ZAKHARIA 11
11
Ale ana' aplenat amaufinut sin natsel
1Hoi Libanon, amfai ho eno-eno sin,
he nati' ai notu ale ho hau amtasa sin!
2Hoi hau lete, amkae ma amkul nai,
natuin ale aijao natsel nalali,
hau-hau naek nane natsel nalali.
Ho hau naek-hau naek abit Basan, amkae ma amkul nai.
Natuin ale nasi-nasi naek an ote nani sin ok-oke.
3Amnen nai kaet kulut ale ana' aplenat
sin apinat nane namneku nalali!
Amnen nai ale meo asu sin anbai anbi nasi in nanan;
natuin sin kuna anbi Noe Yordan in nonon nane namle'u nalali.
Atukus nua
4 Uisneno nakua a'an neu kau nak, “Ho moesom amfani atukus le natuku bibi kase le of malolo. 5Ale in asosat sin namate ale bibi kase nane mes ka napeni fa kasat. Sin le nasosa bibi kase nane sin sisi sin namolok nak, ‘Ampules nai Uisneno! Tabu le i hit amaus nane masato!’ Atukus-atukus nane sin nekan kan mofu fa neu ale bibi kase le sin anpanote.
6Au ka nek ateni fa sekau ma sekau anbi pah le i. Au of una'at ani in to sin neu ale ana' aplenat. Sin of naskuku pah le i, Au of ka usik ani fa na'ko sin kuasat.”
7Au, Zakharia, es ale a'sosa bibi kase nane anfe neu kau upa' he utuku ale bibi kase le of malolo. Au mu'i kuk tias nua; es au ukanab “Athoes” ma es anteni “Futus”. Nalali te au fatan paot ma panat neu ale bibi kase nane. 8Atukus tenu le sin nek nanan kau sin nalali au neka none. Au li'u sin anbi funan mese in nanan. 9Nalali te au umolok neu pukan bibi kase nane ak, “Au of ka utuku teni ki fa. Le hen mate namaut he in anmate, ma le he namle'u namaut he namle'u. Oke te in nesin nane namaut he sin mamaten es nok es.” 10Oke te tias le au ukanab ak “Athoes” nane au aiti ma au ipu he nati' eka fef bela le Uisneno anmoe nani neu ale uf. 11Anbi neno le nane amsa fef bela le nane of maeka. Ale a'sosa bibi kase nane sin anpanat kau, ma sin nekan amsa anbe' nak Uisneno fe namolok nok sin nanet natuin au taos ma au mo'et. 12-13Au umolok neu sin ak, “Kalu au usi ki him lomi, amfe neu kau au upa'; kalu kahaf, kaisa.” Oke te sin anfe kau noni muti bo'tenu anfani au upa'.
Uisneno nakua a'an neu kau nak, “Mutam noni le nane neu bale pleob noni anbi Au Ume.” Es nane te au utam noni muti bo'tenu nane neu bale pleob noni anbi Ume Uisneno in nanan. Sin naupab neu ka antu' anbi le nane! 14Nalali onane te au ipu au tias no nua, esle' au kanab ak “Futus,” oke te to Yehuda ma Israel sin nek mese nane anpe'.
15Oke te Uisneno nakua a'an neu kau nak, “Amoesom amteni amfani atukus, mes haef le i amfani atukus ka alekot. 16Natuin Au of a'lek ani atukus mese he nati' anpanat Au pukan bibi kase sin, mes in ka nami fa bibi kase le namneku; ma in ka nami fa bibi kase le aseket, ma kan paloli fa bibi kase apapat, ma kan fe fa mnahat neu bibi kase le fe anmoni. Mes in nah anmese sisi na'ko bibi kase apokat afinit ma anbok mu'it nane in atnusan. 17Sukat neu atukus le ka maota fa nane! In nasaitan nani in pukan bibi kase sin. Makenat of nasopu nani in aplenat. In nukun nane of an ole ma in matan a'ne'u of anfolo.’ ”
Currently Selected:
ZAKHARIA 11: AOZ
Highlight
Copy
Compare
Share
Want to have your highlights saved across all your devices? Sign up or sign in
