ZAKHARIA 1
1
Uisneno anboin nafani In to
1Anbi fun fanu Kesel Nai Darius naplenat Persia nan ton nua, Uisneno natiab In fef ba'an le i neu kau, Mafefa Knino Nai Zakharia le Nai Berekya in anah ma Nai Ido in upuf. 2Uisneno naplenat kau he nati' umolok onle i neu In to, “Anbi neno afinit Au, Uisneno Akuasat Afin-finit Au uto'an hi na'if sin. 3Mes tabu le i Au ak neu ki: Amfani aim neu Kau, he nati' Au fani eti eu ki amsa. 4Kais on hi na'if sin. Anbi ahun-hunut ale Mafefa knino naton Au fef bela neu sin he nati' kais sin anmo'e anteni maufinu ma anmo'e sanat. Mes sin kan filoli fa ma kan lomi fa he natuin kau. 5Hi na'if sin ma Mafefa knino sin le nane tabu le i es kin me ka? Sin ka eski ne fa anteni. 6Nanete natuin ale Au Mafefa knino, ma Au ate-ate sin le nane, Au utiab plenat-plenat ma Au mnaut-mnaut sin neu hi na'if sin. Mes sin kan panat sin fa talantia sin ansutai in amnekin. Es nane te sin antofok ma sin antebes nak Au, Uisneno Akuasat Afin-finit, Au kas ulali sin namnes nok sin sanat ma namnes nok Au lekat.”
Mnitas Mafefa knino neu bikase fauk-fauk
7Anbi fun Syebat, esle' fun bo'es am mese antam neno bo'nua am ha tabu Kesel Nai Darius naplenat nan ton nua Uisneno natiab In fef ba'an neu kau. Anbi mnitas nane anbi fai, 8au it ahake Uisneno ansae neu bikase me' mese. In nasnas anbi nonof mese anbi hau-hau murad sin atnanan. Bikase fauk-fauk anhake anteni anbi in kotin, anmu'i le me', anmu'i molo amtasa ma anmu'i le muti. 9Au utan neu In ak, “Koi Usif, ale bikase nane in otan sa' ka?”
In natae nak, “Of Au uton in otan neu ko. 10Uisneno ansonu sin he nati' antae pah pinan.”
11Ale bikase nane naton neu ahake neno nak, “Haim fun mitef milali pah pinan, mes pah pinan le i namne ma alekot kun.”
12Nalali te ahake neno namolok nak, “Uisneno Akuasat Afin-finit, Ho muto'an Yerusalem ma kot-kot Yehuda anbi ton bo'hitu nanan. Ho muto'an amteni sin antia me ka ma of Ho kam nose fa sin sanat ka?”
13 Uisneno natae ahake neno nane neki molok-molok halinat, 14ma ahake neno nane anlenu kau he utiab sa' le Uisneno Akuasat Afin-finit naton nalali neu kau nak, “Au nek ma panat sin kot Yerusalem, Au kot le aknino. 15Mes Au uto'an uf-uf le sin anmoni nok tainine ma malinat. Natuin leka Au eka Au to'as neu Au to, uf-uf nane sin anhafen anteni Au to sin nu'ut. 16Tabu le i Au fani neu Yerusalem he nati' Au sako sin sanat. Au Ume mes nahakeb nafani ma kot Yerusalem nane of naloitan nani.”
17Ahake nane anlenu kau he utiab fef ba'an le i amsa ak, “Uisneno Akuasat Afin-finit anmanta'en nak In kot sin of anmoni nok athoes ma haef mese anteni In of antuntaku Yerusalem ma antebes In anfani in-ini kun.”
Mnitas neu sunaf-sunaf
18Anbi mnitas bian anteni in nanan, au it sunaf ha na'ko bijae. 19Au utan neu ahake neno le namolok nalali neu kau ak, “Sunaf-sunaf nane in oten sa' ka?
In natae nak, “Sunaf-sunaf le nane anfani taka ana' plenat-ana' plenat abe'it le nasitab to Yehuda, Israel ma Yerusalem.”
20Oke te Uisneno naton neu kau atoni apakae besi ha le neki biso. 21Au utan ak, “Sin nem nane salit sa' ka?”
In natae nak, “Hen hakatau ma natselab uf-uf le naskuku nalali Yehuda ma le nasitab nalali In to.”
Currently Selected:
ZAKHARIA 1: AOZ
Highlight
Copy
Compare
Share
Want to have your highlights saved across all your devices? Sign up or sign in
