ZAKHARIA 9
9
Fekat neu pah-pah le naketi nok Israel
1Le i fef ba'an Uisneno. In nafek nalali he nati' ankas pah Hadrakh ma kot Damsyik. Ka alfa uf-uf Israel, mes kot ainaf Siria amsa nane anfani Uisneno ini. 2Hamat le an eka nok Hadrakh amsa nane in-ini, onane amsa kot-kot Tirus ma Sidon nok ale in to sin mahinen. 3Tirus nafena nafani ale baki lape neu in aon ma nabuab mnatu ma noni muti le namfau talante anfani blua ka maupa onle snaen ma klofo anbi lanan. 4Mes Uisneno of anmo'e in anmamu'i. Ale amaus anbi kot nane anfun natef of anpolin natam sin neu tasi in nanan ma of ai notu nani kot le nane.
5Kot Askelon ma Gaza of nit in ma namtau. Ekron of nit in amsa ma in afnekat of namneku. Gaza of naneku nani in usif sin, ma Askelon of luman ma kan mu'i fa amaika anbine. 6Atoni-atoni na'ko pah le maselo of natua Asdod. Uisneno nakua a'an nak, “Atoni Filistin le nane'ob sin nekan nane of Au umate sin. 7Sin of ka nah anteni fa sisi le fe anmu'i na' ai mnahat bian le nakain nani. Ale atoni le nabala nane of anfani Au to ma of Au ubai sin anfani uf Yehuda sin bian. Ekron of anfani on Au to, onle atoni Yebus anbi un-unu. 8Au of apanat Au pah ma eka solalus anao amnemat le anao natuin. Au of ka ufetin ateni fa ale asusu' sin hen aten Au to, natuin Au uhin ulali sin nukat ma sin nu'ut.”
Kesel le of nanoebon nem
9Hoi amaika abit Sion, mimlil nai!
Hoi amaika abit Yerusalem, miba' nai!
Amkiso nai! Hi Kesel in nem neki mnisat!
In Kesel amneot le neki honis.
mes in anbol nem nok nek amnebet,
le ansae neu bikase luke mnanu, bikase luke mnanu mese le fe tipu'.
10 Uisneno nakua a'an nak,
Au of apolin usitab aklet-aklet makenat na'ko Efraim of Au uneku ani,
ale bikase anbi Yerusalem of Au uneku ani
ma ale as'anef of Au uskuku ani.
Ho Kesel of ankakan lasi halan anbi ale uf-uf.
In of ankuas tasi nao neu tasi,
na'ko Noe Efrat antia pah pinan in tu'an.”
Naloitan to Uisneno sin monin
11 Uisneno nakua a'an neu In to nak,
“Natuin fef ba'an le Au mo'e ulali ok ki,
fef ba'an le mamepan nalali neki na' fua tulu, of Au ufetin ani ho to
le nanukbon anbi bale mapolin
onle atoni le an o'of nan anbi oe mata ametis.
12Amfani aim nai hoi atoni-atoni mapolin,
natuin tabu le i of hi mu'i afnekat.
Amfain ani nai neu hi bale neot ma mafot,
Au of usanut athoen neno piut neu ki.
Amnen nai: Au of a'fe athoen neno neu ki ansato no nua
natuin ale nukat le hi alki amsimo milali.
13Of Au pake Yehuda anfani as'anef meo pa'e,
ma Israel anfani asanef le maloitan hen kenan.
Amaika abit Sion of Au pake on suni,
ma nok suni nane of Au maken ok atoni-atoni Yunani.”
14 Uisneno of natonon neu In to,
onle limat In ankenan In as'anef-as'anef sin.
Uisneno Alatan Amnanut of anpu In to'is anfani taka neu makenat
oke te In nao mat anbi nautus in nanan na'ko kabenan a'ne'u.
15Namneo In of naneo ma namafo In to,
talantia sin of anli'u naaenab sin musu.
Onle a'baf na'ko atoni le anmafun amninut,
onane amsa sin a'baf anbi makenat in nanan.
Onle na' fua tulu le maopan anbi baki fuat in tunan,
onane amsa sin musu sin na' of naopan.
16Leka neno nane antia, Uisneno of nafetin In to,
onle atukus mese nafetin in bibi kase na'ko amle'ut.
Sin of napeni malinat anbi Uisneno In pah,
onle sobe noni muti in pinan.
17Namneo Uisneno In pah nane alekot kun,
namneo in namas ma naleko kun!
Anbi nane ane kase ma tua min kase anmoni nok amlilat,
anmo'e atoni munif ma bife munif ansato in matanin.
Currently Selected:
ZAKHARIA 9: AOZ
Highlight
Copy
Compare
Share
Want to have your highlights saved across all your devices? Sign up or sign in
