1 KORINTUS 12
12
Allah Jip bambi batetam pak atakam
1Emesare, dere, Allah Jip bambi batetam pak, atakam tara bakorom aemmin. Dere tare era pak janda baemap potanak. 2Tanom Allah tamsam apok aemapaarukum ere, owe tare era atakam aptam apok eto basitim, atatapimtaaarin. Tanom era pak bimak binip apok aemapaarukum. Emes tamsam. 3Emesare, dere tare emes atakam jane bajiekorom akot: Me Allah Jip bajamkai owe, “Yesus asan pota baemapto,” emes atakam baemekore asan apok. Wanam Allah Jip bajamkai apok owe, “Yesus, ere Tuhan,” emes atakam baemekore asan apok.
4Me Allah Jip batetam pak, ere atat pak kupis are. Me, era pak batetam Allah Jip, ere takakope. 5Me Tuhan karai baetam pakam, ere atat pak kupis are. Me, era karai baetam Tuhan, ere takakope. 6Me karai baetam tastu pakam, ere atat pak kupis are. Allaham era tastu pak takes era owe oweo aememayes atetamum. Me Allah, ere takakope. 7Me Allah Jip, era batetam pak, oweo aememayes, atetamteterem. Ere dare takes asan akot boem pak. 8Me Allah Jip, Allah bomon atakam baso bakoretam wan owe atetamum. Me Allah Jip takakopeam, Allah aememe atakam, atakam baso bakoretam, wan owe atetamum. 9Me Allah Jip takaam, Kristus eemnak bamesemkorom bimak binip, wan owe atetamum. Me Allah Jip takaam, damo pota owe baoromtam fiak pak, wan owe atetamum. 10Are jinim bae fiak pak, wan owe atetamum. Are Allah atakam bakoretam tastu pak, wan owe atetamum. Anom owe era akoremas atakam, bii atakam jipu apaye, Allah Jip atakam jipu apaye, emes baporkorom pak, wan owe atetamum. Are era atetamar kaaowe atakam kupis bakore batetam pak, emes tastu pak wan owe atetamum. Are era kaaowe atakam jow bauumtaer, emes tastu pak wan owe atetamum. 11Me emes baemtam pak takes, ere Allah Jip takakope. Are akot aporto oweo aememayes atetamum.
Kristus bajamkai owe, Armat Ipit adamo pak atakam
12Asamot Ipit damo anakot, ere takakor. Me adamo anakot poman pak ere, tanane. Me adamo anakot poman pak tanane ere, damo anakot takakor. Emesare, Kristusam emes tamen are. 13Emesare, Allah Jip taka, dare takes damo taka ajaoromtamero— Are dajak bomon ajiiapteterero. Yahudi oweam, Yunani oweam, bambi karai baetam oweam, apa karai aemas oweam, ere takes damo taka ajaoromtamero. Danom Takes Allah Jip taka ataetteterom.
14Asamot Ipitam adamo anakot poman pak taka apok. Adamo anakot poman pak, ere tanane. 15Me bai atakam akoreto, “Dere ban apok. Erarawa dere era ipit aapak apok,” emes atakam aesimtopaye, era ipit bai aapak apok ape? 16Era janemakam atakam akoreto, “Dere banamek apok. Erarawa dere era ipit apak apok,” emes atakam aesimtopaye, era ipit janemak apak apok ape? 17Asamot ipit adamo takes banamek takapaye, are jane bajie wama tamenem? Me adamo takes janemak takapaye, are pinim bamo wama tamenem? 18Me, Allah asamot ipit adamo anakot poman pak takes adamo ataapomteteren. Ere aakot apore pak jipu eraren. 19Asamot ipit, adamo takes bai taka ere, adamo anakot aptam ere apok. 20Me adamo anakot poman pak, ere tanane. Me damo anakot ere, takakor.
21Era banamekam atakam akoreto, “Ban! Wore bambi pak apormin.” Are emes atakam baemekore asan apok. Wanam, kuus atakam akoreto, “Bai! Wore bambi pak apormin.” Are emes atakam baemekore asan apok. 22Me wan damo anakot poman pak, ere kumiti. Era kumiti pak ere, anakotnak pak. 23Dare asamot owe bimak binip ere, “Me wan damo anakot poman pak ere bambi pak.” Emes bimak binip atetaramemarom. Dare ere, bambi pak basitim daytinak. Me da wan damo anakot poman pak, ere bapor pak akot apok. Dare ere, era pak turunak aemmarom. 24Me wan dadamo anakot poman pak, ere bapor pak akot. Dare ere, era akot pak, turu emes baem apok. Allah dadamo akenemapome ere, Are dadamo bambi pak, turunak baem akenamapome. 25Erarawa, dadamo anakot poman pak bifane bajamfeamem apok aememas. Me, dadamo anakot poman pak takes ajamfaimamemas emes tamen are. 26Me dadamo anakot poman pak taka ajirisemto, dadamo anakot poman pak takes takan ajirisememas. Wanam, owe, dadamo anakot poman pak taka asitimtas, dadamo anakot poman pak takes jak akot aemapemas emes tamen are.
27Emesare, tanom takes Kristus adamo. Tare oweo aememayekem Kristus adamo anakot poman pak. 28Allah, Yesus basitim bajarisiap owe bomon, emes owe ataeme: Bonak ere, Yesus atakam bakoretam bamirimemom owe are. Wanam Allah atakam bakoretam owe. Wanam atakam baememtam owe. Wanam jinim bae pak baem oweam, Allah Jip owe damo baoromtam fiak pak atetammar oweam, owe pi bajat oweam, owe bajasosomat oweam, Allah Jip batetam kaaowe atakam kupis bakore oweam, emes owe ataeme. 29Owe takes Yesus atakam bakoretam bamirimemom owe baemem apok. Owe takes Allah atakam bakoretam owe baemem apok. Owe takes atakam baememtam owe baemem apok. Owe takes jinim bae pak baem owe baemem apok. 30Me Allah Jip, owe takes damo pota owe baoromtam fiak pak batetam apok. Owe takes Allah Jip batetam kaaowe atakam kupis bakore owe baemem apok. Owe takes Allah Jip batetam kaaowe atakam kupis jow bauumtaer owe baemem apok. 31Me Allah Jip batetam pak, wan anakotnak pak. Wan ere anakot pak apok. Erarawa tare era anakotnak pak baemomem emes jak aseseromay.
Dere ere, akotnak anakot atakam, atakam tara akoretamtemin.
Currently Selected:
1 KORINTUS 12: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
