ZAKHARIA 10
10
Fef bela Uisneno nak of nafetin In to
1Leka oefat antia, amtoti nai ulan neu Uisneno. Uisneno of anibun nope mafena, ma nasanut ulan anaek talante lene-lene sin no mate ma neki malinat neu ale atoni. 2Atoni-atoni antoti lekat lulut neu ale fatu le'u ma hau le'u ma neu ale mafefa poi, mes han taes-han taes le sin napeni alkun uab luman ma poi. Anmu'i le ansefi mnitas, mes sin etus tonas nane of nasekeb ki, ma halinat le sin anfe nani nane kan mu'i fa in otan. Es nane te to of nasitbok onle bibi kase. Sin nasunu fun kan mu'i fa atopus.
3 Uisneno nakua a'an nak, “Au uto' nae le'uf neu ale ana' aplenat le naplenat Au to, ma of Au fen sin kasat. Mes to Yehuda nane Au in-ini, ma Au, Uisneno Akuasat Afinit of Au panat sin. Of Au moe sin anfani bikase abe'it anbi makenat. 4Na'ko sin of Au beti ani ana' aplenat, atopus, ma meo pa'e le of naplenat Au to.” 5To Yehuda sin of nis onle amakenat-amakenat le antali sin musu-musu sin onle klofo anbi lanan. Sin of anmaken natuin Au, Uisneno tuntaku sin, ma musu nakaf le ansae bikase nane of sin anli'u naaenab sin.
6Of Au fe be'it matani neu to Yehuda,
ma of Au ufetin Au to Israel.
Of Au ufetin sin neu sin pah
natuin Au nek sin.
Of Au moe sin
onle uf le Au ka penan it fa sin.
Au le i sin Uisneno,
ma of Au nen sin onen totis.
7To Israel of anfani meo pa'e amatanit,
of sin namlil onle atoni le ninu tua min kase.
Sin sufa ka'uf na'ko batan nao neu batan
of ka nikan fa lasi mnisat le Au fe ulali.
Sin of namlil ma namoke
natuin Au taos Au mo'et neu sin.
8Au to of Au boin ma nibun anfani mese.
Au ufetin sin ma of Au umnauba sin on afi ahunut.
9Maski nak Au usitab sin anbi uf-uf
sin atnanan, ma sin anah-anah sin amsa
ma sin of anfani ok-oke neu sin pah.
10Of Au ufani sin na'ko Mesir ma Asyur.
Ma of Au eki sin neu sin pah anmes kun.
Of Au eki sin neu Gilead ma Libanon amsa,
talante sin nahenu ale pah.
11Leka sin anlak nani tasi nukat,
Au, Uisneno of a biso ale oki
talante Noe Nil of anmeti.
Uf Asyur le nanaebon nane of Au unebet ani,
ma Mesir le abe'it nane in kuasat of namneku.
12Au of umepan Au to,
sin of na'ki ma naluli nabes neu Kau.
Au, Uisneno, ukua ulali Au a'ak onane.”
Currently Selected:
ZAKHARIA 10: AOZ
Highlight
Copy
Compare
Share
Want to have your highlights saved across all your devices? Sign up or sign in
