YUNUS 1
1
Nai Yunus ka natuin fa Uisneno In plenat
1Anbi neno mese, Uisneno nakua a'an neu Nai Yunus, Nai Amitai in anah. 2In nak, “Amnao nai meu Niniwe, kot anaek nane he mube'ab in, natuin Au uhin ulali nak in atokos sin le nane anmoe maufinu anaek.” 3Mes Nai Yunus in nao neu bale teta he nati' na'lo na'ko Uisneno. In nao neu Yopa, ma in naeku nok bnao le of he nao neu Spanyol. Leka in anbaen nalali noni he nati' in nao, in ansae neu bnao, ma anlak tasi nok atoni bnao neu Spanyol, he nati' na'lobon na'ko Uisneno. 4-5Nai Yunus ansanu neu bale abit apinan ma in antup anfini anbine.
Namuni te Uisneno nasanut anin naek anbi tasi in tunan talantia nautus anaek anbol, le antoman bnao nane talantia ala kle'ot bnao nane naskuku. Ale atoni bnao sin namtau ma sin anhunun ma antoti babat ma tuntakus, es-es neu in uisneno teta kun. Sin anpolin napoitan bale abit bnao in nanan he nati' kais bnao nane anlem.
6Anbi tabu amneki bnao ansanu neu bale abit apinan, anbi nane in naeku nok Nai Yunus le fe antup. Es nanet in namolok nak, “Anmo'e onme ka es hom tup anbi tabu onle i! Amfen nai! Am onen nai neu ho uisneno teta ma amtoti babat ma tuntakus. Kais-kais in nek kit talantia hit ka tam fa anbi amle'ut.”
7Leka Nai Yunus ma amneki bnao nane ansae anbi bnao in fafon, ale atoni bnao nane sin namolok es nok es na, “Aim he hit athel sulat he nati' hit tahin sekau es nasanab talantia snama le i antoman kit!” Sin anhelan sulat, ma Nai Yunus es antoman. 8Es nanet sin nak neu Nai Yunus, “Namneo ka natuin ho asnama le i anbol? Ho mu'ko me ka? Ho mu'ko uf me? Nansa' es hom bi bale le i?”
9Nai Yunus natae nak, “Au atoni Ibrani kau. Au u'luli u'bes neu Uisneno abit neno tunan le anlek oe tasi ma pah meto.” 10Nalali te in anfen ma nanu'un sin neu anmo'e onme talantia in naen na'ko Uisneno In matan.
Leka ale atoni bnao sin nen lasi nane, sin amtaus ansato anteni, ma sin nak neune nak, “Ho mo'et nane in matani kun!” 11Leka sin namol-molok onane te, nautus nane ansato piut, es nanet ale atoni bnao sin natan neune nak, “Mes hai he mo'e sa' neu ko ka he nati' nautus le i nasnas?”
12Nai Yunus natae nak, “Ampolin mitam kau neu tasi in nanan, namneo nautus nane of nasnas. Natuin tabu le i au uhin, natuin au nautus anaek le i antoman ki.”
13Mes ale atoni bnao sin ansepo bnao nane he neki neu meto. Mes nautus nane nanae piut, talantia sin mepu nane son-sona kun. 14Es nanet sin ansakoi neu Uisneno nak, “Koi Uisneno, haim toti, kais mule'un kai natuin he maiti snasaf na'ko atoni le kan mo'e fa sanat neu kai. Koi Uisneno, Ho mo'e mulali sa' le Hom lomi.” 15Nalali te sin anpolin Nai Yunus neu tasi in nanan. Es nanet nautus nane nasnas. 16Ale atoni bnao nane sin namtausan Uisneno, ma leka sin antia pah meto, sin natulu fuat ma sin anmata'en lasi namfau neu Uisneno.
17Anbi tabu le nane Uisneno anfe ika naek mese le an olo nan Nai Yunus. Nok nane Nai Yunus in nabalah anbi ika in tain neno tenu ma fai tenu.
Currently Selected:
YUNUS 1: AOZ
Highlight
Copy
Compare
Share
Want to have your highlights saved across all your devices? Sign up or sign in
