ZAKHARIA 8
8
Uisneno anmanta'en neu of nafena nafani Yerusalem
1 Uisneno Akuasat Afinit anfe In han ta'en le i neu kau nak, 2“Au lomi ma sali he tuntaku Yerusalem natuin Au nek in to, ma natuin Au manekak nane, Au nekak anmaputun musu-musu na'ko kot nane. 3Au of a'fani neu Yerusalem, Au kot aknino nane, ma umaika a'bi nane. Yerusalem of nahine anfani on kot le na'ki, ma Tubu Uisneno Akuasat Afinit of antek in nak Tubu Knino. 4Anbi mnela naek kot Yerusalem, hi na'if sin ma hi be'i sin le namnasi nisan of sin antoko anteni ma sin nao neki tias. 5Lanan-lanan anbi kot of nahenu nok li'ana-li'ana le sin na'bae.
6Lasi nane neki amkakat neu atoni-atoni le fe anmoni anbi pah le i, mes ka neki fa amkakat neu Kau. 7Au of ufetin Au to na'ko pah-pah bale le naiti na'kone, 8ma neki nafani sin na'ko neno saen ma na'ko neno tesan, talante sin namaika anteni anbi Yerusalem. Sin of anfani Au to ma Au fani sin Uisneno. Au of uplenat sin nok aki'at ma amneot.”
9 Uisneno nakua a'an neu In to nak, “Amhatani hi nekam! Tabu le i him nen amteni uab molok le afi Mafefa knino sin natiab nani anbi tabu nabela sukit neu he nafena Au Ume. 10Nahun na'ko le nane kan mu'i fa he nabe'i hen sebe mansian ai mu'it in be'in matanin, ma kan mu'i fa le anmoni nok tainine na'ko musu in maufinu. Au malauba ulali sin es nok es. 11Mes tabu le i atoni-atoni le fe anmoni na'ko uf le i of Au moe sin naik na'ko anbi ahunut. 12Sin of ankifun fini nok halan. Sin hau tua min kase of nafua, afu of naton in nesan ma ulan of ansanu nok athoes. Ale tetus of Au fe ani neu atoni-atoni le fe anmoni na'ko uf le i. 13Hoi atokos Yehuda ma Israel! Anbi neno ahunut, leka atoni-atoni anao amnemat ankas es nok es, sin namolok nak, ‘So nati' snama le antoman Yehuda ma Israel antoman ko amsa!’ Mes of Au ufetin ki, talante atoni anao amnemat nane of sin nak es neu es nak, ‘So nati' tetus le nasanuton neu Yehuda ma Israel, nasanuton neu ki amsa.’ Es nane te so mimepan hi nekam ma kais mimtau!”
14 Uisneno Akuasat Afinit nakau a'an nak, “Anbi tabu hi na'i sin nato'ab Kau, Au aiti fekat he kas umate sin. Au ka seka fa Au fekat nane mes Au unaob ani. 15Mes tabu le i Au he fe tetus neu Yerusalem ma to Yehuda. Es nane te kais mimtau. 16Plenat-plenat le i es nati' hi moe mani: Leka ho mumolok, muton lasi amneot neu ho aom bian. So mufek lasi nok amneot le neki halan. 17Kais amsali maufinu neu ho aom bian. Kais moe supat nok poi. Au nek nanan lasi poi ma lasi ka amneot ma lasi maunu.”
18 Uisneno Akuasat Afinit anfe fef ba'an le i neu kau he etun ma uton neu In to, 19“Minahom le hi moe anbi fun ha, fun nima, fun hitu ma anbi fun bo' in nanan of anfani neno naek le nahenu nok malinat ma amoket neu to Yehuda. Amnek lasi amneot ma lasi halan!”
20 Uisneno Akuasat Afinit nakua a'an nak, “In etin of antia to na'ko kot namfau of nem neu Yerusalem. 21To na'ko kot mese of namolok neu to anbi kot bian nak, ‘Aim he hit atnao he taluli ma tabes neu Uisneno Akuasat Afinit ma amtoti In athoe neno. Mituin kai nai!’ 22Es nane te atoni namfau ma uf namfau le nabe'i of nem neu Yerusalem he nati' nabes neu Uisneno Akuasat Afinit ma antoti In athoe neno. 23Anbi neno-neno le nane atoni anao amnemat sin bo'mese of nem neu atoni Yehuda mese ma namolok nak, ‘Haim lomi lasi mnisat amsa onle hi; natuin haim nen nak Uisneno anfe neu ki tetus.’ ” Uisneno Akuasat Afinit nakua nalali In a'an onane.
Currently Selected:
ZAKHARIA 8: AOZ
Highlight
Copy
Compare
Share
Want to have your highlights saved across all your devices? Sign up or sign in
