batam oweam, era anakot atakam baoo oweam, emes owe ataetiitame. 11Era anakot atakam ere, Allah Akot Atakam jipu erare. Allah ara Akot Atakam ataetiitamero. Armat Ipit, ere akotnak. Are asan akot. Are ara Akot Atakam owe bakoretam atakam dera asakamtamen.
Allah, Paulus soro ajiome atakam
12Emesare, Kristus Yesus daTuhan. Armat Ipit dere turunak ipit aporen. Erarawa Are dere karai Ara baetam aeremtaeren. Are era karai baetam fiak pak atetamen. 13Me, bonaknak, denom Armat Ipit tame atakam akoromo. Denom Armat ipit ajurusumo. Denom Armat Ipit atakam pota akoromo. Dere ere, Armat Ipit bamesem apok aemo. Erarawa era aemo pakam demsam apok. Emesare, Allah soro ajiomen. 14Me daTuhanam asan akotnak aemen. Anom eemnak Ara bamesemkorom bimak binipam, Ara bafaim bimak binipam, atetamen. Emesare, Kristus Yesus takan aememmarom owe takes, emes bimak binip atoomemmarom.
15Owe emes atakamnak akoremas: “Kristus Yesus, dosa owe bajortaer, ara tapirmi andae.” Emes atakam aesimemas. Era atakam, ere atakamnak. Owe era atakam eemnak bamesemkoromtas. Dere ere, jokoman anakotnak ipit. 16Allah dere dosa anakotnak ipit apore. Erarawa Are soro ajiomen. Emesamare Kristus Yesus jak jiraonak aemen. Era pak, era asep bare, Armat Ipit eemnak ambesemkoromtas owe baporomtam are. Era oweam jiinenak aememaartemas. 17Allah era jiinenak baememaar raja Ipit. Are jiine bakari apok Ipit. Oweam Armat Ipit bi baemepor asan apok. A taka, ere Allah. Erarawa owe, Armat Ipit eemnak bamesemkoromaartas. Are, “Allah akotnak,” emes bakoromaartas. Are tere baeomaartas. Emesare, ara atakam, ere atakamnak.
Paulus, Timotius ataane atakam
18Timotius! Detii akotnak! Bonaknak, Allah atakam bakoretam owe, era aemtem pak, atakam akoretames. Derarawa, ara atakam wora asakamtammin: wore Allah jokoman owe akumimosomey. 19Wonom Kristus bamesem bamompim bas. Me wojak bomon akot atakam jipu aemaarey. Wan owe ere, ajak bomon akot atakam jipu baem ambompimes. Erarawa are Kristus bamesem apoknak. 20Himeneusam, Aleksanderam, emes taka aememis. Dararawa, era ipit amnuk, Bii Kapar Ipit aotasimemomtamo. Era baememtam pak, era ipit amnuk, tame atakam Allah bakorom-ombar.
Currently Selected:
1 TIMOTIUS 1: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
