ZAKHARIA 3
3
Mnitas neu Ana' Fuat Knino Amnanut
1Anbi mnitas mese anteni, Uisneno naton neu kau Ana' Fuat Knino Amnanut Nai Yosua anbi Ahake Uisneno In matan. Anbi Nai Yosua in aon bian Nitu ma naloitan nalali hen mo'e lasi nok in. 2Ahake Uisneno nak neu Nitu nak, “So nati' Uisneno ankas ko hoi Nitu! So nati' Uisneno le anek nalali Yerusalem ankas ko. Atoni le i onle hau nuta le anhel napoitan na'ko ai.”
3Nai Yosua anhake anbi nane ma anpake blua alahit. 4Nalali te Ahake neno nane nak neu ale atuntakus anbi neno tunan nak, “Ampolin blua pake alahit na'ko atoni le i.” Ma in nak neu Nai Yosua nak, “Au polin ulali ho sanat, es nane te of Au fe neu ko blua pake fe'u.”
5In naplenat ale in atuntakus sin he nati' napakeb pilu fe'u anbi Nai Yosua. Sin natuin ma nalali te sin nablua in neki blua pake fe'u ma Ahake Uisneno anpanat sin.
6Nalali te Ahake neno nane natiab fef ba'an Uisneno neu Nai Yosua nak, 7“Leka ho mutuin Au plenat sin ma ho muno'u Au mepu le Au fe ulali neu ko, es nane te nabe'i hom fani atopus piut anbi Au Ume in nanan ma muloitan in tetu. Au of asimo ale ho onen totis sin, onle Au nen ulali onen totis na'ko ale Ahake neno le anhaumak nok Kau. 8Amnen nai hoi Ana' Fuat Knino Amnanut Nai Yosua, ma neu hi amsa ana' fuat-ana' fuat le amfani in soba, hi ala ki amfani taka na'ko monit alekot anbi neno amnemat. Anbi tabu nane of Au lenu Au ate le antek in nak ‘Sunif’. 9Au tao ani fatu mese le masusuf hitu le of Au lun ani eki tuis-tuis anbi Nai Yosua in matan. Anbi neno mese in nanan of Au polin ani pah le i sin sanat. 10Leka in neno antia, atoni mese-mese of anho nan in aon bian he nati' nem ma antamis halan ma ua leko anbi lene tua min kase sin atnanan ma anbi ho hau bubuk sin.”
Currently Selected:
ZAKHARIA 3: AOZ
Highlight
Copy
Compare
Share
Want to have your highlights saved across all your devices? Sign up or sign in
