MALEAKHI 1
1
1Le i fef ba'an Uisneno neu Nai Maleakhi hen etun ma naton neu Israel.
Uisneno In manekan neu to Israel
2 Uisneno nakua a'an neu In to nak, “Au nek ki.” Mes sin natae nak, “Uisneno Hom nek kai onme ka?”
Uisneno natae nak, “Ai Nai Esau nane ka Nai Yakub ka in tataf fa ka? Mes Nai Yakub Au nek ani, 3mes Nai Esau Au nek nanan. Nai Esau in pah in tubu sin Au uskuku ulali sin, ma in pah Au una'at ulali neu ale mu'i fui anbi mnela hufui.”
4Oni bati Nai Esau in sufan, atoni-atoni Edom nane sin nak, “Hai kot-kot sin naskuku nalali sin, mes hai of mifena mifani sin,” Uisneno of natae nak, “Sin nabe'i nafena nafani, mes Au of utselab ani. Of antek sin nak, ‘Pah abulalut’ ma ‘Uf le antoman kasat Uisneno tal nabal-bal.’ ”
5To Israel of sin nit anmes, ma sin nak, “Namneo Uisneno nane naek kun; In kuasat nane antia pah Israel in kotin amsa!”
Uisneno nabokan ale Ana' fuat knino neki hau mafena
6 Uisneno Akuasat Afinit nakua a'an neu ale Ana' fuat knino sin nak, “Li'ana mese antola in amaf, ma atuthaes mese antola in usi. Au le i ho Ama; nansa' es hi tam tola Kau fa? Au le i hi Usi; nansa' es hi ka mimtausan Kau fa? Hi mikle'at Kau, mes hi mitoti mak, ‘Hai mikle'at Ko nok lanan me ka?’ 7Nok le hi mitulu mnahat le kan matom fa he mitulu anbi Au baki fuat in tunan. Oke te hi mitoti mak, ‘Nok lanan me ka hai minebet Ko?’ Nok hi milahi Au baki fuat. 8Leka hi mitulu neu Kau mu'it afolot, amenat ai le an ole, ai hi ka mihin fa neu mo'et nane mo'et asanat? Ati hi amfe mu'it le nane neu Kumlol! Oni of in anmalin ka ma anmo'e alekot neu ki?”
9Tabu le i, hoi ale Ana' fuat knino, ati him toti neu Uisneno he nati' In an nek kit. In of ka natae fa hi onen totis, ma nane hi sanat anmes kun. 10Uisneno Akuasat Afinit nakua a'an nak, “Leko nesi Au Ume in eno maeka, natuin hi mipina ai son-sona anbi Au baki fuat in tunan. Au ka lomi ki fa, ma Au ka lomi fa he simo hi fua tulu sin. 11Ale uf-uf anbi pah pinan antola Kau ma sin notu klali anbi me-me hen tola Au kanak ma natulu neu Kau fuat-fuat le anmatom, natuin ale uf naluli ma nabes neu Kau! 12Mes hi mikle'at Kau natuin hi mibai Au baki fuat nane ka maupa fa, ma hi mitulu mnahat le Au tita anbi in tunan. 13Hi mimolok mak, ‘Hit atlenan talali nok ale lasi nane’, ma hi minebet Kau. Hi meki mu'it le hi mibak, mu'it a olet ai amenat he nati' mitulu neu Kau. Hi mitenab mak of Au lomi he nati' simo hi tulu nane? 14Kasat neu atoni apoiba le natulu neu Kau mu'it le ka maupa fa, leka anbi sin mu'it sin atnanan anmu'i mu'it alekot le anta'en nalali neu Kau! Natuin Au Kesel Amnanut Kau, ma ale uf antola Kau.”
Currently Selected:
MALEAKHI 1: AOZ
Highlight
Copy
Compare
Share
Want to have your highlights saved across all your devices? Sign up or sign in
