OBAJA 1
1
Uisneno of ankas Edom
1Le i etus tonas Nai Obaja; in natiaba fef ba'an Uisneno Anesit Afinit antom uf Edom.
Uisneno ansonu nalali In haef neu uf-uf, ma hit atnen talali In fef bela le in neki onle i, “Miloitan nai he nati amtam ambi makenat! Aim he hit atnao het maken tok Edom.” 2Ma Uisneno nak neu Edom nak, “Au of u'oleb ko, talantia ale uf of nakle'at ko. 3Ho neka naeb nane anfuli nan ko. Ho kot ainaf anfani tubu fatu le namep; ho bale maika nane anbi tubu amnanut sin tunan. Es nanet hi mitenab mak, ‘Sekau es of he namofu Kau?’ 4Maski nak ho ume nane namnanu onle kolo tasi panis in kuna' ma namnanu onle afkun-afkun anbi neno tnanan namneo of Au umofu ko.
5Abakat ai asikat le nem anbi fai, in naiti sa' in ansali. Atoni le anseu tua min kase fuan anbi lene in of nait nan fua fauk-fauk. Mes ho musu-musu sin of namate ki. 6Hoi Nai Esau in sufan, atoni anpukai ko, ma antet nan ho maus le natol'on amsa. 7Sin le namesbok nok ko anfuli ko, ma anli'u ko na'ko ho pah. Ho soba sin anli'u ko, ma atoni le nah nabua nok ko es namofu ko. Sin alsin natan neu ko nak, ‘Tabu le i in hine nane es me ka?’
8Anbi tabu au kas pah Edom, of Au umate atoni-atoni ahinet. Ma sin hine of namneku, ma in nobin namneku. 9Ale meo pa'e na'ko Teman of namtau, ma ale solalus Edom nane of anmate.”
Lasi-lasi le anmo'e talantia ankas Edom
10“Ho muton mulali ho maufinu neu Nai Yakub in sufan le ho soba sin. Nok lasi nane of Au umate ko ma ale atoni na'ko batan anao neu batan of nakle'at ko. 11Of hom hake ambi lo, anbi tabu musu sin nale'un eno Yerusalem, ma naskuku nani kot nane. Hom ta'ah anbi tabu sin naoina ale maus na'ko Yerusalem ma sin anbati nani sin. Ho maufinu namnes nok ale musu nane. 12So nati' kais ho mumlil nok atoni Yehuda sin namle'un, ma kais mumoke leka ho soba sin anmate. So kais ho mupoibom anbi tabu in antam anbi nukat. 13Kais hom tam meu Au to sin kot, ma mi'ba atoni-atoni anukat, nansa' anteni hi mibak sin amaus anbi neno sin nasusbok. 14Kais amhake ambi lanan in sebin, he nati am ek atoni-atoni le naen na'ko musu sin niman ai muna'at sin neu sin musu anbi neno sin antam anbi nukat.”
Uisneno of anlefi lasi neu ale uf-uf
15“Namneo in tabu nane anhaumak nalali, Au, Uisneno, of a'lefi uf-uf sin lasi. Sa' le Edom anmo'e of Au seunbanin ani. In of antamis nit sa' le in anmo'e nalali. 16Anbi Au tubu knino in tunan Au to ninu nalali mninut le anfani taka' neu sin kasat. Mes amninut neu uf-uf anbi pah pinan le i menu anes anteni. Sin of ka naaibok fa anteni na'ko kasat le nane. Sin of ninu talantia nalali, oke te of sin namneku ma ka tit fa sin nobin.”
Mnisat neu Israel
17“Mes anbi Tubu Sion, of anmu'i le napeni honis, ma tubu nane of anfani bale le anbeti nani neu Kau. Es nanet Nai Yakub in sufan of ansimo nafani sin afu pusak le nane. 18Au to Israel le nane of onle ai le notu nani Nai Esau in sufan, onle ai notu nani ane ta'u anbi lene. Na'ko Nai Esau in sufan of kan mu'i fa atoni mese le of nafetnon. Au, Uisneno, es umolok ulali onane!
19Atoni-atoni anbi kabenan Ne'u of antoko natau Edom. Atoni-atoni na'ko tubu tunan aon neno tesan of anli'u na'aenab atoni Filistin na'ko sin pah. Uf Benyamin of antoko natau Gilead, ma Au to Israel of antoko natau Efraim anfun natef ma Samaria. 20Atoni Israel anbi kabenan Li of anfani nem na'ko bale mapolin ma of antoko natau Fenisia antia Zarfat. Atoni-atoni Yerusalem le mapolin anbi Sardis, of anfani nem ma antoko natau kot-kot pah Yehuda in kabenan ne'u. 21Atokos anbi Yerusalem le anmoni nok athoes of anmaken nok Edom ma nis ma anbe'u nani. Es nanet Au Uisneno of uplenat on kesel.”
Currently Selected:
OBAJA 1: AOZ
Highlight
Copy
Compare
Share
Want to have your highlights saved across all your devices? Sign up or sign in
