1 YOHANES 4
4
Allah Jip anama Kristus, aJokoman Ipit atakam
1Dejoo owe akot! Allah atakam bakore pir bae owe, ara tapirmi takes emeesoses. Erarawa tare ara atakam takes bamesem bas. Tare ere, ara atakam bakore owe ato takamoorporay. Era owe, Allah Jip aptam apaye, Allah Jip aptam apok apaye, ato takamoorporay. 2Owe atakam akoretas apaye, “Yesus Kristus asamot ipit ajaoreme,” emes ajitas apaye, era atakam Allah Jip atetame atakam aportemakam. Emesare, tare era atakamiin atakamiin, Allah Jip atakam apaye, Allah Jip atakam apok apaye, aporkoromtemakam. 3Emesare, owe atakam akoretas apaye, “Yesus Kristus asamot ipit bajaorem apok,” emes ajitas apaye, era atakam, Allah Jip atakam apok aportemakam. Era atakam, ere Kristus aJokoman Ipit atakam. Tanom, Kristus aJokoman Ipit ajinaotem, emes atakam jane emejiekem. Emesare, waa era ipit ara aemansa tapirmi aometa.
4Tiparais! Tare Allah aowe. Me tare takan aemapaareman Allah Jip, ere fiaknak. Emesare, bii, ara aemansa tapirmi pak ajamkaimas owe, takan aemapaareme. Era bii, ere fiak apok. Erarawa tare Alah atakam bakore pir bae owe akumimosomekem. 5Era owe ara aemansa tapirmi owe. Erarawa are ara aemansa tapirmi pak atakam akoremas. Ara aemansa tapirmi pak ajamkaimas oweam, ara atakam jane ajimas. 6Dare ere, Allah aowe. Me Allah amsam oweam daatakam jane ajimas. Wan owe ere, Allah aowe apok. Era owe, daatakam jane bajie apok aemmaroas. Emesare, ara atakamnak akoretammar Allah Jip, apa atakam apormarom. Era pote atakam akoretammar biiam, apa atakam apormarom.
Allah owe bafaimaar Ipit atakam
7Dejoo owe akot! Allah owe bafaim bimak binip atetameme. Erarawa danom ajamfaimamamo. Me era owe afaimemas owe, ere Allah arereis. Are Allah amsam owe. 8Allah, owe bafaimaar Ipit arare. Erarawa era owe bafaim apok owe, Allah amsam apok owe erare. 9Allah, Andep takanak, ara aemansa tapirmi ataendaeme. Are Andep, jiinenak dara batetam ataendaeme. Emes aeme ere, Allah dara afaimmaro, aporomtamero. 10Dare Allah daobafaim pak, ere bafaim paknak apok. Me, Allah aofaimero. Ararawa, Andep ataendaeme. Me Andepam, dadosa bimak binip bajanimemtam, dambir atemtamero. Emesare, Allah aeme pak bafaim paknak erare. 11Dejoo owe akot! Allah daytinak dara afaimero. Emesare, danom bajamfaimam amaye. 12Allah bi bapor owe, ere apoknak. Me, dare ajamfaimammarom apaye, ere Allah dare takan ajamemapaaremaro. Dararawa, bafaimnak afaimkorommarom. 13Allaham aJip dara atetamteterero. Erarawa dare Allah takan aemapaaremarom apormarom. Allaham dare takan aemapaaremaro apormarom. 14Daritipit, Andep, asamot owe Bajortaer Ipit baemem, ataendaeme. Dare emes aporom. Danom emes ateman atamom. 15Yesus, Allah Andep. Owe emes atakam eemnak ambesemkorommas apaye, Allaham era owe takan aempaareme. Era oweam Allah takan aemapaaremas. 16Erarawa Allah dara afaimmaro apormarom. Danom era atakam eemnak ambesemkorommarom.
Emesare, Allah owe bafaimaar Ipit. Era owe afaimaaremas owe, Allah takan aemapaaremas. Allaham era owe takan aemapaareme. 17Danom bafaimnak afaimkoromtam apaye, danom Allah asamot dosa atakam asakamtiikoromto bare, jak fiak aememtemarom. Dare ara aemansa tapirmi aememmarom ere, dare Kristus aememmar pak tamen aemmarom. Erarawa era bare, dare jak fiak aememtemarom. 18Afaimemas owe, ombare apok aemememas. Ombare aememtas owe, era ajirisemtas bare, bimak binip atetaramemas. Erarawa era bafaimnak afaimkoromemas owe, ombare baemeemem asan apok. Era ombare aemememas owe, bafaimnak bafaimkorom apok aememas.
19Allah bonak ato takamfaimero. Erarawa danom Armat Ipit asep afaimmarom. 20Owe emes atakam akoremas apaye, “Dere Allah afaimmin,” emes atakam aesimtetermas apaye, me, era owe ajoo owe bifane afeomememas, are pote owe. Emesare, era owe ajoo owe bi aporemas. Me, are Allah bi bapor apoknak. Erarawa era owe ajoo owe bafaim apok aememas apaye, are Allah baemefaim asan apok. 21Allaham emes atakam asakamtamero. “Allah afaimemas owe, ajoo oweam bafaimtas.” Emes atakam aesimtamero.
Currently Selected:
1 YOHANES 4: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
