ZAKHARIA 14
14
Yerusalem ma uf-uf
1 Uisneno In neno lef lasi anhaumaken. Es nane te of nasik nan Yerusalem, ma in nesan nane of anbati anbi ho matam. 2Uisneno of anibun ale uf he nati' anken Yerusalem. Of nasik nani kot le nane, of anpukai nani ume-ume nane, ma of nale'un nani ale bife-bife. Batis nua na'ko in to of neki sin nao neu bale mapolin, mes in nesin of namaika anbi kot le nane. 3Oke te Uisneno of nem ma anmaken hen laban uf-uf le nane, onle In anmoe nalali anbi batan ahunut. 4Anbi neno le nane In of anhake anbi Tubu Saitun, anbi kot Yerusalem in aon bian neno saen. Ma Tubu Saitun of anpe' natuin nonof le menuan, na'ko neno saen talantia neno tesan. Batis nua na'ko tubu nane of abbaitson neu bian a'li, ma batis nua bian a'ne'u. 5Hi of maen mituin nonof le anbati tubu nane anfani nua. Hi of maen onle hi na'if sin leka nainunus anbol anbi tabu Kesel Uzia, Kesel Yehuda. Oke te au Usi au Uisneno nanoebon nem, ma ale ahake neno natuin In.
6Leka neno le nane antia, of kan mu'i anteni mainikin ai oe tene. 7Anbi neno le nane kan mu'i anteni fa mesokan. Neno le nane of meusine piut, anbi fai amsa. Mes al Uisneno es nahin leka neno nane anbol.
8Anbi neno le nane, oe le neki halinat of ansai na'ko Yerusalem; batis nua na'ko oe nane of ansai Tasi Maten ma batis nua anteni of ansai neu Tasi Tnana. Oe nane of ansai piut, leka anbi oefat ai anbi fauknais. 9Ma Uisneno of naplenat anfani Kesel neu pah pinan funam natef; atoni mese-mese of nabes neu In anfani Uisneno ma nahin In nok kanaf le namnes.
10Ale pah anbi Geba bian a'li antia Rimon kabenan a'ne'u, of anfani paha mnela. Mes Yerusalem of namnanu anfini, namnanu nesi na'ko pah anbi in aon bian; kot nane of menuan na'ko Eno Naek Benyamin talantia Eno Naek Sudut, esle' bale Eno Naek Pertama ma na'ko Fatu Elak Hananel talantia bale aib tua min kase usif in-ini. 11Atoni-atoni of namaika nok tainine anbi kot le nane, ma kan mu'i fa maten hen toman sin.
12 Uisneno of nasanut menas le neki amtaus neu ale uf le anmaken nalali anlaban Yerusalem. Sin matan ma sin man, ma sin aon ok-oke of nafo anbi tabu sin fe anmoni.
13Anbi neno le nane Uisneno of anmoe uf-uf antakman ma namtau talante atoni mese-mese of anheke in soba anbi in aon bian ma anlaban in. 14Atoni-atoni anbi Yehuda of anmaken ma anpesi Yerusalem. Of sin naiti ale blua na'ko uf-uf anfani blua le sin nasik nani nahumbon anbi mnatu, noni muti ma bale pake namfau.
15Menas mese le naek amsa of antoman bikase, bikase saeb, bikase paha snaen ma bikase luke mnanu, ma ale mu'it anbi musu sin bale maika.
16Namuni te ale atoni le fe anmoni anbi uf-uf sin atnanan le anmaken nok Yerusalem, of anao neu kot le nane he nabes neu Kesel, Uisneno Akuasat Afinit, ma nanaeb Tolas La' Hau No'. 17Leka anmu'i uf le kan lomi fa he nao neu Yerusalem he nabes neu Kesel, Uisneno Akuasat Afinit, of ulan kan sanu fa anbi sin pah. 18Ma leka atoni Mesir kan lomi fa he nanaeb Tolas La' Hau No', sin amsa of antoman menas le Uisneno nasanut neu ale uf le kan lomi fa he nao he naluli ma nabes. 19Le nane kasat neu Mesir ma neu ale uf le kan lomi fa he nanaeb Tolas La' Hau No'.
20Anbi neno le nane bano-bano le anbi bikase peni' of antui molok nak “Nateta neu Uisneno”. Tasu-tasu anbi Ume Uisneno of naupab sin onle pika-pika tulu anbi baki tulu in matan. 21Ale tasu anbi Yerusalem ma anbi Yehuda funam natef of nateta sin anfani Uisneno Akuasat Afinit in-ini. To le natulu fua tulu of anpake he nati' nahan sisi tulu. Leka neno nane antia, of kan mu'i anteni fa atoni asosa anbi Uisneno Akuasat Afinit In Ume.
Currently Selected:
ZAKHARIA 14: AOZ
Highlight
Copy
Compare
Share
Want to have your highlights saved across all your devices? Sign up or sign in
