1 YOHANES 5
5
Ara aemansa tapirmi pak akumimosomemas owe atakam
1“Yesus ere, Kristus arare,” emes atakam eemnak ambesemkoromemas owe, ere, Allah arereis arare. Aritipit afaimemas owe, arereis takesam afaimemas. 2Dare Allah afaimemarom apaye, wanam abasakamtam atakam ji aeemarom apaye, ere dare arereisam afaimemarom apormarom. 3,4Allah basakamtam atakam ji aemarom apaye, dare Allah afaimemarom. Allah arereisam ara aemansa tapirmi pak akumimosomaaremas. Me Allah atakam ji bae, ere wuturu pak apok. Dare, “Yesus ere, Kristus arare,” emes atakam eemnak ambesemkorommarom. Erarawa dare ara aemansa tapirmi pak akumimosommarom. 5Ara aemansa tapirmi pak akumimosomemas owe, ete oweem? “Yesus, Allah Andep,” emes atakam eemnak ambesemkorommas owe taka, ara aemansa tapirmi pak akumimosomemas owe erare.
Allah Andep aeme pak ateman atame atakam
6Emesare, Yesus Kristus andae. Andaerawa, wan ipit, Armat Ipit bwi akupimtaere. Yesus Kristusam dambir ateme. Aeseeam ajirindae. Erarawa Armat Ipit andae ere, Are bwi bakupimtaer taka apok. Aeseeam ajirindae. Emesare, Allah Jip, atakamnak Jip. Erarawa Are emes atakam ateman atame. 7Owe apaye, pak apaye, bamintep, Yesus Kristus aeme pak, anakot aporomtammas. 8Me wan taka, ere Allah Jip. Me wan takarawa, ere bwi. Me wan takarawa, ere esee. Era bamintep takes, Yesus Kristus Allah Andep, emes ateman atamtammas. 9Dare asamot owe ateman ajamtamamemas atakam eemnak ambesemkoromemarom. Me wan asamot ateman ere, atakamnak apok. Me, Allah ateman atammar atakam, atakamnak. Emesare, Armat Ipit Andep aeme pak, ateman atame. 10Dare wan owe, Allah Andep eemnak ambesemkorommarom. Me Allah ateman atame atakamam dajak bomon aapeta. Me Allah ateman atame atakam bamesem apok owe ere, “Allah pote ipit arare,” emes atakam aesimemas. Allah Andep aeme pak ateman atame. Era owe ere, era ateman bamesem apok aemmas. 11Allaham emes ateman atakam atamero. “De jiinenak tare emetetamo. Me deTii ajamkaimas owe jiine aememaartemas. 12Me deTii aptam owe, ere jiinenak aptam. Me deTii aptam apok owe ere, jiinenak aptam apok.” Emes atakam aesimero.
Jiine aememaartas owe atakam
13Emesare. Tare Allah Andep eemnak ambesemkorommakam owe, jiine aememaartemakam. Dere, tare emes baporkorom akot. Erarawa dere ara surat tara aeapomtammin. 14,15Dare, Allah dara baemtam pak atakam Armat Ipit ajanimtam, ere ajak aseseromemar pak jipu ajanimtam apaye, Are era ajanimtam atakam takes jane ajitem. Dare Armat Ipit ajanimtam atakam takes jane bajie aportam apaye, Are era ajanimtam atakam aemtamtaro apormarom. Emesare, dare Armat Ipit bipu aememtam, jak fiak aememtemarom.
16Owe, wan dosa aemtas, are dambir baem apok aemtemas. Owe, ajoo owe era dambir baem apok pak dosa baem aportas, are atakam Allah bajanimtas. Allahrawa, jiine pak era dosa owe atetamtem. Me, owe wan dosa aemtas, are dambir aemtemas. Dere ere, owe, emes dosa baem owe, atakam Allah bajanimtam, ere emes atakam apok. 17Era jaos pak takes, ere dosa. Emesare, owe wan dosa aemtas, are dambir baem apok aemtemas.
18Emesare, Allah arereis, dosa baemaar apok apormarom. Allah arereis ere, era owe tiri asiomem. Erarawa era Asan Pota Ipit, era owe baemejurusum asan apok. 19Dare Allah arereis. Danom emes apormarom. Me, era Asan Pota Ipit, ara aemansa tapirmi pak takes aemomem. Danom emes apormarom. 20Emesare, Allah Andep emedae apormarom. Are bimak binip baso emetetamero. Erarawa dare Allahnak damsam. Danom Allahnak takan aemapaaremarom. Emesare, dare Andep Yesus Kristus, takan aemapaaremarom. Armat Ipit Allah anakot. Are jiinenak atetamemar Ipit arare.
21Tiparais! Tare juein owe takes bamesem bas. Eto takesam basitim bas.
Currently Selected:
1 YOHANES 5: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
