AMOS 9
9
Mnitas neu kasat na'ko Uisneno
1Au it Uisneno anhake anhaumak nok baki tulu. In anfe plenat le i nak, “Amtepo muhelan ni-ni anbi Au Ume in nakan, he nati' ale ke'an nane anpe'. Mutselab ni-ni nane neu atoni-atoni sin nakan. Sin le kan mate fa of Au umate sin anbi makenat in nanan. Kan mu'i fa he naen, ma ka tit fa atoni mese he nafetin in aon. 2Maski nak sin antam antia nopu maten, of Au upeni sin amsa. Maski nak sin ansae neu neno in kupun, of Au usanut sin na'ko bale nane amsa. 3Leka sin natolo' anbi Tubu Karmel in tunan, of Au ami sin ma Au heke sin. Leka sin natolo' anbi tasi in kupun, of Au uplenat kaun le'u tasi ma anlau sin. 4Leka musu anheke nan sin, of Au uplenat he nati' namate sin. Au mu'i salit he nati' ule'un sin ma of Au usanut sin.”
5Pah pinan anainun ma mansian antam anbi nu'ut,
natuin Uisneno Anesit ma Akuasat Afinit es an ono in.
Onle Noe Nil in oe anpes ma anhelon
onane amsa sin of naiti ok ma natselan.
6 Uisneno nafena In Ume na'lo anbi neno tunan,
anbi pah pinan in tunan,
In antao neno tnanan anfani in obet,
ma oe na'ko tasi ansae neu pah meto,
le anmo'e nani ale lasi nane In kanan nane esle' Uisneno!
7 Uisneno nakua a'an nak, “Hoi to Israel, Au panat atoni Sudan namnes onle Au panat ki amsa. Au eki ulali atoni Filistin na'ko Kreta ma atoni Siria na'ko Kir namnes onle Au upoitan ki na'ko pah Mesir. 8Au, Uisneno Anesit Afinit, Au fe kis-kiso ana' plenat Israel le anmo'e sanat i, ma of Au uneku ani na'ko pah pinan in fafon. Mes Nai Yakub in sufan of Au ka ule'un ani fa oke. Au, Uisneno, ukua ulali Au a'ak.
9Of Au uplenat ma pesen to Israel onle atoni anpesen ane kase anbi tupa in nanan. He nati' anpolin le ka maota fa na'ko sin atnanan, ma of Au ki'un sin anbi pah-pah sin atnanan. 10Atoni-atoni asanat anbi Au to sin atnanan namolok nak, ‘Uisneno of ka nafetin kit fa he nati' amle'ut antoman kit.’ Mes, namneo sin of anmate anbi makenat in nanan.”
Uisneno of naloitan nafani atoni Israel sin monin
11 Uisneno nakua a'an nak, “Of antia in tabu of Au uloitan ufani Nai Daud in aplenat. Tabu le i plenat nane onle ume le natsel. Mes Au of uloitan ufani in baki lape sin ma of Au ufena ufani talante in of on afi anbi tabu ahunut. 12Atoni Israel of naplenat pah Edom in nesin ma ale pah le anbi ahunut Au in-ini. Au, Uisneno, ukua ulali Au a'ak ma of Au unaoba ani lasi nane.”
13 Uisneno nakua a'an nak, “Of antia in tabu ane kase of anmoni nok manoe le'uf kun talante tabu atlefi ka talali fa. Tua min kase of anmoni nok amliat talante atoni of anmo'e tua min kase piut. Tua min kase of anloni na'ko tubu-tubu ma ansai na'ko netu-netu. 14Au to Israel of anmoni anfani nok athoes. Sin of nafena nafani sin um-ume ma kot-kot le natsel, oke te sin namaika anbine. Sin of ansen sin lene tua min kase ma sin ninu tua min kase in oen. Sin of anluen ma sin nah nani in afan. 15Au to of namaika anbi pah le Au fe ulali neu sin. Sin of ka nafena fa sin anteni na'ko nane. Au Uisneno sin Uisneno le ukua ulali Au a'ak.”
Currently Selected:
AMOS 9: AOZ
Highlight
Copy
Compare
Share
Want to have your highlights saved across all your devices? Sign up or sign in
