ZAKHARIA 2
2
Mnitas neu tani lukut
1Anbi mnitas mese anteni au it atoni mese le in na' tani lukut. 2Au utan ak, “Ho hem nao neu me ka?
“Au he su' Yerusalem,” in natae onane, “au he uhin kot nane in amnanun ma in menuan fauk.”
3Nalali te au it ahake neno le namolok nalali neu kau nane in nao mat, ma ahake neno mese anao ma antef in. 4Ahake neno ahunut nane nak neu ahake no nua nane nak, “Amnao nai lab neu atoni munif nane, ma muton neu in neu Yerusalem nane of nahenu nok mansian ma mu'it talante of ka mifena fa baki lape anfun natef. 5Uisneno anta'en nalali nak In anmes kun of anfani baki lape ai le anfun natef kot nane he nati' namafo in ma In of namaika anbi nane nok kuasat ma nok In apinat.”
Anboin ma no'en nafani atoni-atoni mapolin
6-7 Uisneno nakua a'an neu In to nak, “Au usitab ulali ki anbi neno in kabenan anfun natef. Mes anbi tabu le i hoi atoni-atoni mapolin, maen misaitan Babel ma amfani aim neu Yerusalem. 8Sekau es anmaken nok ki, in anken in le Au nek ani.”
Es nane te Uisneno Akuasat Afinit anlenu kau he ubeno In fef ba'an le i neu ale uf-uf le nasik nan In to, 9“Of Uisneno In neknon ma anmaken nok ki! Ma hi ate-ate sin of of nasik nan ki.
Leka lasi nane anbol hi of mihin mak Uisneno Akuasat Afinit es anlenu kau.”
10 Uisneno nakua a'an nak, “Amsi ma ampules nai nok malinat hoi to Yerusalem! Au of umaika anbi hi atnanam!”
11Anbi tabu nane uf-uf namfau anfani nem neu Uisneno he nati' anfani on In to. In of namaika anbi hi atnanam, ma hi of mihin neu Uisneno ansonu nalali kau neu ki. 12Haef le i Yehuda of anfani on Uisneno in-ini anbi In pah le aknino, ma Yerusalem of anfani kot le In anekan nesin.
13So hi mibala nai anbi Uisneno In matan! Natuin In nanoebon nem nalali na'ko In sonaf anbi neno tunan.
Currently Selected:
ZAKHARIA 2: AOZ
Highlight
Copy
Compare
Share
Want to have your highlights saved across all your devices? Sign up or sign in
