HAGAI 2
2
Ume Uisneno le fe'u in masan
1Anbi fun hitu antam neno bo'nua mese anbi ton le nane amsa, Uisneno namolok anteni nanet natuin Mafefa Knino Nai Hagai. 2Uisneno anlenu Nai Hagai ma namolok neu Kumlol Nai Zerubabel, Ana' fuat knino Amnanut Nai Yosua, ma ale to he naton fef ba'an le i, 3“Ai anmu'i ka anbi hi atnanam le fe namnau Au Ume le nane in masan anbi ahun-hunut? Tabu le i in mo'en onme ka, anbi hi tenab? Namneo in ka naton fa halinat? 4Mes, kais hi mioleb hi nekam, hoi hi alki oke! Minaob mepu le nane piut, natuin Au of tuntaku ki piut. 5Anbi tabu him poi mi'ko pah Mesir, Au manta'en ulali neu of Au uneo ma uhafo ki. Ma antia tabu le i amsa Au fe uneo ma uhafo ki. Es nane te ka nabe'i fa he hi mioelbom.
6Anbi tabu paumaka Au of u'beko neno tnanan ma pah pinan, meto ma tasi. 7Of Au ube'ab ale uf ma ale sin amaus of neki nem, talantia Au Ume of nahenu nok sin mu'in. 8Ale mnatu ma noni muti anbi pah pinan le i Au ini kun. 9Au Ume fe'u le i of namas anesin afi ahunut, ma anbi le i of Au fe nek halan ma athoes neu Au to.” Uisneno Akuasat Afinit es namolok nalali onane.
Mafefa Knino Nai Hagai namolok nok ale ana' fuat knino
10Anbi fun sio antam neno bo'nuam ha tabu Kesel Nai Darius naplenat nan ton nua, Uisneno Akuasat Afinit namolok anteni neu Mafefa Knino Nai Hagai. 11In nak, “Amtoti lasi tfeka na'ko ale ana' fuat knino sin antom lasi le i: 12Kalu onle anmu'i atoni mese le naiti sisi tuka mese na'ko fua tulu le natulu neu Uisneno, oke te in neki anfani natuin an amu nani anbi in sobalu, ma namuni te leka in sobalu nane anlep u'tunu ai sa' le nahan nani, ai tua min kase, ai min saitun bub fua mina, ai mnahat sa', ai ale sa' nane of anfani knino ka?”
Leka Nai Hagai natiab han tanas nane, ale ana' fuat knino nane sin natae nak, “Kahaf.”
13Nalali te Nai Hagai natan anteni nak, “Kalu onle anmu'i atoni mese le nalahi natuin in na' amates, nalali te in na' anteni es na'ko mnahat nane, mnahat nane nalahi ka?”
Ale ana' fuat knino natae nak, “Namneo, nalahi kun!”
14Oke te Nai Hagai namolok anteni nak, “Uisneno namolok nak lekat lulut nane antom amsa neu Au to Israel anbi pah le i ma neu ale sa' le sin napeni. Es nane te, sa' le sin natulu anbi baki tulu le i nane nalahi kun.”
Han manta'en Uisneno neu In tetus
15 Uisneno nakua a'an nak, “Ait, him kiso sa' le anbol nalali nahun na'ko neno le i, esle' nahun na'ko Au Ume le i maloitan! Hi monim anbi tabu nane onme ka? 16Him nao milali ma mit aen kase natupuk ma anbi hi tenab of hi mipeni aen kase kilo 200, mes anbi nane al anmu'i kilo 100. Him nao ho nati' amkui tua min kase liter 100 na'ko ton tua min kase, mes al anmu'i liter 40. 17Au usanut ulali anin maputu ma ulan fatu he nati' naskuku nane ale hi lene sin nesan, mes hi kam lomi fa hem fani aim meu Kau. 18Anbi neno le i, fun sio antam neno bo'nuam ha, Au Ume in tu'in him tao milali! Amkiso nai neu sa' es of anbol na'ko tabu le i. 19Maski nak kan mu'i fa aen kase le nabalah, ma hau tua min kase, hau bubuk, hau lin kase, ma hau fomeni bub fua mina fe ka natua fa, mes na'ko tabu le i of Au fe ki etus!”
Han manta'en Uisneno neu Nai Zerubabel
20Anbi neno le nane amsa, esle' fun sio antam neno bo'nuam ha, Uisneno nafe In han manta'en hae nua neu Nai Hagai, 21he nati' natiab neu Kumlol Nai Zerubabel. Uisneno nakua a'an nak, “Ka'lo fa anteni of Au heko neno tunan ma pah pinan, 22of Au u'belat ale plenat sin ma Au uskuku sin kuasat. Of Au uklelo aklet-aklet makenat ma in amnekit sin; ale sin bikase sin of anmate ma in asaet-asaet sin of sin anmalolon es nok es. 23Anbi neno nane ho Nai Zerubabel, Au ate, of Au aiti ko he muplenat natuin Au kanak. Natuin alkun ho es Au beti ulali.” Uisneno Akuasat Afinit es umolok ulali onane.
Currently Selected:
HAGAI 2: AOZ
Highlight
Copy
Compare
Share
Want to have your highlights saved across all your devices? Sign up or sign in
