ZAKHARIA 4
4
Mnitas neu paku in haen
1Ahake neno le namolok nalali nok kau in nem anteni ma nafena kau onle nafena atoni na'ko tupas. 2In natan kau nak, “Ho mit sa' ka?” Au utae ak,
“Paku haef mese le anmo'e na'ko mnatu.” Au utae ak, “Anbi in fafon nane anmu'i bale neu in mina, ma anfun natef in anmu'i paku hitu le es-es anmu'i bale neu abas hitu sin balan. 3Anbi kabenan a'li ma a'ne'u na'ko paku haef nane nahakeb hau bub fua mina nua.”
4Nalali te au utan Ahake neno nane ak, “Ale blua-blua nane anfani taka neu sa' ka, Usif?”
5“Ho ka muhin fa ka?” In natan neu kau onane.
“Kahaf Usif,” au utae onane.
10bAhake neno nane nak neu kau nak, “Paku hitu es nane esle' mataf hitu na'ko Uisneno le anpanat pah pinan fun natef.”
11Nalali te au utan neune anteni ak, “Hau bub fua mina nua en le anbi kabenan a'li ma a'ne'u na'ko paku haef nane in otan sa' ka? 12Ma tlaef nua na'ko hau bub fua mina saitun le anbi besi mnatu le napoitan mina bub fua mina saitun nane in otan sa' ka?”
13Ma in natae kau nak, “Ho ka muhin fa ka?”
Au utae ak, “Au ka uhin fa Usif.”
14In namolok nak, “Nane atoni nua en le Uisneno Akuasat Afinit anbeti nalali sin le anlek ma anlulu sin he nati' antuthae In.”
Fef ba'an Uisneno neu Nai Zerubabel
6Ahake neno nane anlenu kau he utiab neu Nai Zerubabel fef ba'an na'ko Uisneno, “Ka nok fa be'it matani meo pa'e ma ka nok fa ho be'im ma ho matanim anmes of ho mupeni, mes alnok Au Smanan Knino. 7Ekat le in a'naen on Tubu amsa of naaibon na'ko ho matam. Ho of mufena mufani Au Ume, ma in of nasopu nani lasi fena le nane. Ma anbi tabu hom tao mani fatu sukit anbi in balan atoni-atoni sin of anhunun nak, ‘Namneo in amasat kun!”
8Nalali te fef bian anteni na'ko Uisneno. 9In nak, “Nai Zerubabel antao ma anfatan nalali Au Ume, ma in of nasopu nani lasi fena le nane. Leka lasi nane anbol onane te, Au to of nahin nak Au es alelu ko Zakharia neu sin. 10aAnmu'i le nanebet lasi le i. Mes of sin nit Nai Zerubabel nanaob anteni lasi fena neu Au Ume, ma sin of anmalinan.”
Currently Selected:
ZAKHARIA 4: AOZ
Highlight
Copy
Compare
Share
Want to have your highlights saved across all your devices? Sign up or sign in
